Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýinde Türkmenistanyň Medeniýet ministrliginiň hem-de muzeýiň ilkinji zenanlar guramalarynyň bilelikde guramagynda, «Şekillendiriş sungatynda Watan waspy» atly söhbetdeşlik geçirildi. Söhbetdeşlikde zenanlara goýulýan sarpa, Garaşsyzlyk ýyllarynda ýetilen belent sepgitler, ýurdumyz we halkymyz üçin möhüm ähmiýete eýe bolan Türkmenistanyň Halk Maslahatynyň nobatdaky mejlisine görülýän ýokary derejeli taýýarlyk işleri hakynda söhbet edildi. Şeýle hem, dürli pudaklarda göreldeli zähmetiň belent nusgasyny görkezen, eziz Watanymyzyň gülläp ösmeginiň hatyrasyna halal zähmet çeken ildeşlerimize döwlet sylaglarynyň dabaraly gowşurylyp, hormatly atlaryň dakylýandygy barada çykyş edenler nygtadylar. Şonuň ýaly-da çykyşlarda şanly Garaşsyzlygymyzyň 35 ýyllyk toýuny zähmet üstünlikleri bilen garşylamak, bu mukaddes baýrama görülýän ýokary guramaçylykly taýýarlyk işleri hakynda aýratyn bellenildi.
