Garaşsyz, hemişelik Bitarap Türkmenistan Watanymyzyň her bir güni toýdur baýramlara beslenýär. 2026-njy ýyl “Garaşsyz, baky Bitarap Türkmenistan bedew batly at-myradyň mekany’’ ýylynda Maýa Kulyýewa adyndaky Türkmen milli konserwatoriýasynda okaýan talyplaryň arasynda ýerine ýetirijilik, dirižýorlyk etmek, sazşynaslyk we kompozisiýa ugurlary boýunça “Konserwatoriýanyň zehinleri – 2026” atly bäsleşik geçirildi. Geçirilen bu bäsleşigiň esasy maksady ýurdumyzyň saz sungatyna höwesli, zehinli ýaşlary ýüze çykarmak, olary saz sungatynyň dürli ugurlary boýunça döredijilige höweslendirmek hem-de zehinli sazandalaryň professional derejesini ýokarlandyrmak bolup durýar. Bäsleşigiň açylyş dabarasy bije çekmeklik arkaly badalga berildi. Çekeleşikli geçen bäsleşik 2 tapgyrdan ybarat boldy. Eminler toparynyň netijesi esasynda 1-nji tapgyrda saýlanan talyplar 2-nji tapgyra gatnaşmaga mümkinçilik gazandylar we olaryň içinden iň ökdeleri “KONSERWATORIÝANYŇ ZEHINLERI – 2026” atly bäsleşigiň ýeňijileri diýlip yglan edildi. Bäsleşige jemi 278 talyp gatnaşyp, olardan I orna 12 sany, II orna 18 sany, III orna 23 sany, hormat hatyna 32 sany zehinli talyplar mynasyp boldular. Bäsleşik ýeňijilere diplomlar, hormat hatlar hem-de Türkmenistanyň Magtymguly adyndaky Ýaşlar guramasy tarapyndan gymmat bahaly ýadygärlik sowgatlarynyň gowşurylmagy bilen jemlendi. Bäsleşige gatnaşyjylar öz zehinlerini has-da kämilleşdirmek maksady bilen döredilip berilýän mümkinçilikleri üçin hormatly Prezidentimize çäksiz hoşallyklaryny beýan etdiler.
Türkmen halkynyň hak howandarlary Milli Liderimiz Gahryman Arkadagymyzyň, Arkadagly Gahryman Serdarymyzyň janlarynyň sag bolmagyny, il-ýurt bähbitli tutumly işleriniň elmydama rowaçly ýollarda rowana bolmagyny tüýs ýürekden arzuw edýäris!
Aýna ÇARYÝEWA,
Maýa Kulyýewa adyndaky Türkmen milli konserwatoriýasynyň “Sazşynaslyk” hünäriniň I ýyl talyby
