Türkmenistanyň Bazar Amanow adyndaky döwlet çagalar kitaphanasynyň hünärmeni Aşgabat şäheriniň daşary ýurt dillerini çuňlaşdyryp öwretmäge ýöriteleşdirilen № 52-nji orta mekdebinde şol mekdebiň kitaphanaçysy we başlangyç synp okuwçylary bilen «Adam edebinden tanalar...» atly temada söhbetdeşlik geçirdi. Edep-terbiýäniň ilkinji düzgünleri maşgalada öwredilýär. Çaganyň bir ganaty–edep, beýleki ganaty–ylym, bilim bolmalydyr. Çaga terbiýesinde esasy zat jemgyýetde–adam gatnaşygynda abraýly, edepli, il-güne haýyrly şahsyýet bolup, ýetişmegini gazanmakdyr. Çagalarda esasy zat bilimlilik we edep-terbiýelilik mahsus hasaplanýar. Hünärmen çagalar bilen söhbetdeşlikde edep-terbiýe barada türkmen halk ertekilerinden hem sorag-jogap alyşdy. Şeýle hem ata-babalarymyzdan galan, gowy gylyk-häsiýetleri ündeýän nakyllar we atalar sözünden birnäçesini aýdyp berdi. «Düýe ýaly altynyň bolandan, düwme ýaly akylyň bolsun», «Hünärli ýigit hor bolmaz», «Halal işle–haýyr tap», «Ýortan ozar, ýatan tozar» diýen ýaly ajaýyp sözleriň adam edebinde, häsiýetinde gowulyga tarap özgermäge uly ähmiýete eýedigini düşündirdi. Söhbetdeşligiň dowamynda mekdep okuwçylary edep-terbiýe hakynda türkmeniň görnükli çagalar şahyrlary Azat Rahmanow, Kaýum Taňrygulyýew, Bazar Şalyýew, Hemra Şirowyň goşgularyndan uly höwes bilen aýdyp berdiler.
Söhbetdeşligiň soňunda biziň ýaş nesillerimiz üçin döredilip, berilýän giň mümkinçilikler üçin türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza alkyş sözleri aýdyldy.
