Aşgabat şäher medeniýet müdirliginiň Merkezleşdirilen kitaphanalar ulgamynyň Gurbannazar Ezizow adyndaky kitaphana şahamçasynyň guramagynda «Ýazyň hem güýzüň şahyry» ady bilen kitap sergisi gurnaldy we gürrüňdeşlik geçirildi.
Gürrüňdeşlikde çykyş edenler Türkmenistanyň halk ýazyjysy, Magtymguly adyndaky döwlet baýragynyň hem-de Türkmenistanyň ýaşlar baýragynyň eýesi, şahyr Gurbannazar Ezizowyň çuňňur durmuş pelsepelerine ýugrulan goşgulary, poemalary indi ençeme ýyllar bäri watansöýüjiligiň, ynsanperwerligiň, gözelligiň aýdymyna öwrülip halkyň kalbynda baky orun alýandygy barada giňişleýin gürrüň berdiler. Şeýle-de, Gurbannazar Ezizow «Ýazyň-güýzüň şahyry» diýip tanalýandygyny, ýöne ol Watanyna, ene-topragyna, adamlara bolan söýgüsini gursagynda göterip gezeni üçin oňa söýgüniň şahyry hem diýilýändigi barada beýan etdiler.
Gürrüňdeşligiň dowamynda şahyryň birnäçe şygyrlaryndan labyzly okaldy we çärä gatnaşanlarda ýakymly täsir galdyrdy.
Gürrüňdeşligiň ahyrynda türkmen edebiýatymyzy ösdürmekde we dünýä ýaýmakda giň mümkinçilikleri döredip berýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.
