TÜRKMEN SURATKEŞLERI GRESIÝADAKY SERGÄ DÖREDIJILIK ESERLERI BILEN GATNAŞÝARLAR
Gresiýanyň Afiny şäherindäki «Galasi» medeniýet merkezinde dünýä ýurtlaryndaky ussat suratkeşleriň döredijilik sergisi açyldy. Oňa türkmen suratkeşleriniň 23-si öz eserlerini hödürledi.
Döredijilik çäresinde 80 golaý ýurduň ençeme suratkeşiniň döreden eserleri görkezildi. Türkmen suratkeşleriniň hödürlän suratlary şekillendiriş sungatynyň dürli žanrlarynda we usullarynda ýerine ýetirilipdir. Suratkeşleriň kendirlerinde türkmen halkynyň medeniýetini, taryhyny we milli gymmatlyklaryny görmek bolýar. Türkmen suratkeşleriniň eserleri serginiň aglaba bölegini eýeländigini bellemelidiris.
Çünki onda Türkmenistanyň Suratkeşler birleşiginiň agzalarynyň 60-dan gowrak işleri sergilendi.
Halkara çärede Çarymyrat Ýazmyradow, Gülälek Esenowa, Baýramdurdy Nuryýew, Wepa Gurdow, Habiba Nabiýewa, Aýgözel Çakanowa, Azat Myradow, Gunça Myradowa, Toýly Çopanow, Zakirjan Babaýew, Rüstem Haýytmyradow, Rustam Abdullaýew, Mämmet Ýarmämmedow, Gülnäz Rozykulowa, Muhammet Babaýew, Akmyrat Rozyýew, Işanguly Işangulyýew, Şemşat Mämmedowa, Öwez Akmuhammedow, Gurban Babatäjow, Hojamuhammet Çüriýew, Derýa Mämmetgulyýew ýaly ussat suratkeşleriň işleri sergilendi.
Bu serginiň «International Action Art Club UNESCO» halkara guramasy tarapyndan geçirilendigini bellemelidiris. Bu gurama, gadymy we häzirki zaman medeniýetini gorap saklamak, dikeltmek, wagyz etmek, medeni maglumatlary erkin alyş-çalyş etmek maksady bilen 2010-njy ýylda döredildi.
Türkmenistan hem bu halkara guramanyň bir bölegi bolup, «International Action Art Club UNESCO-nyň» Türkmenistan bölüminiň ýolbaşçysy suratkeş we sungat dizaýneri Gülalek Esenowadyr. Gresiýada türkmen suratkeşleriniň çeken suratlarynyň sergisi «International Action Art Club UNESCO-nyň» Türkmenistan bölüminiň hem-de ýurdumyzyň Suratkeşler birleşiginiň goldaw bermegi netijesinde geçirildi.
