HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

BEHIŞDI BEDEWLERIŇ SUNGATDAKY WASPY

Täzelikler

28.04.2025

Diýarymyzda her ýylda türkmen bedewiniň milli baýramy uludan toýlanyp, türkmen halkynyň milli-ruhy bitewüligi dünýä dabaralanýar. Gözelligiň we kämilligiň naýbaşy nusgasy hökmünde ykrar edilen ahalteke bedewlerimiziň hormatyna bagyşlanyp guralýan dabaralar hem toplumlaýyn häsiýeti bilen tapawutlanýar. «Halkara parahatçylyk we ynanyşmak» ýylynda Türkmenistanyň Prezidentiniň «Türkmen bedewiniň milli baýramy mynasybetli bäsleşikleri geçirmek hakyndaky» Kararyna laýyklykda ahalteke atlarynyň gözelligini şekillendiriş we amaly-haşam sungatynyň eserlerinde, neşir önümlerinde, fotosuratlarda, teleýaýlymlarda çeper beýan etmek ugrunda suratkeşleriň, heýkeltaraşlaryň, halyçylaryň, zergärleriň, fotosuratçylaryň, neşirýat işgärleriniň, dizaýnerleriň, teleoperatorlaryň arasyndaky döredijilik bäsleşigine hödürlenen Türkmenistanyň Döwlet çeperçilik akademiýasynyň, ýörite çeperçilik mekdebiniň halypa mugallymlarynyň we talyp ýaşlarynyň, Türkmenistanyň Suratkeşler birleşiginiň agzalarynyň, erkin suratkeşleriň döreden sungat eserleri özboluşlylygy bilen tapawutlandy. Döredijilik bäsleşigine hödürlenen 300-e golaý sungat eserleriniň iň naýbaşylary saýlanyp, eminler topary tarapyndan ýokary baha berildi. Sungat eserlerinde gözellikde, ýyndamlykda, çydamlylykda, wepadarlykda öçmejek yz goýan aýlawlarymyzyň, toý-dabaralarymyzyň bezegi, türkmen halkynyň milli buýsanjy bolan bedewlerimiziň ajaýyp keşbi belentden wasp edildi. Bäsleşikde haly eserini döretmek boýunça Ahal welaýatynyň Gökdepe etrap häkimliginiň senagat, gurluşyk, arhitektura we ykdysadyýetiň beýleki pudaklary bölüminiň 1-nji derejeli hünärmeni Ýusup Gulowyň «Bedew batly Watanym!» atly haly eseri, zergärçilik eseri boýunça Türkmenistanyň Döwlet çeperçilik akademiýasynyň «Amaly-haşam sungaty» kafedrasynyň mugallymy Şazada Orazberdiýewiň «Altyn bezeg» atly at şaý-sep toplumy, surat eseri boýunça «Nakgaşçylyk» kafedrasynyň 3-nji ýyl talyby Jumamyrat Gurbanowyň «Behişdi bedewler» atly nakgaş eseri, heýkel eseri boýunça «Heýkeltaraşlyk» kafedrasynyň 3-nji ýyl talyby Goçmyrat Hanowyň «Şan-şöhrata beslenen türkmen bedewi» atly heýkel eseri, neşir önümi boýunça «Amaly-haşam sungaty» kafedrasynyň 4-nji ýyl talyby Aşyrgeldi Gutlyýewiň «Şa serpaýly bedewli halylar» atly senenama neşir işi, teleoperatorçylyk işi boýunça Türkmenistanyň Telewideniýe, radiogepleşikler we kinematografiýa baradaky döwlet komitetiniň Halkara habarlar merkeziniň operatorlar bölüminiň bölüm müdiri, Baýram Garlyýewiň «Owazasy dünýä dolan Galkynyş» atly wideo şekili üçin ýeňiji diýlip yglan edildi. Döredijilik wekillerine hormatly Prezidentimiz Arkadagly Gahryman Serdarymyzyň adyndan degişli şahadatnamalar we sowgatlar gowşuryldy. Döwrümiziň ösüşlerini, ahalteke bedewlerimiziň şan-şöhratyny wasp edýän döredijilik eserleri şekillendiriş sungatynyň taryhynda aýratyn orun tutjakdygy şübhesizdir. Bu bolsa, geljekki ýaş nesillerimizde milli gymmatlyklarymyza bolan belent söýgüni döretmekde ähmiýeti uludyr. Bilbil ÇARYÝEWA Türkmenistanyň Döwlet çeperçilik akademiýasynyň Ylym bölüminiň başlygy

