Aşgabat şäher medeniýet müdirliginiň Merkezleşdirilen kitaphanalar ulgamynyň Ata Salyh adyndaky kitaphana şahamçasynyň guramagynda Beýik Ýeňişiň 80 ýyllygy mynasybetli «Halk hakydasy» ýadygärlikler toplumynda «Adyňyz hiç öçmez eziz gerçekler» ady bilen söhbetdeşlik geçirildi.
Söhbetdeşlikde Ýeňiş güni parahatçylykly, abadan we bagtyýar durmuşy alamatlandyrýan iň gymmatly we mukaddes bolup, tutuş adamzat üçin aýratyn ähmiýete eýedigi, üstünden ençeme ýyllar geçendigine garamazdan, uruş ýyllarynyň agyr ýitgileri baradaky hasratly ýatlamalar dünýä halklarynyň, şol sanda türkmen halkynyň hakydasynda baky ýaşaýandygy barada söhbet etdiler. Şeýle-de Beýik Watançylyk urşy ýyllarynda gahrymanlarça söweşen millionlarça adamlaryň parahatçylyk we asudalyk, abadan durmuş ugrundaky aldym-berdimli söweşlerde belent ahlak sypatlaryny, edermenligiň, gaýduwsyzlygyň hem-de hakyky watançylygyň ajaýyp nusgalaryny görkezendikleri, ata-babalarymyzyň bu şöhratly, gahrymançylykly ýoly Watanymyzyň taryhyna altyn harplar bilen ýazylandygy barada giňişleýin beýan etdiler.
Söhbetdeşligiň ahyrynda bizi asuda, abadan, parahat durmuşda ýaşadýan türkmen halkynyň Milli Lideri Gahryman Arkadagymyza, Arkadagly Gahryman Serdarymyza alkyş sözlerini beýan etdiler.
