HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

TÜRKMENISTANYŇ PREZIDENTINIŇ ÝAPONIÝA IŞ SAPARY BAŞLANDY

Täzelikler

18.12.2025

17-nji dekabrda hormatly Prezidentimiz Serdar Berdimuhamedow “Merkezi Aziýa-Ýaponiýa” dialogynyň birinji sammitine gatnaşmak üçin iş sapary bilen Ýaponiýa ugrady. Paýtagtymyzyň Halkara howa menzilinde döwlet Baştutanymyzy ýurdumyzyň resmi adamlary ugratdylar. Häzirki döwürde däp bolan dostlukly türkmen-ýapon gatnaşyklary strategik hyzmatdaşlygyň aýdyň nusgasy bolup durýar. Özara hormat goýmak we deň hukuklylyk ýörelgeleri giň möçberli bilelikdäki taslamalary durmuşa geçirmek üçin berk binýat bolup hyzmat edýär. Türkmen halkynyň Milli Lideri tarapyndan başy başlanyp, hormatly Prezidentimiziň baştutanlygynda üstünlikli durmuşa geçirilýän ýurdumyzyň daşary syýasaty özara ynanyşmagyň ýokary derejesi bilen tapawutlanýan köpugurly gatnaşyklary mundan beýläk-de ösdürmäge güýçli itergi berýär. 2009-njy ýylyň dekabrynda Gahryman Arkadagymyzyň Ýaponiýa amala aşyran ilkinji resmi sapary döwletara gatnaşyklary düýpli özgerden aýratyn tapgyr boldy. Bu sapar diňe bir ikitaraplaýyn gatnaşyklaryň taryhynda täze sahypany açmak bilen çäklenmän, eýsem, uzak möhletleýin senagat hyzmatdaşlygynyň konsepsiýasynyň hem binýadyny goýdy. Türkmenistan we Ýaponiýa halkara guramalaryň meýdançasynda ählumumy durnukly ösüşiň bähbidine yzygiderli hyzmatdaşlyk edýärler. “Merkezi Aziýa-Ýaponiýa” dialogynyň çäklerindäki işjeň hyzmatdaşlyk munuň aýdyň mysalydyr. Milli bähbitleriň özara baglanyşygy häzirki wagtda sebitiň energetika we ekologiýa gün tertibini kesgitleýän ägirt uly taslamalaryň durmuşa geçirilmeginde öz beýanyny tapýar. “Kawasaki Heavy Industries”, “Mitsubishi Corporation”, “ITOCHU”, “Sojitz” ýaly öňdebaryjy ýapon kompaniýalary bilen ýakyndan hyzmat daşlygyň netijesinde sebitde deňi-taýy bolmadyk önümçilik kärhanalary döredildi. Ahaldaky tebigy gazdan ekologik taýdan arassa benzin öndürýän zawod şeýle hyzmatdaşlygyň aýdyň mysallarynyň biridir. Gyýanlyda polimer zawodynyň, Garabogazda karbamid zawodynyň işe girizilmegi bu strategiýanyň dowamy boldy. Bu taslamalar Türkmenistanyň eksport kuwwatyny pugtalandyrmak bilen bir hatarda, milli ykdysadyýetimiziň senagat taýdan ösüşiniň täze tapgyryny alamatlandyrdy. ___________________ «Türkmenistan» gazeti

