«Halkara parahatçylyk we ynanyşmak» ýylynda Türkmenistanyň Çeperçilik sergiler müdirligi we şekillendiriş sungatynyň sergi merkeziniň Sergi jaýynda Milli bahar baýramy mynasybetli «Gelse Nowruz äleme» atly ýurdumyzyň suratkeşleriniň şekillendiriş we amaly-haşam sungat eserleriniň sergisi geçirildi.
Sergide, Türkmenistanyň Suratkeşler birleşiginiň agzalary, Rustam Abdyllaýewiň “Näme sen”, Ogulsadap Kuliyýewanyň “Şarlawuk”, Goçmyrat Muhammetberdiýewiň “Bahar buşlukçysy”, Ogulşirin Bagraýewanyň “Nowruz”, Kakageldi Täçliýewiň “Bagtyýar ýaşlar”, Maral Hojagulyýewanyň “Baýramçylyk mukamy”, Gülnäz Rozykulowanyň “Tebigat”, Gunça Ballyýewanyň “Mähribanlarym”, Annajahan Garajaýewanyň “Amyderýa”, Bahar Pirgulyýewanyň “Alabaý güjükleri”, Merjen Maksatmyradowanyň “Ene mähri”, Sülgün Orazkulyýewanyň “Halyçy gyz”, Bibi Mülkiýewanyň “Bukja” ýaly eserleri bellenmäge mynasypdyr.
Nowruz baýramy gözbaşyny alys taryhdan alyp gaýdýar. Täzelenişi, täze güni, tebigatyň janlanşyny, ruhy päkligi, dostanalyk gatnaşyklaryny özünde jemleýän bu baýramy suratkeşler öz döredijiliginde ussatlyk bilen çeper beýan edýärler. Bahar paslynyň gelmegi bilen owadan ülkämiz gül-gülälekli baýyrlarymyz ýaşyl dona bürenip gözel görnüşe eýe bolýar. Türkmen baharynyň waspyny şahyrlar: ,,Durna jümjümeli, älemgoşarly, Ülkäme toý bolup gelen ýazlarym”-diýip wasp edýän bolsa aýdymçylar, öz şirin owazlary siňen aýdymlarynda, suratkeşler hem ajaýyp hem gaýtalanmajak sungat eserlerinde beýan edýärler. Kalplara ornan watan gözelligi suratkeşiň hem mugallymy, hem ylhamynyň şirin ýaýlasy hasaplanýar. Sergide giň halk köpçüligine hödürlenen işleriň ählisinde türkmen sährasynyň gözelligi, bahar çagbasynyň ajaýyplygy, dony ýaşyl mahmaldan biçilen dag-düzlerimiz, baýram desterhanlary, semene aşynyň taýýarlanýan pursatlary, ahal ýaýlasy ýaly owadan pursatlar müdimileşdirilen sungat eserler sungat muşdaklarynyň baýramçylyk şähdini açdy. Sungat eserleriniň ählisinde çeperçilik akymlarynyň sazlaşykly ulanylmagy suratkeşleriň ussatlygyny açyp görkezdi. Sergide ussat suratkeşleriň 104-den gowrak nakgaş, miniýatura, heýkel eserleri görkezilýär.
Zeminiň ýaraşygy owadan ýazlaryň, baharyň esasy baýramy bolan Nowruzyň beýany şekillendiriş sungatynyň dürli görnüşlerinde ajaýyplygy emele getirýärler. Ajaýyplyk biziň durmuşymyzda dowamat-dowamdyr.
