12-nji martda Gyzylarbat etrabynyň Janahyr oba Medeniýet öýünde geçirilen aýdym-sazly döredijilik duşuşygy şatlyk-şowhuna beslendi. Bu aýdym-sazly döredijilik duşuşygyna etrabyň il sylagly ýaşululary, ak saçly eneler, medeniýet, sungat, bilim işgärleri, etrabyň jemgyýetçilik guramalarynyň wekilleri gatnaşdylar. Janahyr oba Medeniýet öýünde kitap we neşir önümleriniň, milli gymmatlyklaryň, amaly-haşam sungaty eserleriniň sergisi guraldy.
Aýdym-sazly döredijilik duşuşygynda Türkmenistanyň Hormatly il ýaşulusy, ýazyjy Gurbannazar Orazgulyýew, Türkmenistanyň at gazanan medeniýet işgäri Akmyrat Rejebow, Türkmenistanyň at gazanan artistleri Ýagmyr Gurbannazarow, Ilşat Annamämmedow, Türkmenistanyň Prezidentiniň «Türkmeniň Altyn asyry» atly bäsleşiginiň ýeňijisi Myrat Işangulyýew dagylar çykyş etdiler.
Aýdym-sazly döredijilik duşuşygynda ýerine ýetirilen çykyşlarda, aýdym-sazlarda, okalan goşgularda halkynyň Milli Lideri Gahryman Arkadagymyzyň hem-de Hormatly Prezidentimiziň alyp barýan döwletli işleri, baky Bitaraplygymyz giňden wasp edildi. Gyzylarbat etrabynyň medeniýet we sungat işgärleriniň aýdym-sazly çykyşlary hem bu çärä özboluşly öwüşgin çaýdy.
Döredijilik duşuşyklaryna gatnaşyjylar ýurdumyzyň halkara abraýyny belende göterýän türkmen halkynyň Milli Lideri Gahryman Arkadagymyza hem-de Hormatly Prezidentimize tüýs ýürekden alkyşlaryny aýtdylar.
