«Aşgabat» kinoteatrynda tatar filmleri görkezildi
Türkmenistanda geçirilýän Russiýa Federasiýasynyň Tatarystan Respublikasynyň Medeniýet günleriniň çäginde paýtagtymyzdaky «Aşgabat» kinoteatrynda» tatarystanly kino sungatynyň bilermenleri bilen «Oguzhan» adyndaky Türkmenfilm birleşiginiň hünärmenleriniň arasynda duşuşyk geçirildi.
Duşuşygyň barşynda iki ýurduň hem kino sungatynyň ussatlary ýurtlaryň arasyndaky medeni hyzmatdaşlygy pugtalandyrmak barada özara pikir alyşdylar. Şeýle-de soňky ýyllarda Türkmenistanda we Tatarystan Respublikasynda surata düşürilen filmler barada belläp geçdiler. Geljek ýyllarda hem iki ýurduň arasynda kino sungatyny ösdürmek bilen bagly birnäçe meseleler barada bellediler.
Kino sungatynyň ussatlarynyň duşuşygyndan soňra «Aşgabat» kinoteatrynyň kino zalynda «Ibn Fadlan» we «Tarlan» tatar filmleriniň görkezilişi boldy. Oňa Aşgabat şäheriniň ýaşaýjylary we myhmanlary, ýokary okuw mekdepleriň professor-mugallymlary we talyp ýaşlary, medeniýet we sungat işgärleri, jemgyýetçilik guramalarynyň, köpçülikleýin habar beriş serişdeleriniň wekilleri gatnaşdylar.
Gyzykly pursatlary, täsirli wakalary beýan edýän tatar filmleri oňa tomaşa etmäge gelen myhmanlarda ýakymly täsir galdyrdy.