GÖWÜNLERI GALKYNDYRAN HOŞ HABAR

Muzeýler

17.12.2025

Bu ajaýyp ýylymyz parahatlygyň we ynamyň ady bilen başlap ,bedew batly ösüşlere rowana bolýar. Asyrlar boýy parahatlyk tuguny parladan türkmen halky bu gün ak arzuwlarynyň wysal bolandygyna buýsanyp ýaşaýar. Ýylymyzyň ösüşlere beslenip tamamlanyp barýan günlerinde “Türkmen alabaý itlerini ösdürüp ýetişdirmek däpleriniň” ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilmegi ähli halkymyz bilen birlikde biz muzeý hünärmenleriniň buýsançly başymyzy göge ýetirdi. Gahryman Arkadagymyzyň ,,Türkmen alabaýy’’ atly kitabynda alabaý itleriniň dürli görnüşleriniň suratlary bilen bezelmegi, rowaýatlaryň, tymsallaryň beýan edilmegi okaýjyny özüne çekýär. Bu kitap diňe bir türkmen halkynyň söýüp okaýan eserleriniň biri bolman, eýsem dünýä halklaryny hem haýrana goýýan eserleriniň biridir. Halkymyzyň asyrlar boýy ýoldaşy bolup gelen alabaýlarymyza belent ýaşulular: ,,Alabaý –eýesine örän wepaly haýwan’’ diýip, ynam bilen aýtýarlar. Öýüň sakçysy, mal yzynda gezýän adamlaryň kömekçisi hem sürini goraýjysy, ýolda wepaly ýoldaşy bolýan alabaý itimiz taryplamaga mynasypdyr. Bir gadymy aýtgyda «Türkmen itiniň bolan ýerinde, ne ýylan bardyr, ne içýan» diýilýär. Erkekler öýden gidenlerinde, aýallaryň we çagalaryň howpsuzlygy üçin jogapkärçilik wepaly alabaý itiniň üstüne düşüpdir. Ata-babalarymyz çydamlylygy, aýratyn wepalylygy bilen tapawutlanýan alabaýlaryň ajaýyp tohumyny döretmegi başarypdyrlar. Köp ýüzýyllyklaryň dowamynda bu tohum itler adamlar üçin ygtybarly garawul bolup hyzmat edipdir. Gadymy türkmen halylarynyň göllerinde tapylan it şekilleri-de, Altyn depeden tapylan terrakotadan ýasalan itiň heýkeljigi, gadymy Marguşdan we Jeýtundan tapylan itiň ystyhanlary, Pessejikdepe ýadygärliginde diwaryň ýüzüne çekilen itiň şekilleri hem muny subut edýär. Ahal welaýatynyň Bäherden etrabynda geçirilen arheologik gazuw-agtaryş işleriniň barşynda «Güjük yzy» diýilýän gadymy nagyş tapyldy. Türkmen itiniň penje yzlary IX–XIV asyrlara degişli Şähryslam ýadygärliginiň kerpiçlerinde möhür bolup galypdyr. Gadymy yrymlara görä, bu nagyş tumaryň wezipesini ýerine ýetiripdir. Gahryman Arkadagymyzyň belleýşi ýaly, alabaý halkyň medeniýetiniň möhüm bölegidir. Ol halkymyzyň aňynda sazlaşyk, gözellik, diňe bir maddy däl, eýsem, ilkinji nobatda, ruhy gymmatlyk hökmünde özboluşly ähmiýete eýedir. Hormatly Prezidentimiz milli gymmatlyklarymyzy giňden wagyz etmek boýunça alyp barýan maksatnamalaýyn we netijeli işleri biziň edermen, wepaly we kuwwatly alabaýlarymyzyň dünýädäki şöhratynyň belende galmagyna ýardam edýär. Häzirki wagtda Türkmenistanda halkymyzyň baý mirasy aýawly saklanylýar we oňa sarpa goýulýar. Beýleki milli gymmatlyklar ýaly, türkmen alabaýy hem dünýäde şöhrata eýe bolup, türkmen halkynyň gözellik, dostluk, söýgi baradaky garaýyşlarynyň netijesidir. Halkymyz ahalteke bedewlerine, alabaý itlerine diýseň buýsanýar. Gahryman Arkadagymyzyň alyp barýan aladalary bilen milli mirasymyza we gymmatlyklarymyza uly sarpa goýulýar. Türkmen alabaýyny gorap saklamak ugrunda Halkara “Türkmen alabaý itleri” assosiasiýasnyň döredilmegi, ýurdumyzda itşynaslygy ösdürmek boýunça uly işleri alyp barýar. Her ýylyň oktýabr aýynyň soňky ýekşenbesiniň Türkmen alabaýynyň baýramy hökmünde yglan edilmegide munuň aýdyň subutnamasydyr. Soňky ýyllarda dünýäniň dürli künjeklerinde türkmen alabaýlarynyň muşdaklaryň sany barha artýar. Halkara “Türkmen alabaý itleri” assosiasiýasy we täze neşir edilýän “Türkmeniň nusgalyk alabaýy” atly žurnaly itleri terbiýeläp ýetişdirmek boýunça hünärmenleri birleşdirmäge, alymlary hem-de muşdaklary meşhur alabaýyň taryhy dogduk watanynda jemlemäge ýardam eder “Türkmen alabaý itlerini ösdürüp ýetişdirmek däpleriniň” ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizilmegi türkmen medeniýetiniň medeniýetiniň dünýä medeniýetinde eýeleýän mynasyp ornuny görkezýär. Türkmen alabaýlaryna çäksiz sarpa goýýan, taýsyz tagallalary alyp barýan Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun, döwletli tutumlary hemişe rowaçlyklara beslensin! _________________________________ Maral Hojagulyýewa Lebap welaýatynyň Taryhy we ülkäni öwreniş muzeýiniň uly ylmy işgäri

