Türkmenistanyň B.Amanow adyndaky döwlet çagalar kitaphanasy ýakynda Gökderedäki «Beýik Serdaryň ruhubelent nesilleri» çagalar sagaldyş we dynç alyş merkezinde Tv4 Türkmenistan teleýaýlymynyň gatnaşmagynda wagtyny sapaly geçirýän çagalaryň arasynda «Tebigat gözelligi – abadançylygyň gönezligi» atly söhbetdeşlik geçirdi. Kitaphana hünärmeni ýaş nesillere ata Watanymyzy, ene topragymyzy, ýurdumyzyň deňi-taýy bolmadyk gözel tebigatyny gözümiziň göreji deýin gorap saklamak, tebigy baýlyklaryny aýawly peýdalanmak babatynda ýurdumyzda alynyp barylýan işler barada täsirli gürrüňleri berdi. Kitaphanamyzyň baý kitap gaznasyndan türkmen tebigatymyz baradaky kitaplardan guralan göçme kitap sergisi ýaş nesillerde uly täsir galdyrdy.
Duşuşygyň ahyrynda oňa gatnaşanlar bereketli türkmen topragyndan rejeli peýdalanmak, onuň gözelligini gorap saklamak, ösdürmek we gelejekki nesillere geçirmek ugrunda beýik işleri durmuşa geçirýän Gahryman Arkadagymyza we hormatly Prezidentimize Arkadagly Gahryman Serdarymyza alkyşlaryny beýan etdiler.
