Aşgabat şäher medeniýet müdirliginiň Merkezleşdirilen kitaphanalar ulgamynyň Ýeňiş kitaphana şahamçasynyň guramagynda Türkmenistanyň Inžener-tehniki we ulag kommunikasiýalary institutynda «Bitaraplyk parahatçylygyň we ynanyşmagyň ýoludyr» ady bilen söhbetdeşlik geçirildi.
Söhbetdeşlikde çykyş edenler ýurdumyzda mizemez gymmatlygymyz we durmuşymyzyň aýrylmaz bölegi hasaplanýan hemişelik Bitaraplygymyz halkymyzy ýagty geljege alyp barýandygyny, Bitaraplyk halkymyzyň asylly häsiýetleriniň, milli aýratynlyklarynyň, däp-dessurlarynyň, dünýägaraýşynyň, hoşniýetliliginiň beýanydygy barada gürrüň berdiler. Şeýle-de Bitaraplyk türkmen döwletiniň geçmişiniň, şu gününiň we geljeginiň arasyndaky özboluşly köprüdigini we ol milletiň bütin ruhy, durmuşynyň yzygiderli ösüşiniň netijesidigini buýsanç bilen belläp geçdiler.
Söhbetdeşligiň ahyrynda dünýä ýüzünde parahatçylygy, durnuklylygy we asudalygy pugtalandyrmakda uly tagallalary edýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.