TÜRKMEN-AWSTRIÝA DOSTLUK TOPARYNYŇ MEJLISI

Täzelikler

17.12.2025

16-njy dekabrda paýtagtymyzdaky «Ýyldyz» myhmanhanasynda Türkmen-awstriýa dostluk toparynyň mejlisi geçirildi. Onda şu ýylyň dowamynda ýerine ýetirilen işleriň jemleri jemlenildi. Utgaşykly görnüşde geçirilen mejlise türkmen we awstriýa tarapyndan toparyň agzalary gatnaşdylar. Türkmen-awstriýa dostluk toparynyň ýolbaşçysy Neda Berger duşuşygy açyp, Gahryman Arkadagymyz bilen ýakynda geçiren duşuşygynyň ähmiýetini belledi. Ol 2008-nji ýylda bu toparyň döredilmeginiň türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Awstriýa amala aşyran ilkinji resmi sapary bilen gönüden-göni baglanyşyklydygyny aýdyp, medeniýet ulgamynda durmuşa geçirilen bilelikdäki taslamalara, maglumat alyşmalaryna we hormatly Prezidentimiziň baştutanlygynda soňky ýyllarda netijeli hyzmatdaşlygyň has-da pugtalandyrylýandygyna aýratyn ünsi çekdi. Türkmen tarapyndan çykyş edenler özara ynanyşmak we birek-biregiň bähbitlerine hormat goýmak ýörelgelerine esaslanýan türkmen-awstriýa gatnaşyklarynyň ýokary derejesini kanagatlanma bilen bellediler. Nygtalyşy ýaly, iki ýurt hem bilelikdäki taslamalary amala aşyrmak üçin bar bolan uly mümkinçiliklerden doly peýdalanmaga çalyşýar. Mejlisiň dowamynda ikitaraplaýyn hyzmatdaşlygy mundan beýläk-de pugtalandyrmaga we dostluk toparynyň iş ugurlaryny giňeltmäge gönükdirilen birnäçe möhüm meseleler ara alnyp maslahatlaşyldy. Sanly ulgam arkaly çykyş edenler işewürlik gatnaşyklarynyň pugtalandyrylýandygyny aýdyp, täze başlangyçlaryň hem-de durmuşa geçirilýän taslamalaryň ägirt uly mümkinçilikleriniň bardygyny nygtadylar. Özara bähbitli ykdysady hyzmatdaşlygy ösdürmek, medeni diplomatiýa arkaly gatnaşyklary has-da ilerletmek ara alnyp maslahatlaşylan esasy meseleleriň hatarynda boldy. Mejlisde 2026-njy ýyl üçin geljegi uly beýleki taslamalar ara alnyp maslahatlaşyldy. Toparyň işini işjeňleşdirmäge, bilelikdäki işe öňdebaryjy türkmen kompaniýalaryny çekmäge degişli meselelere hem garaldy. Türkmenistanyň hemişelik Bitaraplygynyň 30 ýyllygy, Türkmen-awstriýa dostluk toparynyň 17 ýyllygy mynasybetli, iki ýurduň arasyndaky ykdysady we işewürlik taslamalarynyň ösdürilmegine goşan uly goşandy, şeýle hem köp ýyllaryň dowamynda alyp baran netijeli işi üçin toparyň degişli agzasy Hormat haty bilen sylaglanyldy. Şeýlelikde, 2025-nji ýyl Türkmen-awstriýa dostluk toparyna diňe bir ikitaraplaýyn wezipeleri däl, eýsem, Halkara parahatçylyk we ynanyşmak ýylynyň möhüm ählumumy gün tertibini durmuşa geçirmek üçin öz meýdançasyndan ýokary derejede peýdalanmaga hem mümkinçilik berdi. ____________________ «Türkmenistan» gazeti

