Berkarar döwletiň täze eýýamynyň Galkynyşy döwründe «Garaşsyz, baky Bitarap Türkmenistan – bedew batly at-myradyň mekany» ýylynda Şanly Garaşsyzlygymyzyň 35 ýyllyk baýramy özüniň mynasyp toý-baýramlaryna, şanly dabaralaryna beslenýär. Ýurdumyzyň bilim ulgamyny ösdürmek, kämilleşdirmek, hünär ussatlylygyny artdyrmakda Gahryman Arkadagymyz «Ýaşlar biziň geljegimizdir» diýip, aýdan sözleri döwrüň ileri tutulýan ugurlarynyň birine öwrüldi. Arkadagly Gahryman Serdarymyzyň ýurdymyzyň döredijilik işgärlerine we ýaş zehinlere berýän goldawlary bimöçberdir. Ýaş zehinli talyplarymyzyň, mugallymlarymyzyň döreden ajaýyp sungat eserleri milli gymmatlyklarymyzyň ebediliginiň we çeperçilik mekdebimiziň dowamatlylygynyň aýdyň subutnamasydyr.
Berkarar döwletiň täze eýýamynyň Galkynyşy döwründe Garaşsyz, baky Bitarap Türkmenistanda ýurdumyzyň mukaddes Garaşsyzlygynyň şanly 35 ýyllyk baýramy mynasybetli, yglan edilen medeniýet we sungat işgärleriniň, edebiýat, höwesjeň aýdymçy ýaşlaryň hemde zehinli çagalaryň arasynda Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň iň gowy şekillendiriş, amaly-haşam sungaty eserleri, fotosuratlar, senetçilik we taslama-bezeg işlerine özleriniň iň kämil, çeperçilik taýdan iň naýbaşy döredijilik eserleri bilen gatnaşyp sungat ojagymyz bolan Türkmenistanyň Döwlet çeperçilik akademiýasynyň «Nakgaşçylyk» kafedrasynyň mugallymy Maksat Hudaýberdiýew, «Amaly-haşam sungaty» fakultetiniň «Zergärçilik sungaty» hünäriniň 6-njy ýyl talyby Kömekgeldi Orazdurdyýew, «Binagärlik we dizaýn» fakultetiniň «Binagärlik ýadygärlikleriniň rejelenişi» hünäriniň 5-nji ýyl talyby Dawutmuhammet Maksatmuhammedow, «Binagärlik gurşawynyň dizaýny» hünäriniň 6-njy ýyl talyby Annageldi Şageldiýew Türkmenistanyň Prezidentiniň «Türkmeniň Altyn asyry» atly altyn zynjyry bilen sylaglandylar.
Biz ajaýyp Watanda - Garaşsyz, hemişelik Bitarap Türkmenistanda ýaşaýarys, oňa guwanýarys we tüýs ýürekden buýsanýarys. Çünki biz ajaýyp Watanymyzda eşretli durmuşda ýaşap, ýeňişlerden-ýeňişlere, belentliklerden-belentliklere tarap ynamly öňe barýarys. Bu günki gün bize hormatly Prezidentimiziň ýörän ýoly ýörelge, nusgalyk işleri görelde, çuň manyly öwüt-ündewleri dillerimizde sena bolup ýaňlanýar. Gahryman Arkadagymyzyň, Arkadagly Gahryman Serdarymyzyň halk üçin, Watan üçin, eşretli döwür üçin yhlas siňdirip, durmuşa geçirýän tutumly işleri mundan beýläk hem rowaç alsyn. Mukaddes Garaşsyzlygymyz ebedi, Garaşsyz we baky Bitarap Türkmenistan döwletimiz hemişe gülläp össün!
Jennet ÇARYÝEWA,
Türkmenistanyň Döwlet çeperçilik akademiýasynyň
«Sungaty öwreniş» kafedrasynyň mugallym-öwrenijisi.