TÜRKMENISTANYŇ PREZIDENTI MONAKO KNÝAZLYGYNYŇ ŞAZADASYNYŇ GEŇEŞÇISINI KABUL ETDI

Täzelikler

28.04.2025

27-nji aprelda Türkmen bedewiniň milli baýramy mynasybetli baýramçylyk at çapyşygynyň geçirilýän pursatlarynda hormatly Prezidentimiz Serdar Berdimuhamedow Monako Knýazlygynyň Şazadasynyň geňeşçisi, Parahatçylyk we sport guramasynyň prezidenti we esaslandyryjysy Žoel Buzuny kabul etdi. Myhman türkmen topragynda bildirilen myhmansöýerlik we duşuşmaga döredilen mümkinçilik üçin hormatly Prezidentimize hoşallyk bildirdi. Şeýle hem ol döwlet Baştutanymyzy we Gahryman Arkadagymyzy, ähli türkmen halkyny Türkmen bedewiniňmilli baýramy mynasybetli gutlady. Sahawatly toprakda ýaýbaňlandyrylan baýramçylyk dabaralary ganatly bedewlere bolan ählihalk söýgüsiniň aýdyň nyşanydyr. Žoel Buzu şu ajaýyp mümkinçilikden peýdalanyp, hormatly Prezidentimize Monako Knýazlygynyň Şazadasy Alber II-niň hem-de Şagyzy Stefaniýanyň iberen mähirli salamyny we hoşniýetli arzuwlaryny ýetirdi. Hormatly Prezidentimiz gutlaglar we hoşniýetli sözler üçin minnetdarlyk bildirip, öz gezeginde, Monako Knýazlygynyň Şazadasy Alber II-ä we Şagyzy Stefaniýa mähirli salamyny, olara berk jan saglyk, abadançylyk baradaky iň gowy arzuwlaryny ýetirmegini Žoel Buzudan haýyş etdi. Döwlet Baştutanymyz ýurdumyzda Türkmen bedewiniň milli baýramynyň giňden bellenilýän günlerinde Monako Knýazlygynyň Şazadasynyň geňeşçisini kabul edýändigine şatdygyny aýtdy. Ahalteke bedewleri dünýä medeniýetiniň aýrylmaz bölegidir. “Galkynyş” milli at üstündäki oýunlar topary şu ýylyň ýanwarynda Monakonyň Monte-Karlo şäherinde geçirilen 47-nji halkara sirk sungaty festiwalynda uly üstünlik gazandy. Bu baradaky gürrüňi dowam edip, hormatly Prezidentimiz Türkmenistan bilen Monako Knýazlygynyň arasynda ikitaraplaýyn gatnaşyklaryň deňhukuklylyk we birek-birege hormat goýmak ýörelgeleri esasynda alnyp barylýandygyny belledi. «Türkmenistan» gazeti