BÄSLEŞIGIŇ JEMLERI JEMLENDI

Täzelikler

16.12.2025

2025-nji ýylyň 4-nji dekabrynda Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýinde, Türkmenistanyň Medeniýet ministrliginiň, Türkmenistanyň Demokratik partiýasynyň Syýasy Geňeşiniň, «Edebiýat we sungat» gazetiniň redaksiýasynyň, Türkmenistanyň Suratkeşler birleşiginiň bilelikde guramagynda, 2025-nji ýylyň «Halkara parahatçylyk we ynanyşmak ýyly» diýlip yglan edilmegi we Türkmenistanyň hemişelik Bitaraplygynyň şanly 30 ýyllygy mynasybetli, «Parahatçylyk we ynanyşmak – Bitaraplygyň binýady» hem-de «Dünýä dursun parahat!» atly döredijilik bäsleşikleriň jemlerini jemlemek dabarasy boldy. Hekaýa, şygryýet, makala ugurlaryny öz içine alan bu bäsleşige, döredijilik bilen meşgullanýan ildeşlerimiz uly höwes bilen gatnaşdylar. Olar özleriniň bäsleşige hödürlän eserlerinde, Halkara parahatçylyk we ynanyşmak ýylynyň üstünliklerini, ýetilen belent sepgitleri hem-de ýurdumyzyň hemişelik Bitaraplygynyň şanly 30 ýyllygynyň waspyny ýetirip, çuňňur many-mazmunyny giňden açyp görkezdiler. Bäsleşigiň ýeňijileri Türkmenistanyň Medeniýet ministrliginiň hem-de Türkmenistanyň Demokratik partiýasynyň Syýasy Geňeşiniň Hormat hatlary we ýadygärlik sowgatlary bilen sylaglanyldy. Bäsleşige gatnaşyjylar, Berkarar döwletiň täze eýýamynyň Galkynyşy döwründe, dünýä nusgalyk beýik işleri arkaly Garaşsyz, hemişelik Bitarap döwletimiziň ähli ugurlardaky döwrebap ösüşlerini has-da belende götermek ugrundaky giň gerimli işleri üçin, türkmen halkynyň Milli Lideri Gahryman Arkadagymyza hem-de hormatly Prezidentimize tüýs ýürekden alkyşlaryny aýtdylar. Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, döwletli işleriniň hemişe rowaç bolmagyny arzuw etdiler. ______________________________ Ogulgurban Gaşlakowa Türkmenistanyň Medeniýet ministrliginiň Döredijilik işgärleri bölüminiň baş hünärmeni

JEMGYÝET WE KANUNÇYLYK

Täzelikler

16.12.2025

15-nji dekabrda Türkmenistanyň Medeniýet ministrliginiň we onuň garamagyndaky edaralaryň işgärleri bilen Türkmenistanyň Adminstratiw hukuk bozulmalary hakyndaky Kodeksine girizilen üýtgeşmeleri we goşmaçalary düşündirmek, hukuk sowatlylygyny artdyrmak, hukuklaryny we kanuny bähbitlerini goramaga, kanun bozulmalaryny duýdurmaga, jenaýatçylygyň öňüni almaga gönükdirilen çäreleri durmuşa geçirmek we giňden wagyz etmek maksady bilen duşuşyk ýygnagy geçirildi. Duşuşyk ýygnagynyň dowamynda Türkmenistanyň Mejlisiniň deputaty, Türkmenistanyň Baş prokuraturasynyň, Türkmenistanyň Adalat ministrliginiň, Türkmenistanyň Içeri işler ministrliginiň wekilleri çykyş etdiler. Çykyş edenler Türkmenistanyň Adminstratiw hukuk bozulmalary hakyndaky Kodeksine girizilen üýtgeşmeleri we goşmaçalar barada giňişleýin beýan edip, syýasy jemgyýetçilik durnuklylygyny gazanmakda, hukuk jemgyýetini berkarar etmekde, Watanymyzy ösdürmekde munuň möhüm ähmiýete eýedigini, her bir raýatyň kadalaşdyryjy hukuk namalaryny bilmelidigini hem-de berjaý etmelidigini bellediler.

