Türkmenistan «Kitap Duşenbe — 2023» halkara kitap sergisine gatnaşýar
Şu ýylyň 3-5-nji oktýabry aralygynda Täjigistan Respublikasynyň Duşenbe şäherinde «Kitap Duşenbe-2023» atly 11-nji halkara kitap sergisi geçirilýär. Serginiň işine Täjigistanda akkreditirlenen diplomatik korpus bilen bir hatarda Türkmenistanyň Ilçihanasy milli öwüşgünde bezelen öz kitap diwarlygy bilen gatnaşýar.
Türkmenistanyň Daşary işler ministrliginiň resmi web saýtynda habar berlişi ýaly, halkara kitap sergisinde Garaşsyz, hemişelik Bitarap Türkmenistanyň daşary we içeri syýasatyna, şeýle hem döwletiň garaşsyzlyk ýyllarynda gazanan üstünliklerine bagyşlanan kitaplar we neşirler hödürlenýär.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň eserleri sergide aýratyn orun eýeleýär. Türkmenistanyň kitap diwarlygynda baý, köptaraply türkmen medeniýeti, taryhy we sungaty barada beýan edilýän çeper eserler, ylmy eserler we döwürleýin neşirler hem görkezilýär.
Çeşmäniň habar bermegine görä, halkara serginiň çäklerinde Ilçihana tarapyndan Türkmenistan bilen Täjigistan Respublikasynyň arasynda diplomatik gatnaşyklaryň ýola goýulmagynyň 30 ýyllygyna bagyşlanyp neşir edilen ýörite žurnalyň tanyşdyrylyş dabarasy geçirildi. Tanyşdyrylyş dabarasyna Täjigistanyň medeniýet ministrliginiň, Milli kitaphanasynyň, Milli muzeýiniň ýolbaşçylary, Duşenbede işleýän diplomatik korpusyň wekilleri, şeýle-de talyp ýaşlar we jemgyýetçilik wekilleri gatnaşdylar.