AHALTEKE ATLARYNYŇ MEKANYNDAKY DABARA

Täzelikler

28.04.2025

27-nji aprelda ýurdumyzyň dürli künjeklerinde Türkmen bedewiniň milli baýramy mynasybetli dabaralar giň gerimde ýaýbaňlandyryldy. Arkadag şäheriniň şanly senäniň hormatyna guralýan giň möçberli çäreleriň geçirilýän esasy merkezine öwrülmeginde bolsa çuňňur many bar. Bu künjek şöhraty dünýä dolan ahalteke bedewleriniň asyl mekany hasaplanýar. Şu gün halkymyzyň milli buýsanjyna öwrülen nurana bedewleriň şanyna guralýan baýramçylygyň çäklerinde Arkadag şäherinde “Akhan” binasyndan “Taýçanak” binasyna çenli aralykda durky täzelenen Ahalteke atlary şaýolunyň hem-de täze gurlan “Taýçanak” atly binanyň açylyş dabarasy boldy. Hepdäniň şenbe gününde bu ýerde «Ýylyň iň owadan ahalteke bedewi» atly halkara gözellik bäsleşiginiň we döredijilik işgärleriniň arasynda yglan edilen bäsleşigiň ýeňijilerini sylaglamak dabarasy geçirilip, ol Türkmen bedewiniň milli baýramynyň hormatyna guralýan dabaralaryň ähmiýetini artdyrdy. Nurana şäheriň görküne görk goşan Ahalteke atlary şaýolunyň hem-de “Taýçanak” atly binanyň açylyş dabaralary bu künjekde guralan baýramçylyk çäreleriniň üstüni ýetirdi. Joşgunly çykyşlar bilen utgaşykly dowam eden dabarada aýdym-sazlara giň orun berildi. Baýramçylyk lybasyna beslenen “Taýçanak” binasynyň ýanyndaky meýdançada türkmen toýlaryna mahsus görnüşler emele geldi. Ýurdumyzyň medeniýet we sungat ussatlarynyň bilelikdäki tagallalary bilen ýaýbaňlandyrylan edebi-sazly kompozisiýa bu ýerde guralan çärä özboluşly baýramçylyk öwüşginini çaýdy. Çykyşda Taýçanak atly bedewiň tarypy ýetirilip, häzirki döwürde milli atşynaslykda öçmejek yz goýan Aba seýis ýaly ussatlaryň tagallasy esasynda ahalteke bedewleriniň şöhratynyň dünýä dolandygy baradaky maglumatlar çeper beýan edildi. «Türkmenistan» gazeti

BEHIŞDI BEDEWLER-HALKYMYZYŇ MILLI BUÝSANJY WE GYMMATLY BAÝLYGY

Täzelikler

28.04.2025

Türkmenistanyň Prezidenti baýramçylyk dabaralaryna gatnaşdy 27-nji aprelda ýurdumyzda Türkmen bedewiniň milli baýramy giňden bellenildi. Şanly sene mynasybetli Halkara ahalteke atçylyk sport toplumynda hormatly Prezidentimiz Serdar Berdimuhamedowyň gatnaşmagynda baýramçylyk dabaralary ýaýbaňlandyryldy. Berkarar döwletiň täze eýýamynyň Galkynyşy döwründe ýurdumyzda atçylyk pudagyny ösdürmek, gözbaşy müňýyllyklaryň jümmüşine uzaýan milli atşynaslygyň baý däplerini dowam etdirmek, atçylyk sportuny höweslendirmek, bu ugurda gyzyklanma bildirýän daşary ýurtly hyzmatdaşlar bilen netijeli gatnaşyklary giňeltmek boýunça türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başyny başlan işleri hormatly Prezidentimiz Serdar Berdimuhamedow tarapyndan üstünlikli durmuşa geçirilýär. Köpetdagyň ajaýyp künjeginde bina edilen Arkadag şäherinde Aba Annaýew adyndaky Halkara atçylyk akademiýasynyň hem-de Atçylyk ylmy-önümçilik merkeziniň, 1 müň 500 tomaşaça niýetlenen Görogly adyndaky döwlet atçylyk sirkiniň gurulmagy hem munuň aýdyň güwäsidir. …Ir bilen hormatly Prezidentimiz Halkara ahalteke atçylyk sport toplumyna geldi. Bu ýerde döwlet Baştutanymyz uly ruhubelentlik bilen garşylanyldy. Dabara Mejlisiň Başlygy, Ministrler Kabinetiniň Başlygynyň orunbasarlary, harby we hukuk goraýjy edaralaryň, ministrlikleriň, pudaklaýyn dolandyryş edaralarynyň ýolbaşçylary, Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy, Arkadag şäheriniň häkimi, daşary ýurtlaryň we halkara guramalaryň Türkmenistanda işleýän diplomatik wekilhanalarynyň ýolbaşçylarydyr işgärleri, köpçülikleýin habar beriş serişdeleriniň wekilleri gatnaşdylar. Ýurdumyzyň sungat ussatlarynyň çykyşlary dabaranyň şowhunyny artdyrdy. Döwlet Baştutanymyz toplumyň çäginde baýramçylyk mynasybetli ýaýbaňlandyrylan sergini synlady. Aşgabat we Arkadag şäherleriniň, ýurdumyzyň welaýatlarynyň bu ýerde gurnan ak öýleri gadymy türkmen obasyny ýadyňa salýar. Gelin-gyzlar ajaýyp sazlaryň owazy astynda haly dokaýarlar we keçe basýarlar. Ýurdumyzyň muzeý gymmatlyklary, häzirki zaman suratkeşleriniň eserleri-de görkezilýär. Halylarda, özboluşly heýkeltaraşlyk işlerinde, grawýuralarda, fotosuratlarda behişdi bedewleriň keşbi şekillendirilipdir. «Türkmenistan» gazeti

