Azerbaýjan Respublikasynyň Türkmenistandaky Medeniýet günleriniň ilkinji gününde Türkmenistanyň Şekillendiriş sungaty muzeýinde «Azerbaýjanyň milli mirasynyň merjeni» atly serginiň açylyş dabarasy boldy. Sergide Azerbaýjanyň Milli haly muzeýiniň ýygyndysyndan çitme hem-de kakma usulynda ýerine ýetirilen dokma önümleri, metaldan ýasalan bezeg önümleri, keşdeler, başgaplar, dürli görnüşli nagyşlaryň nusgalary görkezilýär.
Sergide halylar bilen birlikde gündelik durmuşda giňden ulanylýan horjun we çuwal ýaly önümler hem görkezilýär. Bu eserleriň bezegine öwrülen nagyşlar many-mazmuny we reňk taýdan baýlygy bilen tapawutlanýar. Misden kakma we oýma usuly bilen ýerine ýetirilen gaplary, hammam sandyklary, serpuş, satyl ýaly metal önümleri pähim-paýhasly sözler, kalligrafik ýazgylar bilen bezelipdir. Şeýle-de bu ýerde azerbaýjan milli egin-eşikleriniň tanyşdyryş dabarasy hem boldy. Azerbaýjan milli egin-eşikleriniň döwrebap nusgalarynda taýýarlanan görnüşleri tomaşaçylarda ýatdan çykmajak täsirleri galdyrdy.
