Hazaryň möwsümleri – 2023
Türkmenistanyň sungat ussatlary 18-nji awgustdan 6-njy sentýabr aralygynda Astrahanda geçiriljek «Hazar möwsümleri — 2023» nusgawy sungat festiwalynyň halkara meýdançasynda çykyş ederler hem-de onuň çäklerinde guraljak medeni çärelerine gatnaşarlar.
Festiwalyň maksatnamasy tomaşaçylara Hazarýaka döwletleriniň medeniýeti we sungaty bilen giňden tanyşmaga mümkinçilik berýär.
Maksatnama laýyklykda, 25-28-nji awgust aralygynda Astrahan filarmoniýasyna gatnaşyjy ýurtlaryň hersine bagyşlanan konsertler geçiriler. «Türkmenistan: Altyn asyr» elektron neşirine görä, Türkmenistanyň güni 28-nji awgustda geçiriler.
Konserte Türkmenistanyň halk artisti Atageldi Garýagdyýew, pianinoçy, Türkmenistanyň at gazanan artisti Wladimir Mkrtumow, «Aşgabat kameratasy» ansambly gatnaşar diýlip garaşylýar.
Festiwalyň dowamynda Astrahanyň ülkäni öwreniş muzeýinde Hazarýaka sebitiniň ýurtlarynyň arasyndaky gatnaşyklaryň ösmegine bagyşlanan suratlar hödürlenýän «Hazar — dostluk deňzi» fotosuratlar sergisi açylar.
Türkmenistanyň at gazanan artisti, «Ýylyň parlak ýyldyzy — 2020» döredijilik bäsleşiginiň ýeňijisi, zehinli aýdymçy Leýli Ökdirowa Russiýanyň Astrahan şäherinde geçiriljek «Hazar möwsümleri» atly halkara nusgawy sungat festiwalynyň açylyş dabarasynda çykyş eder. Festiwal 22-nji awgust — 6-njy sentýabr aralygynda geçiriler.
Habarda bellenilişi ýaly, festiwalyň açylyş dabarasyna rus operaçysy Ildar Abdrazakow, Azerbaýjanyň halk artisti Elçin Azizow, eýranly sazanda Mehdi Hosseýni we beýleki meşhur sungat ussatlary hem gatnaşar. Festiwala daşary ýurtly myhmanlar we Russiýanyň raýatlary çagyryldy.
Astrahan oblasty bu festiwaly eýýäm üçünji gezek geçirýär. Festiwalyň açylyş dabarasy 22-nji awgustda Astrahan Kremlindäki meýdançada geçiriler.
Häzirki wagtda bu ýerde sahna meýdançasyny taýýarlamak, yşyk we ses enjamlaryny guramak ýaly işler alnyp barylýar. Guramaçylaryň bellemegine görä, festiwal ýatdan çykmajak multimediýa çykyşlary özünde jemlär.