Türkmenistanyň Bazar Amanow adyndaky döwlet çagalar kitaphanasy ýakynda 76-njy orta mekdepde «Asuda Watanyň goragynda» ady bilen Watan goragçylarynyň gününe bagyşlap söhbetdeşlik duşuşygyny geçirdi. Söhbetdeşligiň başynda kitaphana hünärmeni Gahryman Arkadagymyzyň «Mertler Watany beýgeldýär», «Mert ýigitler gaýrat üçin dogulýar» we «Döwlet guşy» atly gymmatly eserlerinde beýan edilýän watançylyk ýaly beýik düşünje we olaryň ýaş nesilleri terbiýelemekdäki ähmiýeti dogrusynda gyzykly gürrüňler berdi. Ýurt goragçylarynyň sarpasynyň belentden dabaralanýanlygy barada hem buýsançly söhbetler edildi.
Söhbetdeşligiň ahyrynda oňa gatnaşanlar Watan mukaddesligini, keremli topragymyzyň goragyny ähli zatdan ileri tutýan türkmen halkynyň Milli Lideri Gahryman Arkadagymyzyň, hormatly Prezidentimiziň Arkadagly Gahryman Serdarymyzyň belent başlarynyň aman bolmagyny, döwletli tutumlarynyň rowaç almagyny arzuw etdiler.
