Döwür uçdy, döwran uçdy, biz uçduk,
Ykballaň ýagtylan ýalkymna duşduk.
Bitaraplyk bilen dünýäni guçduk,
Bedew — şan-şöhratyň,
Garaşsyz Watan!
Gez şygary ýyllaryňa çaglaýyp,
Ak ýollarda ýüzseň ganat baglaýyp.
Men otursam guwanjymdan aglaýyp,
Bedew — şan-şöhratyň,
Garaşsyz Watan!
Watanyň gül görki hem durky başga,
Diýýärin özüme: Sözi taraşla!
Dogmundan don geýen Zürýatlar başda,
Bedew — şan-şöhratyň,
Garaşsyz Watan!
Mertler bilen döredýänsiň,gurýansyň,
Eneleriň dileginde birýansyň.
At deý ýyndamlykda öňe barýansyň,
Bedew — şan-şöhratyň,
Garaşsyz Watan!
Guwanmakda, buýsanmakda ganatdyr,
Erteki hem şu zeýilli halatdyr.
Döwletli döwranyň goýny rahatdyr,
Bedew — şan-şöhratyň,
Garaşsyz Watan!
Günleriňde, ýyllaryňda täzelik,
Durşuny binalaň ünüse gelip.
Ykbalmyz ýalkandyr Danasyn berip,
Bedew — şan-şöhratyň,
Garaşsyz Watan!
Baryny bar eýläp bilýän beýikdir,
Gül Diýarym toý donuny geýipdir.
Eşret eýýam ykballara gelipdir,
Bedew — şan-şöhratyň,
Garaşsyz Watan!
Seni beren Gudrata tagzymym,
Arkadagyň pendi ömre taglymym.
Arkadagly Serdar — düri tarypyň,
Bedew — şan-şöhratyň,
Garaşsyz Watan!
Ýylymyza ýalkym saçar şygaryň,
Bady bilen dal bedewleň — Byragyň.
Türkmenistan, ömür bize öz baryň,
Bedew — şan-şöhratyň,
Garaşsyz Watan!
Gözel ŞAGULYÝEWA,
Türkmenistanyň Gahrymany