TÜRKMENİSTAN–BEHİŞDİ BEDEWLERİŇ MEKANY

Täzelikler

26.04.2025

Berkarar döwletiň Täze eýýamynyň Galkynyşy döwründe «Halkara parahatçylyk we ynanyşmak» ýylynda gözel ýurdumyz bedew bady bilen öňe barýar, gülleýär, ösýär we özgerýär. Hormatly Arkadagymyzyň “Ganatly bedewler”, “Ahalteke bedewi-biziň buýsanjymyz we şöhratymyz”, “Gadamy batly bedew” ýaly döreden eserlerinde türkmen bedewlerimizi waspy giňden beýan edilýär. Onun müñyyllyklaryň dowamynda sungat hökmünde kemala gelşi, gylyk-häsiyetleri barada beýan edilip, gymmatly maglumat çeşmesi bolup duryar. Gahryman Arkadagymyzyň «Atda wepa-da bar sapa-da” atly kitabynda halkymyzyň watançylygynyň ynsanperwer ýörelgeleriniň kemala gelmeginde bedewlerimiziň orny has ýokary bolupdyr. Bedew atlarymyzyň tarypy bizin milli medeniýetimizde, edebiýatymyzda we aýdym-saz sungatymyzda tutyan orny aýratyn bellärliklidir. Bu barada «Oguznama», «Gorkut ata», «Görogly» eposlarynda giňden beýan edilyär. Muña mysal edip “Görogly” – da «Saňa at diymerin, gardaş diyerin» diyip bedew atyň özüniň dine bir hyzmatyny edyän jandary däl-de, eýsem ýoldaşy hökmünde görýändigi eserde beýan edilýär. Bu bolsa milli gahrymanymyz bolan Göroglynyň «Gyrat» atly atynyň ýanyndan aýrylman onuň bilen dost-ýar, ýoldaş bolandygyny görkezýär. Mysal hökmünde «Görogly» şadessanyndan başgada duş gelyän birnäçe aýdymlary, türkmen halk sazlary bolan «At çapan», «At çapar», «Göroglynyň at oýnadyşy», «Gyrat» ýaly sazlary, hem-de «Gyrat meni Çandybile sen ýetir», «Bedew atly, demir donly Görogly», «Gyrat sen», ýaly eposda duş gelýän birnäçe ýola salynyp aýdylýan aýdymdyr-sazlary getirip bileris. Türkmen nusgawy we mukamçy kompozitorlarymyzyň «Meleguş», «Gyratym», «Bedewler». «Gyratym girse meýdana, «Sen ak atda, sen gyratda ganatda», «Gyratym» ýaly bedew atlarymyzy wasp edýän birnäçe aýdymdyr-sazlary görkezmek bolar. Bu aýdym sazlarda bedew atymyza bolan söygi, owadanlygy, çeýeligi we ýyndamlygy beýan edilyär. Bedew atlarymyz häzirki wagtda dünýa ýüzünde owadanlygy, ýyndamlygy bilen tanalyp älem-jahana ýaň salýar. Bu aýdymdyr-sazlar biziň Maýa Kulyýewa adyndaky Türkmen milli konserwatoriýasynyň döredijilik topary, şeýle-de bagşy-sazandalarymyzdan düzülen milli, halk we simfoniki orkestr toparlary tarapyndan dabaraly ýerine ýetirilýär. Her ýylyň aprel aýynyň soňky ýekşenbesinde Türkmen milli bedewiniň baýramçylygy uly dabara bilen bellenip geçilýär. Şol geçjek çäreleriň hatarynda orun alýan Milli bedew baýramçylygy mynasybetli okuwymyzyň bagşy-sazandalary, milli we halk saz gurallar topary, hem-de öz gatnaşmagymyzda simfoniki orkestr topary bilen dabaraly konsertler toplumyny bermegi meýillişdirýäris. Bagşy-sazandalarymyzyň bedew atlarymyza bagyşlan birnäçe “Arkadagym atlananda bedewe” “Gyrat meni Çandybile sen ýetir” atly aýdymlary “At çapan”, “Göroglynyň at oýnadyşy„ “At çapar„ ýaly şirin sazlary diňleýjilere üçin uly gyzyklanma döretjek aýdymdyr-sazlaryň biridir. Simfoniki we halk saz gurallary orkestr toparymyz bilen bolsa, Çary Nurymowyň «Meniň dostum Meleguş» atly kino filminden «Meleguşym» atly sazynyň orkestr üçin täzeden işlemeginde ýerine ýetirmeklikde halk köpçüligine görkezmäge taýyarlyk görýäris. Ýurdumyzyň «Galkynyş» milli at üstündäki topary biziň milli we nusgawy kompozitorlarymyzyň döreden ýokarda bellenip geçilýän aýdymdyr – sazlarynyň astynda şolardan ruhlanyp, birnäçe döwletlerde üstünlikli çykyş edip, ba6rakly orunlara mynasyp bolýarlar. İne, ýaňy-ýakynda hem Fransiýanyň Monako şäherinde geçirilen halkara sirk festiwalyna ýurdumyzyň bu topary onlarça ýurduň arasynda gatnaşyp, ady agzalan halkara abraýly ýaryşynda üstünlikli çykyş edip, baýrakly birinji orna mynasyp bolanlygy bellemek ýerliklidir. Sözümiň ahyrynda bilen şular ýaly dabaraly konsertlerde çykyş etmekde, gurnamakda, giň mümkinçilikler berýän, biz ýaşlara görelde mekdebi bolup duran Türkmen halkynyň Milli Lideri Gahryman Arkadagymyza, onuň nesil daragtyny berk dowamatyny ýöretýän Hormatly Prezidentimiz Arkadagly Gahryman Serdarymyza köp sagbolsun aýtmak bilen, olaryň janynyň sag, ömürleriniň uzak, tutýan tutumly işleriniň hemişe rowaç almagyny tüýs ýüregimden arzuw etýärin. Garýagdy GARÝAGDYÝEW Maýa Kulyýewa adyndaky Türkmen milli konserwatoriýasynyň «Halk saz gurallary» fakultetiniň «Türkmen sazy» kafedrasynyň mugallymy

