Berkarar döwletiň täze eýýamynyň Galkynyşy döwründe gözbaşyny asyrlaryň jümmüşinden alyp gaýdan milli mirasymyza goýulýan sarpa has-da belende göterilýär. Türkmenistanyň Döwlet medeniýet merkeziniň Mukamlar köşgünde Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşigiň çäklerinde dutarçy bagşy-sazandalaryň arasynda yglan edilen “Çalsana, bagşy!” bäsleşiginiň jemleýji tapgyry geçirildi. Bäsleşigiň çäklerinde Türkmenistanyň Şekillendiriş sungaty muzeýi, muzeý gymmatlyklaryndan düzülen göçme sergisini gurnady. Sergide türkmen aýdym-saz sungatynda öçmejek yz goýan halypalaryň portret žanrynda ýerine ýetirilen eserleri sergä gelen myhmanlarda uly täsirleri galdyrdy.
