Hormatly Prezidentimiziň parasatly baştutanlygynda ýaş nesilleri ylymly-bilimli, hünärli edip ýetişdirmek, olaryň dünýä ylymlaryna çuňňur aralaşmagyna giň ýol açmak esasy üns merkezine öwrüldi. Türkmenistanda kitaphana ulgamyny ösdürmegiň 2025-2029-njy ýyllar üçin Döwlet maksatnamasyndan ugur alyp Türkmenistanyň Döwlet medeniýet merkeziniň Döwlet kitaphanasynyň Medeni köpçülik işleri bölümi Aşgabat şäherinde ýerleşýän 165-nji çagalar bagynda “Bagtyýar çagalar ak ertirlerimiziň eýeleri” ady bilen körpejeleriň arasynda sesli okaýyş çäresi, söhbetdeşlikler geçirildi we kitap sergisi gurnaldy.
Kitaphana işgärleri ýaş nesilleriň arasynda watansöýüjilik hakynda, terbiýe hakynda, kitaba bolan söýgi temasynda giňişleýin wagyz etdiler. Kitap sergisindäki ýerleşdirilen kitaplar bolsa körpejeleriň ünsüni özüne çekdi. Guralan söhbetdeşligiň ahyrynda bizi şeýle ajaýyp durmuşda ýaşadýan Berkarar diýarymyzy jenneti mekana öwürýän Gahryman Arkadagymyzyň, Arkadagly Gahryman Serdarymyzyň janlarynyň sag, ömürleri uzak bolmagyny arzuw etdiler.
