RUSSIÝANYŇ SIRK USSATLARYNYŇ SAPARY TAMAMLANDY
Russiýanyň döwlet sirkiniň Wernadskiý şaýolundaky Moskwanyň uly döwlet sirkiniň we «Московский цирк Никулина на Цветном бульваре» we «Galkynyş» milli at üstündäki oýunlar toparynyň artistleriniň bilelikdäki çykyşlaryna ýurdumyzda uly höwes bilen tomaşa edildi.
Dostlukly ýurduň sirk ussatlarynyň öz türkmen kärdeşleri bilen Arkadag şäheriniň Görogly adyndaky döwlet atçylyk sirkinde, Türkmenistanyň döwlet sirkinde, Daşoguz, Lebap, Mary we Balkan welaýatlarynyň «Türkmeniň ak öýi» binalarynda görkezen çykyşlary tomaşaçylary gadymy sungatyň täsinlikleri bilen tanyşdyrdy.
Ýakynda bolsa, Russiýanyň sirk ussatlarynyň sapary tamamlanyp, artistler öz dogduk mekanyna dolandylar. Şeýle hem olar sosial sahypalarynda Türkmenistana we halkyna öz çäksiz hoşallyklaryny bildirdiler.
