Häzirki wagtda ýurdumyz dünýä döwletleri bilen dost-doganlyk gatnaşyklaryny ösdürmekde medeni-ynsanperwer hyzmatdaşlyga aýratyn ähmiýet berýär. Halkara medeniýet günleri, sungat festiwallary, döredijilik duşuşyklary, konsertler we teatr çykyşlary bu hyzmatdaşlygyň many-mazmunyny baýlaşdyrýar. Şeýle çäreler arkaly her bir halk öz milli medeniýetini dünýä tanatmak bilen birlikde, beýleki halklaryň ruhy mirasyna, sungat däplerine hem hormat goýýar.
Golaýda türkmenistanly sungat ussatlary, Türkmenistanyň Döwlet medeniýet merkeziniň Mukamlar köşgüniň ýokary derejeli aýdymçy artisti, Türkmenistanyň halk artisti Parahat Amandurdyýewiň hem-de Beýik Saparmyrat Türkmenbaşy adyndaky Baş akademiki drama teatrynyň sahna ussady, Türkmenistanyň at gazanan artisti Batyr Çaryýewiň Gazagystanyň II derejeli «Dostluk» ordeni bilen sylaglanmagy, dost-doganlyk gatnaşyklarynyň sungat arkaly has-da pugtalandyrylýandygynyň aýdyň güwäsine öwrüldi.