NEBITGAZ SENAGATY WE GEOLOGIÝA IŞGÄRLERINIŇ GÜNI MYNASYBETLI BAÝRAMÇYLYK DABARASY

Täzelikler

15.12.2025

14-nji dekabrda ýurdumyzda Nebitgaz senagaty we geologiýa işgärleriniň güni dabaraly bellenildi. Şunuň bilen baglylykda, Türkmenistanyň Nebitgaz toplumynyň mejlisler zalynda “Halkara parahatçylyk we ynanyşmak ýylynda nebitgaz pudagynda ýetilen sepgitler” atly baýramçylyk maslahaty geçirildi. Halkara Bitaraplyk gününiň yzysüre bellenilýän hünär baýramçylygy mynasybetli guralan maslahat hormatly Prezidentimiz Serdar Berdimuhamedowyň Garaşsyz, hemişelik Bitarap Türkmenistanyň nebitgaz senagaty we geologiýa işgärlerine iberen Gutlagynyň okalmagy bilen başlandy. Arkadagly Gahryman Serdarymyz Gutlagynda nebitçileriň, gazçylaryň we geologlaryň yhlasly, tutanýerli zähmeti netijesinde nebitgaz pudagynda uly üstünlikleriň gazanylýandygyny, pudakda alnyp barylýan toplumlaýyn işleriň ýurdumyza uglewodorod serişdeleriniň gorlary boýunça dünýäniň öňdebaryjy döwletleriniň hataryndaky ornuny berkitmäge ýardam edýändigini nygtady. Bellenilişi ýaly, bu ugurda halkara derejeli iri taslamalara badalga bermek bilen, uglewodorod serişdeleriniň, ilkinji nobatda, halkymyzyň eşretli durmuşyna, geljek nesillerimiziň hem-de goňşy döwletleriň halklarynyň abadançylygyna hyzmat etmegini gazanmak ugrunda möhüm wezipeler öňde goýulýar. Pudagyň eksport mümkinçiliklerini diwersifikasiýa ýoly bilen ösdürmek, köpugurly turba geçirijiler ulgamyny döretmek döwletimiziň energetika syýasatynyň ileri tutulýan ugurlarynyň biridir. Durmuşa geçirilýän bu işler energetika howpsuzlygyny üpjün etmäge, sebitiň ýurtlarynyň abadançylygyna, ykdysady taýdan durnukly gurşawy emele getirmäge gönükdirilendir. Dabara gatnaşyjylar hormatly Prezidentimiziň Gutlagyny uly ruhubelentlik bilen diňlediler. Soňra maslahata gatnaşyjy myhmanlara we nebitgaz toplumynyň işgärlerine söz berildi. Olar çykyşlarynda Gahryman Arkadagymyzyň tagallalary netijesinde 2009-njy ýylyň 14-nji dekabrynda Türkmenistan — Hytaý halkara gaz geçirijisiniň açylyp ulanmaga berlip, taryhyň sahypalaryna altyn harplar bilen ýazylan şol senäniň ýurdumyzda Nebitgaz senagaty we geologiýa işgärleriniň güni hökmünde bellenilmeginiň özboluşly many-mazmuna eýe bolandygyny nygtadylar. Eziz Diýarymyzyň dürli künjeklerinde täze nebitli we gazly ýataklaryň açylmagyny, Türkmenistan — Hytaý, Gündogar — Günbatar gaz geçirijilerini, gurluşygy alnyp barylýan Türkmenistan — Owganystan — Pakistan — Hindistan halkara gaz geçirijisiniň taslamasyny pudakda gazanylan üstünlikleriň hatarynda görkezmek bolar. Halkara parahatçylyk we ynanyşmak ýylynda türkmen halkynyň Milli Lideriniň bu taslamanyň möhüm bölegi bolan Arkadagyň ak ýoly bilen Serhetabat — Hyrat gaz geçirijisiniň gurluşygyna ak pata bermegi ýurtlaryň uzak möhletleýin ösüşine kuwwatly itergi bermäge hem-de sebitde durnukly ösüşi üpjün etmäge ygrarlylygyň nobatdaky mysalyna öwrüldi. _________________________ «Türkmenistan» gazeti

