Berkarar döwletiň täze eýýamynyň Galkynyşy döwründe Gahryman Arkadagymyzyň hem-de Arkadagly Gahryman Serdarymyzyň taýsyz tagallalary netijesinde ähli ugurlar bilen bir hatarda milli medeniýetimizi we sungatymyzy ösdürmek ugrunda tutumly işler alnyp barylýar. Ýurdumyzda aýdym-saz sungatyna höwesli zehinleri ýüze çykarmak, ýaşlaryň döredijilik ukybyny açyp görkezmek maksady bilen birnäçe çäreler durmuşa geçirilýär.
Ýakynda Maýa Kulyýewa adyndaky Türkmen milli konserwatoriýasynda “Estrada sungaty” kafedrasynyň hepdeliginiň çäklerinde “Karaoke” atly bäsleşik geçirildi. Bäsleşige Ahal welaýat ýörite sungat mekdebiniň, Sahy Jepbarow adyndaky Arkadag şäher ýörite sungat mekdebiniň we Maýa Kulyýewa adyndaky Türkmen milli konserwatoriýasynyň talyplaryndan düzülen toparlar gatnaşyp özara bäsleşdiler.
Bäsleşik üç tapgyrda geçirildi. Oňa gatnaşýan toparlar bäsleşigiň düzgünlerine laýyklykda türkmen we daşary ýurt estrada aýdymlaryny ussatlyk bilen ýerine ýetirdiler. Çekeleşikli geçen bäsleşige gatnaşyjylaryň diňe bir aýratynlykda ses ukyby däl-de, eýsem, aýdymy toparlaýyn ýerine ýetirijilik ussatlygy hem emin agzalary tarapyndan bahalandyryldy.
Bäsleşigiň ahyrynda netijeler jemlenip, ýeňiji toparlar şowhunly el çarpyşmalar astynda yglan edildi.
Bäsleşige gatnaşanlar milli aýdym-saz sungatymyzy ösdürmekde, ýaşlaryñ zehinlerini doly açyp görkezmekde döredip berýän giň mümkinçilikleri üçin Gahryman Arkadagymyzyň, Arkadagly Gahryman Serdarymyzyň janlarynyň sag bolmagyny, il-ýurt bähbitli, umumadamzat ähmiýetli alyp barýan işleriniň hemişe rowaçlyklara beslenmegini arzuw etdiler.
Abadan MEREDOWA
Maýa Kulyýewa adyndaky Türkmen milli konserwatoriýasynyň 4-nji ýyl talyby