TÜRKMENISTANYŇ MINISTRLER KABINETINIŇ MEJLISI

Täzelikler

26.04.2025

25-nji aprelda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi. Ilki bilen, Mejlisiň Başlygy D.Gulmanowa Türkmenistanyň kanunçylygyny kämilleşdirmek babatda alnyp barylýan işler barada maglumat berdi. Bellenilişi ýaly, ýurdumyzy durmuş-ykdysady taýdan ösdürmek boýunça kabul edilen maksatnamalardan we halkara hukugyň umumy ykrar edilen kadalaryndan ugur alyp, raýat-hukuk gatnaşyklaryny kämilleşdirmek, adam hukuklaryny we azatlyklaryny, kanuny bähbitlerini goramak, saýlaw ulgamyny döwrebaplaşdyrmak, ylmy intellektual eýeçilik gatnaşyklaryny düzýän kadalaryň hukuk esaslary, gümrük meseleleri, ykdysadyýetiň pudaklarynyň, durmuş syýasatynyň dürli ulgamlarynyň kanunçylyk üpjünçiligi bilen baglanyşykly kanun taslamalaryny taýýarlamak boýunça degişli işler geçirilýär. Halkara guramalar bilen özara gatnaşyklary pugtalandyrmagyň çäklerinde Mejlisiň wekilleri BMG-niň düzüm birlikleri we ÝHHG-niň Aşgabatdaky merkeziniň ýurdumyzyň degişli döwlet edaralary bilen bilelikde guran okuw maslahatlaryna, duşuşyklara gatnaşyp, kanun çykaryjylyk işini kämilleşdirmegiň meseleleri barada pikir alyşdylar. Deputatlar Mejlisiň ýedinji çagyrylyşynyň sekizinji maslahatynda kabul edilen kanunlaryň many-mazmunyny halk köpçüligine düşündirmek, milli kanunçylygy kämilleşdirmek bilen bagly raýatlaryň tekliplerini öwrenmek babatda-da degişli işleri alyp barýarlar. Olar Halkara parahatçylyk we ynanyşmak ýylynyň hem-de Türkmenistanyň hemişelik Bitaraplygynyň şanly 30 ýyllygynyň syýasy-jemgyýetçilik ähmiýetini wagyz-nesihat etmek maksady bilen, welaýatlarda iş saparlarynda bolup, öz saýlaw okruglarynda saýlawçylar bilen duşuşyklary geçirýärler. «Türkmenistan» gazeti

