Türkmen wekiliýeti Pekinde geçiriljek «Maddy däl medeni miras hepdeligi» atly halkara sergä we maslahata gatnaşar
2023-nji ýylyň 22 — 25-nji oktýabry aralygynda Hytaý Halk Respublikasynyň Pekin şäherinde «Maddy däl medeni miras hepdeligi» atly halkara sergi we maslahat geçiriler.
Bu halkara sergä we maslahata dünýäniň birnäçe ýurdundan myhmanlar, şol sanda Türkmenistan döwletimizden hem ýörite wekiliýet gatnaşar. Has takygy, Türkmenistanyň Medeniýet ministrliginiň Maddy däl medeni miras müdirliginiň başlygy Gözel Magtymgulyýewa hem-de «Mähirli zenan» hususy kärhanasynyň esaslandyryjysy we direktory Aýna Durdylyýewa gatnaşar. Ildeşlerimiz halkara sergä we maslahata gatnaşmak üçin 21 — 26-njy oktýabr aralygynda Hytaý Halk Respublikasynda iş saparynda bolarlar.
Pekinde geçiriljek halkara serginiň we maslahatyň dowamynda türkmen wekiliýeti oňa gatnaşýan myhmanlary türkmen halkynyň baý geçmiş mirasyndan söz açýan milli gymmatlyklary we türkmen gelin-gyzlarynyň milli lybaslary, şol sanda el işleriniň dürli görnüşleri bilen tanyşdyrarlar.