Milli taryhy-medeni mirasyň obýektlerini aýap saklamagyň, goramagyň, öwrenmegiň hem-de olara syýahatçylary çekmegiň 2022-2028-nji ýyllar üçin Döwlet maksatnamasyna laýyklykda Ahal welaýatynyň Gökdepe etrabynyň çäginde ýerleşýän Paryzdepe ýadygärliginde 2024-nji ýylda möwsümleýin işler alnyp baryldy.
Gazuw-barlag işleriň dowamynda arheologlar Paryzdepe ýadygärliginden keramika böleklerini ýüze çykardylar. Bu keramika bölekleri arassalanylyp, alymlar tarapyndan öwrenilende eneolit döwrüne degişlidigini kesgitlediler. Keramikanyň ýüzünde goňur reňkli üçburç şekiller çekilip, bezelendigi aýdyňlaşdyryldy.
Keramika bölekleri Türkmenistanyň Taryhy we medeni ýadygärlikleri goramak, öwrenmek hem-de rejelemek baradaky milli müdirliginiň rejeleýjileri A.Şaýymowa we K.Berdimämmedow tarapyndan rejelenýär. Keramikada rejeleýiş işleri doly tamamlanandan soňra Türkmenistanyň muzeýleriniň birine tabşyrmak meýilleşdirilýär.