TÜRKMENISTANYŇ PREZIDENTI ERMENISTAN RESPUBLIKASYNYŇ PREZIDENTI BILEN DUŞUŞDY

Täzelikler

12.12.2025

11-nji dekabrda hormatly Prezidentimiz Serdar Berdimuhamedow giň gerimli baýramçylyk dabaralaryna gatnaşmak üçin ýurdumyza sapar bilen gelen Ermenistan Respublikasynyň Prezidenti Waagn Haçaturýan bilen duşuşdy. Döwlet Baştutanymyz dostlukly ýurduň Prezidentini mähirli mübärekläp, Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli geçirilýän halkara foruma gatnaşmak baradaky çakylygy kabul edip, ýurdumyza gelendigi üçin minnetdarlyk bildirdi. Şeýle hem hormatly Prezidentimiz Prezident Waagn Haçaturýanyň bu forumyň işine gatnaşmagynyň onuň ýurdumyzyň Bitaraplyk syýasatyny goldaýandygynyň, parahatçylygy, özara düşünişmegi pugtalandyrmaga, dünýä derejesinde ynanyşmaga esaslanýan gatnaşyklary ýola goýmaga ygrarlydygynyň güwäsi bolup durýandygyny aýtdy. Dostlukly ýurduň Baştutany türkmen topragynda mähirli kabul edilendigi we halkara foruma gatnaşmaga çakylyk üçin hoşallyk bildirip, bu forumyň sebit we dünýä derejesinde gatnaşyklary pugtalandyrmakda möhüm ähmiýete eýe boljakdygyny aýtdy hem-de pursatdan peýdalanyp, hormatly Prezidentimizi Halkara Bitaraplyk güni, Türkmenistanyň hemişelik Bitaraplygynyň 30 ýyllygy mynasybetli tüýs ýürekden gutlady. Şeýle-de ol Türkmenistanyň gözel tebigatynyň özünde ýakymly täsirleri galdyrandygyny belläp, ýurdumyzyň ekologiýa we daşky gurşawy goramak babatda durmuşa geçirýän başlangyçlaryna ýokary baha berdi hem-de ermeni tarapynyň bu ugurda hyzmatdaşlyga taýýardygyny tassyklady. Hormatly Prezidentimiz hoşniýetli sözler üçin minnetdarlyk bildirip, Halkara parahatçylyk we ynanyşmak ýylynda Birleşen Milletler Guramasynyň döredilmeginiň 80 ýyllygynyň bellenilýändigine, bu ýylyň Garaşsyz Türkmenistanyň ösüş taryhynyň möhüm senesi-ýurdumyzyň hemişelik Bitaraplyk hukuk derejesiniň BMG tarapyndan ykrar edilmeginiň 30 ýyllygy bilen gabat gelýändigine ünsi çekdi. Şunuň bilen baglylykda, döwlet Baştutanymyz şanly sene mynasybetli guralýan forumyň pikir alyşmak, häzirki döwrüň wajyp meselelerini çözmekde netijeli çemeleşmeleri işläp taýýarlamaga gönükdirilen bilelikdäki strategik çözgütleri kabul etmek, bu ugurda hyzmatdaşlygyň anyk ugurlaryny kesgitlemek üçin giň mümkinçilikleri döretjekdigine ynam bildirdi. Hormatly Prezidentimiz Prezident Waagn Haçaturýanyň ýurdumyza saparlarynyň hem-de Türkmenistanda geçirilýän möhüm çärelere gatnaşmagynyň Ermenistanyň açyk, netijeli hyzmatdaşlyga ygrarlydygynyň subutnamasy bolup durýandygyny belledi hem-de Awazada geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň çäklerinde dostlukly ýurduň Baştutany bilen geçiren netijeli gepleşiklerini ýatlady. Bu gepleşikler özara düşünişmegi çuňlaşdyrmaga we hyzmatdaşlygyň ileri tutulýan ugurlaryny ara alyp maslahatlaşmaga mümkinçilik berdi. Döwlet Baştutanymyz häzirki wagtda iki ýurduň arasynda söwda-ykdysady gatnaşyklary giňeltmek üçin zerur şertleriň bardygyna ünsi çekip, ýurdumyzyň geljegi uly taslamalary işläp taýýarlamak we eksport-import amallaryny diwersifikasiýalaşdyrmak boýunça işjeň hyzmatdaşlyga taýýardygyny tassyklady. Duşuşygyň ahyrynda söhbetdeşler birek-birege iň gowy arzuwlaryny beýan edip, döwletara hyzmatdaşlygyň iki ýurduň halklarynyň bähbidine mundan beýläk-de üstünlikli ösdüriljekdigine ynam bildirdiler. _________________________ «Türkmenistan» gazeti

