Türkmenistanyň Döwlet medeniýet merkeziniň Döwlet kitaphanasynyň Oba hojalyk edebiýatlar bölümi tarapyndan Aşgabat şäherinde ýerleşýän 83-nji çagalar bakja-bagynyň körpeleriniň arasynda “El hünäri-il gezer” atly söhbetdeşlik we göçme kitap sergisi gurnaldy. Kitaphana işgärleri körpe gyzlara milliligimiz bolan el keşdeleriniň her biriniň aňladýan manysyny, nagyşly joraplaryň dokalyşyny, şeýle-de älemgoşar reňkli sapaklaryň reňkleriniň boýalyş aýratynlyklaryny birnäçe rowaýatlaryň üsti bilen gürrüň berdiler. Mundan başga-da, kitaphanaçylar körpelere ertekili kitaplary köp okamaklygyň ähmiýetini düşündirip, ertekileriň gahrymanlarynyň batyrgaýlyk, edermenlik, bir sözlülik ýaly gowy häsiýetlerini özlerine siňdirýändikleri hakynda gürrüň berdiler. Söhbetdeşligiň dowamynda körpeleri sergilenen neşirler bilen tanyş etdiler hem-de birnäçe türkmen halk ertekilerini okap berdiler.
