Berkarar döwletiň täze eýýamynyň Galkynyşy döwründe Gahryman Arkadagymyzyň we Arkadagly Gahryman Serdarymyzyň saýasynda milli medeniýetimizi we sungatymyzy ösdürmek, sungat ulgamynyň hünärmenlerini döredijilikli işlemäge ruhlandyrmak ugrunda tutumly işler alnyp barylýar. Ýurdumyzyň ýörite sazçylyk we sungat ugurly okuw mekdeplerinde okaýan talyplaryň arasynda geçirilýän bäsleşikler saz sungatyna höwesli zehinli ýaşlary ýüze çykarmakda Gahryman Arkadagymyzyň, Arkadagly Gahryman Serdarymyzyň taýsyz tagallalary biz ýaşlary diýseň buýsandyrýar.
Ýakynda, Maýa Kulyýewa adyndaky Türkmen milli konserwatoriýasynyň «Halk saz gurallary» kafedrasynyň hepdeliginiň çäklerinde «Halk saz gurallary» kafedrasynyň talyplarynyň arasynda «Halk sazym – ýürek owazym» atly bäsleşik geçirildi. Bu bäsleşigiň I tapgyrynda 9 sany topar ýykyş etdiler.
Olar: uly mugallymy Halow Muhammetkulyýewiň ýolbaşçylygyndaky «Altyn Asyr», mugallym Ýagşymyrat Täjimuradowyň ýolbaşçylygyndaky «Joşgun», uly mugallymy Aýjemal Jumaýewanyň ýolbaşçylygyndaky «Bagtyýarlyk mukamy», uly mugallym Ýakupmyrat Sytdyhowyň ýolbaşçylygyndaky «Owaz», uly mugallym Omar Igamowyň ýolbaşçylygyndaky «Şirwan», uly mugallym Muhammet Gapurowyň ýolbaşçylygyndaky «Miras», mugallym Baýramgül Amangeldiýewanyň ýolbaşçylygyndaky «Mukam», mugallym Rahymberdi Hojageldiýewiň ýolbaşçylygyndaky «Galkynyş», we mugallym Irina Şelehowanyň ýolbaşçylygyndaky «Ýaşlyk» toparlary gatnaşdylar. Bäsleşigiň düzgünnamasyna laýyklykda halk saz gurallaryndan düzülen ansambl toparlary özara bäsleşdiler.
Bäsleşigiň I tapgyrynda her ansambl häsiýeti boýunça dürli görnüşde iki sany eserlerini ýerine ýetirdiler. Ýagny, 1-nji ýerine ýetirilen eser türkmen kompozitorlarynyň eseri, 2-nji eser bolsa ansambl toparynyň özüne laýyklykda saýlan eserini ýerine ýetirdiler. Emin agzalarynyň netijeleri boýunça I tapgyrda iň gowy çykyş eden ansambl toparlar II tapgyra geçirildi. Olar: «Miras», «Mukam», «Ýaşlyk», «Galkynyş», «Şirwan» hem-de «Owaz» toparlary II tapgyrda çykyş etmäge hukuk gazandylar.
Bäsleşigiň II tapgyrynyň şerti boýunça ansambl toparlary konsert eserini ýa-da ýerine ýetirilişi boýunça we tehniki tarapdan çylşyrymly eserler boýunça bäsleşdiler. II tapgyrda «Miras» topary türkmen halk sazy «Durdy bagşy», «Mukam» topary S.Oganesýanyň «Fantaziýa №1», «Galkynyş» topary A.Piazzollanyň «Escualo», «Şirwan» topary A.Wiwaldiniň «Tomus» II–III bölümleri, hem-de «Owaz» topary Hamid Wekilow «Konsert» eserleri boýunça çykyş etdiler. Bäsleşikde emin agzalarynyň netijelerine görä I oruna «Owaz» we «Ýaşlyk» toparlary, II oruna «Şirwan» we «Galkynyş» toparlary, III oruna «Mukam» we «Miras» toparlary baýrakly orunlara mynasyp boldylar.
Bäsleşigiň netijeleri beýan edilenden soňra, ýeňiş gazanan ansambl toparlaryň ýolbaşçylary we gatnaşan ähli talyplar ýadygärlik surata düşdiler.
Türkmen halkynyň Milli Lideri Gahryman Arkadagymyza we peder ýoluny mynasyp dowam etdirýän Arkadagly Gahryman Serdarymyza biz ýaşlaryň kämil derejede ylymly-bilimli bolmagy, öz zehinimizi açyp görkezmäge uly mümkinçilikleri döredip berýänligi üçin edýän atalyk aladalary üçin sagbolsunymyzy aýdýarys.
Osman SAPARGELDIÝEW
Maýa Kulyýewa adyndaky Türkmen milli konserwatoriýasynyň «Halk sazy» fakultetiniň V ýyl talyby