TÜRKMENISTANYŇ PREZIDENTINIŇ SAN-TOME WE PRINSIPI DEMOKRATIK RESPUBLIKASYNYŇ PREZIDENTI BILEN DUŞUŞYGY

Täzelikler

12.12.2025

11-nji dekabrda hormatly Prezidentimiz Serdar Berdimuhamedow Halkara Bitaraplyk güni, Türkmenistanyň hemişelik Bitaraplygynyň 30 ýyllygy mynasybetli dabaralara gatnaşmak üçin ýurdumyza sapar bilen gelen San-Tome we Prinsipi Demokratik Respublikasynyň Prezidenti Karlos Manuel Wila Nowa bilen duşuşdy. Döwlet Baştutanymyz Prezident Karlos Manuel Wila Nowany mähirli mübärekläp, Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli geçiriljek halkara foruma gatnaşmak baradaky çakylygy kabul edip, ýurdumyza sapar bilen gelendigi üçin minnetdarlyk bildirdi. San-Tome we Prinsipi Demokratik Respublikasynyň Prezidenti foruma gatnaşmaga çakylyk hem-de bildirilen myhmansöýerlik üçin hoşallygyny beýan edip, sebitde we dünýäde parahatçylygyň pugtalandyrylmagy ugrunda çykyş edýän Bitarap Türkmenistanda saparda bolmagyň özi üçin uly hormatdygyny aýtdy, şeýle hem pursatdan peýdalanyp, hormatly Prezidentimizi Halkara Bitaraplyk güni, Türkmenistanyň hemişelik Bitaraplygynyň 30 ýyllygy mynasybetli tüýs ýürekden gutlady. Hormatly Prezidentimiz dostlukly ýurduň döwlet Baştutanynyň bu ýokary wekilçilikli foruma gatnaşmagynyň onuň Türkmenistanyň Bitaraplyk syýasatyny goldaýandygynyň we parahatçylyk ýörelgelerine berýän möhüm ähmiýetiniň görkezijisi bolup durýandygyny aýdyp, halkara forumyň ählumumy parahatçylygy, ynanyşmak medeniýetini pugtalandyrmakda, häzirki zamanyň derwaýys meseleleriniň çözgütlerini bilelikde işläp taýýarlamakda möhüm ähmiýete eýe boljakdygyny belledi. Döwlet Baştutanymyz Prezident Karlos Manuel Wila Nowanyň ýurdumyza saparynyň netijeleriniň Türkmenistan bilen San-Tome we Prinsipi Demokratik Respublikasynyň arasyndaky ikitaraplaýyn gatnaşyklaryň giňeldilmegine täze itergi berjekdigine ynam bildirdi. Bellenilişi ýaly, Türkmenistan Birleşen Milletler Guramasy tarapyndan üç gezek ykrar edilen Bitaraplyk hukuk ýagdaýy esasynda daşary ýurt döwletleri bilen dostlukly gatnaşyklary alyp barýar. Bu ugurda ýurdumyz Afrika döwletleri bilen gatnaşyklaryň geljeginiň uludygyny göz öňünde tutup, sebitiň ýurtlary bilen hyzmatdaşlygy ösdürmäge aýratyn üns berýär. Şunuň bilen baglylykda, hormatly Prezidentimiz Türkmenistan bilen San-Tome we Prinsipi Demokratik Respublikasynyň arasynda syýasy-diplomatik, söwda-ykdysady, medeni-ynsanperwer ugurlarda hyzmatdaşlygy ösdürmegiň uly mümkinçilikleriniň bardygyna ünsi çekdi. Döwlet Baştutanymyz Prezident Karlos Manuel Wila Nowanyň şu ýylyň awgustynda «Awaza» milli syýahatçylyk zolagynda geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyna gatnaşandygyny belläp, bu saparyň iki ýurduň arasyndaky gatnaşyklaryň taryhynda möhüm ähmiýetli waka bolandygyny aýtdy. Hormatly Prezidentimiz ýurdumyzyň hemişelik Bitaraplygynyň şanly baýramynyň giňden bellenilýän günlerinde dostlukly ýurduň döwlet Baştutanyny paýtagtymyz Aşgabat şäherinde kabul edýändigine kanagatlanma bildirip, şu gezekki saparyň üstünliklere beslenip, Türkmenistan bilen San-Tome we Prinsipi Demokratik Respublikasynyň arasyndaky gatnaşyklary mundan beýläk-de berkitmäge goşant goşjakdygyna ynam bildirdi. Netijeli häsiýetde geçen duşuşygyň ahyrynda söhbetdeşler iki ýurduň hem köptaraplaýyn hyzmatdaşlygy giňeltmäge ygrarlydygyny tassyklap, birek-birege alyp barýan jogapkärli döwlet işlerinde mundan beýläk-de üstünlikleri arzuw etdiler. __________________________________ «Türkmenistan» gazeti

