«Halkara parahatçylyk we ynanyşmak» ýylynda Maýa Kulyýewa adyndaky Türkmen milli konserwatoriýasynda «Konserwatoriýanyň zehinli ýaşlary» atly saz festiwaly dowam edýär. Ýakynda hem “Saz mugallymy” kafedrasynyň mugallym- öwreniji Suraý Kubyýewanyň ýekelikdäki konserti geçirildi. Konserte Maýa Kulyýewa adyndaky Türkmen milli konserwatoriýasynyň talyp ýaşlary we halypa mugallymlary gatnaşdylar. Konsert mugallymynyň ýerine ýetirmeginde, Maýa Beýmanowanyň sazandarlyk etmeginde operalaryň ariýalary J.Puççini “Turandot” operasyndan Liunyň ariýasy, J.Werdi “Bal-Maskarad” operasyndan Oskaryň aýdymy bilen başlandy.
Festiwalyň çäginde geçirilýän konsertiň dowamynda özüniň mylaýym sesi, owazy bilen türkmen aýdymlary R.Gutlyýewiň sazyna, Mollanepesiň sözlerine “Gitdim”, “Galmanam” türkmen halk aýdymyny, N.Halmämmedowyň sazyna, Mollanepesiň sözlerine “Tilden uýalar”, A.Esedowyň sazyna, T.Gurbanowyň sözlerine “Armanly”, K.Annanepesowyň sazyna, A.Annadurdyýewiň sözlerine “Haly dokaýan läläm”, Ç.Nurymowyň sazyna, I.Nuryýewiň sözlerine “Duşurmazmy” aýdymlaryny birkemsiz ýerine ýetirip, dabara gatnaşýanlarda uly hyjuw, ylham döretdi. Konsertde diňe bir fortepiano saz guralynyň sazandarlyk etmeginde däl-de, eýsem, Mergen Astanowyň türkmeniň dutar saz guralynda sazandarlyk etmeginde “Parahatlyk guşy” atly ajaýyp aýdymy konsertiň soňunda örän täsirli ýerine ýetirilip, şowly tamamlandy.
Şeýle ajaýyp konsertleriň, saz festiwallarynyň, bäsleşikleriň yzygiderli geçirilmegi biz ýaşlaryň zehinlerini kämilleşdirmäge, höweslerini has-da artdyrmaga uly itergi berýär. Bize şeýle uly mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag, tutýan tutumly işleri mundan beýläkde rowaçlyklara beslensin.
Arzuw AŞIROWA
Maýa Kulyýewa adyndaky Türkmen milli konserwatoriýasynyň «Sazşynaslyk» hünäriniň 4-nji ýyl talyby
