Türkmen halkynyň müňýyllyklardan gözbaş alyp gaýdýan gadymy ýol-ýörelgeleri, milli aýratynlyklary bardyr. Şol milli ýörelgelerimize ser salanymyzda, türkmen durmuşynda ene mukaddesliginiň, zenan sarpasynyň özboluşly orny eýeleýändigine göz ýetirýärsiň. Ata-babalarymyz ene mukaddesligine, zenan mertebesiniň beýikligini saklamaklyga aýratyn ähmiýet beripdirler. Çünki her bir türkmen ojagynda perzent terbiýesi, aýratynam eneleriň, zenanlaryň paýyna düşüpdir. Nesilleriň watançylyk ruhunda kemala gelmeginde, çagalarda beýik adamkärçilik sypatlaryny kemala getirmekde zenanlar öz zähmetlerini gaýgyrmandyrlar. Zenanlar çagalaryň ruhy tämiz, aňly-düşünjeli, halal, watansöýer perzent bolup ýetişmeklerinde arman-ýadaman zähmet çekipdirler. Şol mukaddes ýol-ýörelgelerimizi häzirki wagtda hem enelerimiz berk saklap gelipdirler. Perzende öwüt-ündew bermek, olary iliň ýagşysyna meňzedip durmuşa atarmak esasan hem ojakda eneleriň paýyna düşüpdir. Enelerimiz gyz maşgalanyň edebine aýratyn üns beripdirler. Çünki türkmen halk döredijiligine ser salanymyzda; “Enesini görde gyzyny al, gyrasyny görde bizini al” ýa-da “Çaga eziz, edebi ondanam eziz” diýen atalar sözleri ýöne ýerden döremändir. Bu ýol-ýörelge häzir hem ýurdumyzda ýöredilip, ýaşlaryň edepli bolup ýetişmekleri üçin uly aladalar edilýär.
Ýaşlara edep-terbiýe bermek, jemgyýete mynasyp watansöýüji ýaşlary kemala getirmek maksady bilen, Türkmenistanyň Zenanlar birleşiginiň Merkezi Geňeşi, Türkmenistanyň Döwlet çeperçilik akademiýasynyň ilkinji zenanlar guramasy tarapyndan gurnamagynda “Gyz görki edepde” atly wagyz-nesihat çäresi geçirildi. Bu çärä Aşgabat şäheriniň 51-nji orta mekdebiniň halypa mugallymy Ogulnabat Ogulakowanyň, Türkmenistanyň Döwlet çeperçilik akademiýasynyň zenan mugallymlarynyň we talyp gelin-gyzlarynyň gatnaşmagynda geçirildi. Çärede gyz edebi, onuň gymmaty barada gyzykly öwüt-ündewler berildi. Nusgawy edebiýatymyzyň beýik şahyry Magtymgulynyň döredijiliginde hem gelin-gyzlaryň durmuşda uly orunlarynyň bardygyna, olaryň jemgyýetde uly güyç bolup durýandyklaryna, zenansyz maşgala durmuşynyň bolup bilmejekdigini ýatlap geçýär. Ol gelin-gyzlaryň adamkärçilik mertebesiniň, edep-ekramynyň belent bolmalydygyny nygtaýar:
Hyrydar bolsaňyz gyza-geline,
Edebin, ekramyn, oturşyn görüň.diýmek bilen, gyzlaryň güler yüzli, süyji dilli, hezzet-hormat etmegi başarýan edepli zenanlar bolmalydygy baradaky gymmatly çeşmelerini mysal getirip, geljekki ojak eýeleri gyzlaryň edepli, ekramly, zähmetsöýer bolup ýetişmekleri üçin gymmatly öwüt-ündewler berdiler.
Ýaşlary terbiýelemekde geçirilýän bu çäreler nesilleriň watançylyk ruhunda kemala gelmeginde, olaryň adamkärçilik sypatlarynyň artmagynda ähmiýeti uludyr.
Orazgözel Utomyşewa
Türkmenistanyň Döwlet çeperçilik akademiýasynyň jemgyýeti öwreniş ylymlary kafedrasynyň uly mugallymy