«KONSERWATORIÝADA MYHMANÇYLYKDA» ATLY KONSERTI GEÇIRILDI

Täzelikler

25.04.2025

Maýa Kulyýewa adyndaky Türkmen milli konserwatoriýamyzda “Halkara parahatçylyk we ynanyşmak” ýylymyzda her bir günümiz dürli medeni çärelere beslenýär. Şeýle çäreleriň biri hem Balkan welaýat ýörite sungat mekdebiniň bagşylar we dutarçylar toparynyň “Halkara parahatçylyk we ynanyşmak ýyly” mynasybetli “Parahatçylygy wasp edýän ýaşlar” atly şowhunly konserti geçirildi. Konsert bagşylar toparynyň ýerine ýetirmeginde N.Gurbanmyradowyň sözlerine, A.Mededowyň sazyna döredilen “Parahatçylyk aýdymy” bilen açyldy. Ýylymyzyň şygaryna bagyşlanan aýdymda parahat ýurdumyz wasp edildi. Soňra ussat halypalaryň döreden “Gözim ýollarda” (sözi B.Hajyýewiňki, sazy J. Hojanepesowyňky), “Ýar gözlär” (sözi D.Allaberdiýewiňki sazy D.Hanowyňky”, “Sumbaryň nary” (sözi M.Garryýewiňki, sazy D.Ökdürowyňky) we “Göwnüm seni”, “Pes bolmasyn”, “Ýar otagynda”, “Paş eder seni”, “Hoş eder men”, “Annasoltanym meniň”, “Aýa meňzär”, “Ak ýüzli Maralym” ýaly türkmen halk aýdymlaryny ussatlyk bilen ýerine ýetirdiler. Bu dabarada Balkan welaýat ýörite sungat mekdebiniň dutarçylar topary hem adam kalbynda uly orny eýelän milli sazlary bilen çykyş edip, öz ussatlyklaryny görkezdiler. Olar N.Garlyýewiň “Arzuw etdim”, A.Mededowyň “Söýmüşem seni”, “Bagt mukamy”, A.Çaryýewiň “Ylham”, Ý.Nurymowyň “Säher şapagy”, Ş.Gurbannepesowyň “Gurultaý” ýaly sazlaryny we “Tapylar”, “Müşgil” türkmen halk sazlaryny ezberlik bilen çalmagy başardylar. Balkan welaýat ýörite sungat mekdebiniň dutarçylar we bagşylar toparlarynyň “Parahatçylygy wasp edýän ýaşlar” atly konserti ýatdan çykmajak medeni çäreleriň biri boldy. Konserte gatnaşan talyplar gyzgyn el çarpyşmalara we gül sowgatlaryna mynasyp boldylar. Şeýle zehinli, hünärine ussat talyp ýaşlaryň kemala gelmegi ýurdumyzda bilim ulgamyna we saz älemine uly üns berilýändiginiň, halypa mugallymlaryň bolsa irginsiz çekýän zähmetiniň nyşanydyr. Arzygül WELSÄHEDOWA Maýa Kulyýewa adyndaky TMK-nyň “Sazşynaslyk” fakultetiniň III ýyl talyby Medeniýet habarlary we täzelikleri Soňky habarlar Konsertler Teatr we kino dünýäsi Halkara medeni gatnaşyklary Muzeýler Kitaphanalar Taryhy ýadygärlikler Medeni miras Syýahatçylyk Täzelikler 06.03.2020 Täzelikler Okuw mekdebinde «Türkmenistan – Bitaraplygyň mekany» atly sergi gurnaldy 06.03.2020 Täzelikler Bagtyýar Biz, Arkadagly Bitarap Diýarda 06.03.2020 Täzelikler Şahyryň Sarpasy

