Türkmenistanyň Döwlet medeniýet merkeziniň Döwlet kitaphanasyna Maýa Kulyýewa adyndaky Türkmen milli konserwatoriýasynyň talyplarynyň we mugallymlarynyň gezelenji guraldy. Olar Döwlet kitaphanasynyň bölümleri bilen tanyşdylar. Sungat bölüminiň işi bilen olar aýratyn gyzyklandylar. Bu bölümiň hazynasy sungata degişli kitaplardan, döwürleýin neşirlerden, notalardan, audiowizual neşirlerden ybaratdyr. Şeýle hem, türkmen kompozitorlarynyň we daşary ýurt kompozitorlarynyň nota eserleriniň baý hazynasy bar. Döwlet kitaphanasynyň Sungat bölüminiň okyjylara edýän kitaphana hyzmatynyň ýene bir aýratynlygy, ýekebara ýa-da topar bolup görmek hem-de diňlemek üçin audiowizual neşirleriniň fonotekasyna eýedir. Okyjynyň islegine görä, bölümiň hazynasynda saklanýan ses ýazgylaryndaky, plastinkalardaky bar bolan sazlary saýlap, häzirki döwrebap tehniki enjamlarda diňlemäge döredilen mümkinçiliklerden peýdalanyp, talyplar kompozitorlarymyzyň sazlaryny höwes bilen diňlediler. Döwlet kitaphanasynyň Sungat bölümi tarapyndan guralan gezelenç hem-de kitaphanadaky sergiler talyplarda we mugallymlarda uly täsir galdyrdy.
