Mary welaýat kitaphanasynyň «Hyzmat ediş» bölümi tarapyndan kitaphananyň okalga otagynda kitaphanamyza Ýaponiýanyň Türkmenistandaky ilçihanasy tarapyndan sowgat berlen kitaplaryndan sergi gurnaldy.
Sergide goýlan sowgatlyk kitaplar Ýaponiýanyň taryhy, medeniýeti, edebiýaty hakyndaky iňlis dilinde çap edilen kitaplardyr. Biz kitaphana hünärmenleri bu kitaplar bilen öz okyjylarymyzy tanyşdyrdyk. Daşary ýurt kitaplaryndan peýdalanmak, öwrenmek, tanyşmak isleýän okyjylarymyza kitaplary açyk gaznadan alyp peýdalanmak mümkinçiliginiň bardygyny düşündirdik.
Kitaplar bilimleriň egsilmez çeşmesidir, adamzadyň asyrlar boýy döreden ruhy baýlygydyr. Kitaplardan we beýleki metbugat eserlerinden köpçülikleýin peýdalanmagy guramakda medeni aň-bilim edaralarynyň esasy görnüşlerinden birisi bolan kitaphanalara uly orun degişlidir. Kitaphanalar, olaryň ilat arasynda kitaby ýaýratmak baradaky alyp barýan işleri umumy medeniýetiň aýrylmaz bir bölegidir.
Biz kitaphana hünärmenlerine işlemäge, zähmet çekmäge döredip berýän mümkinçilikleri üçin Türkmen halkynyň Milli Lideri Gahryman Arkadagymyza we hormatly Prezidentimiz Arkadagly Gahryman Serdarymyza çäksiz sagbolsunmyzy aýdýarys. Goý, olaryň jany sag, ömürleri uzak, il-ýurt bähbitli tutumly işleri elmydama rowaç alsyn!