UMUMY GELJEGIŇ BÄHBIDINE NETIJELI DÖWLETARA WE SEBIT HYZMATDAŞLYGY ILERLEDILÝÄR Gahryman Arkadagymyzyň Gyrgyz Respublikasyna dostlukly sapary

Täzelikler

25.04.2025

22-23-nji aprelda Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Gyrgyz Respublikasyna iki günlük dostlukly sapary amala aşyrdy. Mälim bolşy ýaly, ýakyn goňşy döwletler bilen giň gerimli hyzmatdaşlygy ösdürmek Garaşsyz, baky Bitarap Türkmenistanyň daşary syýasatynyň möhüm ugurlarynyň biridir. Ýurdumyz ählumumy abadançylygyň bähbidine netijeli halkara dialogy ösdürmäge aýratyn ähmiýet berýär. Soňky ýyllarda Türkmenistan bilen Gyrgyz Respublikasynyň arasyndaky dost-doganlyk gatnaşyklary uzak möhletli strategik hyzmatdaşlygyň täze derejesine çykdy. Halkara we sebit syýasatynyň derwaýys meseleleri boýunça iki ýurduň garaýyşlarynyň ýakynlygy dürli derejede döwletara dialogy işjeňleşdirmek üçin amatly şertleri döredýär. Häzirki wagtda Türkmenistan we Gyrgyz Respublikasy Merkezi Aziýada durnuklylygy hem-de howpsuzlygy pugtalandyrmak, özara düşünişmek, ynanyşmak, hormat goýmak däplerini berkitmek ugrunda çykyş edýärler. ...Gazagystanyň Türküstan şäherinden ugur alan türkmen halkynyň Milli Lideriniň uçary biraz wagtdan soňra, iki dostlukly ýurduň Döwlet baýdaklary bilen bezelen Yssyk-köl Halkara howa menziline gelip gondy. Haly düşelen ýodajygyň iki tarapynda Hormat garawulynyň esgerleri nyzama düzüldiler. Bu ýerde Gahryman Arkadagymyzy Gyrgyz Respublikasynyň Prezidenti Sadyr Žaparow hem-de beýleki resmi adamlar garşyladylar. Türkmen we gyrgyz halklaryny köpasyrlyk taryhyň hem-de ruhy kökleriň umumylygy, diliň, medeni däpleriň meňzeşligi baglanyşdyrýar. Şunuň bilen baglylykda, dostlukly ýurtlaryň arasyndaky döwletara hyzmatdaşlykda ynsanperwer gatnaşyklara möhüm ornuň degişlidigini bellemek gerek. Iki ýurduň medeniýet, sungat, edebiýat we kinematografiýa işgärleriniň gatnaşmagynda dürli dabaralaryň, sport çäreleriniň yzygiderli geçirilmegi asylly däbe öwrüldi. Ylym-bilim ulgamynda uly mümkinçiliklere eýe bolan Türkmenistan we Gyrgyz Respublikasy iki ýurduň halklarynyň baý taryhy-medeni mirasyny dikeltmekde-de tagallalary birleşdirýärler. «Türkmenistan» gazeti

