«Halkara parahatçylyk we ynanyşmak» ýylynda Türkmenistanyň Çeperçilik sergiler müdirligi we şekillendiriş sungatynyň sergi merkeziniň Sergi jaýynda Türkmenistanyň Suratkeşler birleşiginiň agzasy, suratkeş Nuriddin Niýazowyň 75 ýaşynyň dolmagy mynasybetli “Ýer şary–biziň öýümiz” atly şahsy döredijilik sergisi geçirildi.
Sergide, Nuriddin Niýazowyň “Beýik Ýüpek ýoly” 2016ý., “Bütindünýä howa üýtgemeleri” 2013ý., “Kerki güzeri” 2025 ý., “Döredijiligiň 8-nji güni” 2012ý., “Durmuş filosofiýasy” 2012ý., “Iki taraplaýyn portret” 2011ý., “Oglumyň portreti” 1983ý., “Iýermeniň portret” 2019ý., “Kerwen” 2017ý., “Abadanlaşýan çöl” 2017ý., “Güýz, durnalar” 2016ý.,“Magtymgulynyň poeziýa dünýäsi ” 2015ý., “Garry gyz” 2013ý., “Magtymgulynyň düýşi” 2004ý., “Aral” 1987ý. ýaly sungat eserleri ýaýbaňlandyryldy.
Nuriddin Niýazowyň döreden sungat eserleriniň ählisinde nakgaşçylyk sungatynyň seýrek duş gelýän ugry bolan surrealizm akymyna eýerilýär. Suratkeşiň döredijiliginde merdana ruhy sütünlerimiz, buýsançly taryhymyz, gözel tebigatymyz çeper beýan edilýär. Nakgaşçylyk taslamalaryň reňk çözgütleri özüniň baýlygy, akymlaryň täsirleri sungat eserleriň ählisinde içgin duýulýar.
Halypa suratkeşiň eserlerinde ýeňil bolmadyk şekillendiriş sungatynyň bu ugurynyň ajaýyplygyny görmek bolýar. Sungat eserleri göýäki janly ýaly sungatyň dilinde türkmen dünýäsi barada söhbet açýar. Nakgaş eserleriniň aýratynlyklaryny we talaplaryny doly özleşdiren halypa şägirtleriniň arasynda hem halypa-şägirtlik ýoluny dowam edýär. Bu sünnälenilen görnüşler, işler, usullar bolsa şägirtleriniň işinde halypanyň belentligini ýüze çykarýar.
Halypa suratkeş Nuriddin Niýazowyň döreden sungat eserleri ýurdumyzyň şekillendiriş sungaty uguryndan bilim alýan ýaşlar üçin we sungaty öwrenijiler üçin uly mirasdyr. Sergide Suratkeşiň 70-den gowrak nakgaş eserleri görkezilýär.
Sergi öz işini 10 gün dowam eder
