Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň baştutanlygynda ýurdumyzyň ylym ulgamynda gazanýan üstünlikleriniň hatary has-da artýar. Garaşsyz, hemişelik Bitarap Türkmenistan döwletimizde her ýyl bu baýramçylyk döwlet derejesinde giňden bellenilip geçilýär. Ylym jemgyýetçilik ösüşiniň kuwwatly özgerdiji güýji hökmünde ýurdumyzyň durmuşynda möhüm orny eýeleýär. Abadan ýaşaýşa, nurana durmuşa bezeg berip, ynsany ruhy taýdan bagta atarýan ilkinji ädim ylym-bilimden başlanýar. Häzirki wagtda ýaşlary ylmy bäsleşiklere çekmek, ylmy-barlag edaralarynyň maddy-enjamlaýyn binýadyny berkitmek boýunça mynasyp işler durmuşa geçirilýär. Alymlaryň ylmy işleri pudaklary ösdürmegiň möhüm wezipelerini ýerine ýetirmäge, täze tehnologiýalary işläp düzmäge we ornaşdyrmaga oňaýly şertleri döredýär. Ylym – diňe bir kitap okamak ýa-da tejribehanada wagt geçirmek däl-de, eýsem, Watanyňa, halkyňa peýda getirmek, täze bir zady döretmek we kämilleşdirmek ugrundaky çäksiz söýgüdir. Ylym we bilim – islendik döwletiň, jemgyýetiň ösüşiniň hereketlendiriji güýjidir, onuň gelejegidir. Biziň halkymyz taryhda ylym-bilime kitaba aýratyn sarpa goýýan halkdyr. Gündogaryň beýik akyldarlary bolan Al-Horezmi, Ibn Sina, Abu Reýhan Al-Biruni we biziň nusgawy şahyrymyz, akyldar Magtymguly Pyragy ýaly kämil şahsyýetler bütindünýä ylmynyň we medeniýetiniň ösüşine bahasyna ýetip bolmajak goşant goşupdyrlar. Türkmen ylmynyň gazananlary bilim ulgamyny ösdürmäge, ykdysadyýetimiziň pudaklarynyň önümçilik kuwwatyny ýokarlandyrmaga gönükdirilýär. Arkadagly Serdarymyzyň ,,Ýaşlar –Watanyň daýanjy” atly pähim parasatly eserinde: ,,Ylym netijeli ösüşleriň esasy çeşmesidir, täze açyşlara ruhlandyrýan güýçdir” diýen röwşen manyly sözleri eziz Watanymyzda ylmy we bilimi ösdürmek, ykdysadyýetimiziň pudaklaryna ylmyň täze gazananlaryny ornaşdyrmak babatda alyp barýan işleriniň aýdyň subutnamasydyr. Ylym-bu ähli ugurlarda we ulgamlarda gazanylýan ösüşleriň binýadydyr. Arkadagly Serdarymyzyň: “Ýaşlary ylymly bolan döwletiň sütünleri berkarar, güýji mizemezdir” diýen sözlerinden ruhlanýan biz bagtyýar ýaşlar ýurdumyzyň täze taryhy döwründe ylmy şamçyrag edinip, geljegiň nurana ýoly bilen öňe barýarys. Mukaddes ýurt Garaşsyzlygymyzyň şanly 35 ýyllyk toýy belleniljek bu ýylymyzda ýurdymyzyň ähli künjeklerinde Ylymlar güni uly dabaralara beslenip bellenilýär. Hut şu baýramçylyk mynasybetli Lebap welaýat taryhy we ülkäni öwreniş muzeýinde ,,Ylym – ösüşleriň açarydyr” atly wagtlaýyn baýramçylyk sergisiniň açylyş dabarasy geçirildi. Lebap welaýat ýörite sungat mekdebiniň talyp ýaşlary serginiň ilkinji myhmanlary boldular. Muzeý gaznasynda saklanylýan gymmatlyklar bilen birlikde Gahryman Arkadagymyzyň, Arkadagly Gahryman Serdarymyzyň jöwher paýhasyndan dörän ajaýyp eserleriniň ýerleşdirilmegi sergä aýratyn öwüşgin çaýdy. Ýurdumyzda ylym ulgamynda ýetilen sepgitler dogrusynda söz açýan birnäçe fotosuratlar we nakgaş eserleri ýerleşdirilen baýramçylyk sergisi talyp ýaşlarda we myhmanlarda ýatdan çykmajak ýakymly täsirleri galdyrdy. Sergi bilen tanyşlygyň ahyrynda ýurdymyzda ýaşlaryň hemmetaraplaýyn ylym-bilim almaklary, giň gözýetimli ýaşlar bolup ýetişmekleri üçin ähli mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň adyna alkyşly sözlerini beýan etdiler.