MILLI SPORTUMYZYŇ NOBATDAKY ÜSTÜNLIGI

Täzelikler

25.04.2025

24-nji aprelda paýtagtymyzdaky Olimpiýa şäherçesiniň Başa-baş söweş sungaty sport toplumynda Ýewropa we Aziýa ýurtlarynyň 13-sinden türgenleriň gatnaşmagynda geçirilen sportuň milli we guşakly alyş göreşi boýunça halkara ýaryş milli sportumyzyň nobatdaky üstünligi bilen tamamlandy. Bu ýaryş 2024-nji ýylyň maýynda GDA-nyň Hökümet Baştutanlarynyň Geňeşiniň mejlisinde Aşgabadyň«Arkalaşygyň täze sport mümkinçilikleriniň şäheri» diýlip yglan edilmegine bagyşlanan çäreleriň maksatnamasynyň çäklerinde geçirildi. Halkara ýaryşyň birinji gününde ýurdumyzyň ýygyndy topary türkmen milli göreşi boýunça jemi 14 medal gazandy. Aşyrmyrat Amandurdyýew (57 kg çenli), Ýakup Babaýew (62 kg çenli), Yhlas Begmyradow (68 kg çenli), Agaýusup Garaýew (75 kg çenli), Sylapberdi Nuryýew (82 kg çenli), Annagurban Allaberdiýew (90 kg çenli), Pälwan Gurbangeldiýew (100 kg çenli), Nurmuhammet Baýdogdyýew (100 kg-dan ýokary) altyn medala mynasyp boldular. Muhammetarslan Geldiýew (57 kg çenli), Atageldi Tejendurdyýew (75 kg çenli), Döwran Jumadurdyýew (82 kg çenli), Begli Hojammaýew (100 kg çenli), Öwezgeldi Berdiýew (100 kg çenli) kümüş, Pälwan Akmyradow bolsa (68 kg çenli) bürünç medal gazandylar. Şu gün bolsa guşakly alyş göreşi boýunça geçirilen ýaryşda galan 10 medal toplumy ugrunda bäsleşildi. Alyş-bu gyrgyz halkynyň milli göreşidir. Ol öz gözbaşyny taryhyň jümmüşinden alyp gaýdýar. “Alyş” sözi “Manas” şadessanyndan gelip çykýar. Gadymy döwürlerde pälwanlar öz aralarynda göreşmek islänlerinde, “Kel, alyşaly!” diýipdirler. Bu bolsa “Geliň, göreşeliň!” diýmegi aňladypdyr. Göreşiň bu görnüşine erkekler hem, zenanlar hem gatnaşyp bilýärler. Göreş diňe dik durmak ýagdaýynda geçirilýär. Her bir pälwanyň wezipesi garşydaşyny guşagyndan goýbermän ýykmakdan ybaratdyr. Soňky ýyllarda guşakly alyş göreşi hem, türkmen milli göreşi ýaly, bütin dünýäde işjeň ösdürilýär. 2002-nji ýylda döredilen, ştab-kwartirasy Bişkek şäherinde ýerleşýän Bütindünýä Alyş federasiýasynyň düzümine (WAF) häzirki wagtda Aziýanyň, Afrikanyň, Ýewropanyň, Demirgazyk we Günorta Amerikanyň milli federasiýalarynyň 36-sy girýär. Paýtagtymyzda geçirilen halkara ýaryşda erkekleriň arasynda alty, zenanlaryň arasynda dört agram derejesinde guşakly alyş göreşi boýunça ýeňijiler kesgitlenildi. Bu ýaryşda hem türkmen türgenleri 4 altyn, 5 kümüş we 5 bürünç-jemi 14 medal gazanyp, toparlaýyn hasapda ýeňiji boldular. Sylapberdi Nuryýew (80 kg çenli), Annagurban Allaberdiýew (90 kg çenli), Pälwan Gurbangeldiýew (100 kg çenli), Dawut Nazarow (100 kg-dan ýokary) altyn medala, Abdyresul Durdyýew (60 kg çenli), Kerwengeldi Jumagylyjow (80 kg çenli), Nobatgeldi Nazarow (100 kg çenli), Zöhre Gurbanmyradowa (60 kg çenli), Aýnura Faýzullaýewa (65 kg çenli) kümüş medala, Umyt Garagulow (60 kg çenli), Azymuhammet Orazmuhammedow (70 kg çenli), Kuwwat Hojamberdiýew (90 kg çenli), Hesel Orazgeldiýewa (55 kg çenli), Patma Garajaýewa (70 kg çenli) bolsa bürünç medala mynasyp boldular. «Türkmenistan» gazeti

BEHIŞDI BEDEWLERIMIZIŇ ŞANYNA

Täzelikler

24.04.2025

Berkarar döwletiň täze eýýamynyň Galkynyşy döwründe Gahryman Arkadagymyzyň, Hormatly Prezidentimiziň taýsyz tagallalarynyň netijesinde, türkmen bedewleriniň dünýädäki şan-şöhraty has-da artýar.

• ←
• 1
• ...
• 32
• 33
• 34
• ...
• 54
• →