Garaşsyzlykdan galkynýan medeniýet
Häzirki döwürde Garaşsyz Türkmenistan durnukly ösüşiň aýdyň ýoly bilen ynamly öňe barýar. Döwlet Baştutanymyzyň parasatly ýolbaşçylygynda durmuşa geçirilýän medeni syýasat halkymyzyň köpasyrlyk milli häsiýetlerine, ynsanperwer ýörelgelerine we gadymy däp-dessurlaryna daýanýar. «Garaşsyz, baky Bitarap Türkmenistan — bedew batly at-myradyň mekany» ýylynda eziz Diýarymyzda mukaddes Garaşsyzlygymyzyň 35 ýyllyk şanly senesine hem-de Türkmenistanyň Halk Maslahatynyň mejlisine ýokary derejede taýýarlyklar görülýär.
25-nji awgustda Türkmenistanyň Medeniýet ministrliginiň gurnamagynda, Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýinde «Garaşsyzlykdan galkynýan medeniýet» atly döredijilik söhbetdeşligi geçirildi. Söhbetdeşlige Türkmenistanyň Medeniýet ministrliginiň Döredijilik işgärleri bölüminiň baş hünärmeni Ogulgurban Gaşlakowa, Türkmen döwlet medeniýet institutynyň Ylym bölüminiň başlygy, şahyr Sähragül Janmämmedowa, Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýiniň hünärmeni Aýjemal Rahimowa, Türkmenistanyň Prezidentiniň ýanyndaky Döwlet gullugy akademiýasynyň talyby, şahyr Nursoltan Derýaýewa dagy gatnaşdylar.
Söhbetdeşlikde Garaşsyzlyk ýyllarynda türkmen halkynyň Milli Lideri Gahryman Arkadagymyzyň hem-de hormatly Prezidentimiziň bimöçber goldaw-hemaýatlary netijesinde, ýurdumyzyň ähli ulgamlary bilen birlikde, medeniýet ulgamy hem uly ösüşlere eýe bolýar. Türkmen medeniýetini, sungatyny, edebiýatyny ösdürmek üçin döwletimiz tarapyndan ähli şertler döredilýär, medeniýet edaralarynyň maddy-enjamlaýyn binýady yzygiderli pugtalandyrylyp, ýokary bilimli hünärmenler bilen üpjün edilýär. Şeýle hem, ýurdumyzda atçylygy, atçylyk sportuny ösdürmäge uly üns berilýär.
Berkarar döwletiň täze eýýamynyň Galkynyşy döwründe ýurdumyzda türkmen medeniýetinde, sungatynda, edebiýatynda gazanylýan uly üstünlikleri dünýä ýaýmaga giň mümkinçilikler döredilýär. Bularyň ählisi medeniýet ulgamynyň işgärleriniň kalbynda egsilmez ylhama, çäksiz joşguna öwrülip, täze, kämil eserleri döretmäge has-da döredijilikli we netijeli zähmet çekmäge ganatlandyrýar.
Gahryman Arkadagymyzyň hem-de hormatly Prezidentimiziň taýsyz tagallalary netijesinde ýurdumyzda dostlukly döwletleriň Medeniýet günleri, şeýle hem, daşary ýurtlarda Türkmenistanyň Medeniýet günleri yzygiderli geçirilip, dünýä döwletleri bilen medeni hyzmatdaşlyklar has-da pugtalandyrylýar.
Gahryman Arkadagymyzyň hem-de Arkadagly Gahryman Serdarymyzyň bimöçber goldaw-hemaýatlary, çäksiz aladalary netijesinde ýurdumyzyň medeniýet, sungat we döredijilik işgärleriniň zähmetine mynasyp baha berilýär, olaryň kämil eserleri döretmekleri üçin ähli şertler döredilýär, dürli döredijilik bäsleşikleriniň geçirilmegi netijesinde il içinden täze zehinler ýüze çykarylýar. Munuň özi Garaşsyzlygymyzyň eçilen miweleridir – diýip, çykyş edenler giňişleýin bellediler.
Söhbetdeşlikde eziz Watanymyzyň mukaddes Garaşsyzlygynyň 35 ýyllyk şanly baýramy mynasybetli, muzeýde alnyp barylýan işler hakynda muzeýiň hünärmeni Aýjemal Rahimowa gürrüň berdi. Şahyrlar döredijilik söhbetdeşliginiň dowamynda ajaýyp goşgularyny okap berdiler.
Döredijilik söhbetdeşligine gatnaşanlar, milli medeniýetimiziň gülläp ösmegi we dünýä ýaýylmagy ugrunda uly işleri amala aşyrýan, Gahryman Arkadagymyzyň, Arkadagly Gahryman Serdarymyzyň ähli tutumly işleriniň üstünliklere beslenmegini arzuw etdiler.