GAHRYMAN ARKADAGYMYZ ÖZBEGISTAN RESPUBLIKASYNYŇ PREZIDENTI BILEN DUŞUŞDY

Täzelikler

12.12.2025

11-nji dekabrda Milli Liderimiz Halkara howa menziliniň meýdançasynda paýtagtymyza gelip gonan nobatdaky uçardan düşen Özbegistan Respublikasynyň Prezidenti Şawkat Mirziýoýewi mähirli garşylady. Goňşy ýurduň Baştutanyna gül desseleri gowşurylyp, duz-çörek hödür edildi. Howa menzilinde Gahryman Arkadagymyz bilen Özbegistan Respublikasynyň Prezidentiniň gysgaça ikiçäk duşuşygy boldy. Söhbetdeşler duşuşmaga dörän nobatdaky mümkinçilige tüýs ýürekden begenýändiklerini beýan edip, munuň özara gatnaşyklaryň depginli ösdürilýändigine şaýatlyk edýändigini bellediler. Türkmen halkynyň Milli Lideri Türkmenistanyň hemişelik Bitaraplygynyň 30 ýyllygy mynasybetli iri halkara foruma gatnaşmaga çakylygy kabul edip, Aşgabada gelendigi üçin Şawkat Mirziýoýewe minnetdarlyk bildirdi. “Munuň özi Özbegistan Respublikasy we onuň doganlyk halky tarapyndan türkmen Bitaraplygyna, türkmen halkyna goýulýan belent hormatdan nyşandyr” diýip, Gahryman Arkadagymyz aýtdy. Goňşy ýurduň Baştutany çakylyk üçin hoşallyk bildirip, Aşgabatda geçiriljek iri halkara maslahatyň uly ähmiýete eýedigini nygtady. “Çünki bu forum Türkmenistanyň parahatçylyk söýüjilik taglymatyny dünýä ýaýmakda möhüm ähmiýeti bilen ünsi çeker hem-de ýurduň dünýädäki abraýyny has-da belende göterer. Şeýle-de ol halkara bileleşik tarapyndan Türkmenistana, türkmen halkyna, onuň alyp barýan oňyn Bitaraplyk syýasatyna uly hormat bilen garalýandygyny görkezer” diýip, belent mertebeli özbek myhmany aýtdy. Söhbetdeşligiň barşynda türkmen-özbek gatnaşyklarynyň häzirki wagtda barha ösdürilýändigine üns çekilip, iki ýurduň hyzmatdaşlygynyň täze derejelere çykaryljakdygyna ynam bildirildi. ___________________________ «Türkmenistan» gazeti

GAHRYMAN ARKADAGYMYZ GYRGYZ RESPUBLIKASYNYŇ PREZIDENTI BILEN DUŞUŞDY

Täzelikler

12.12.2025

11-nji dekabrda Garaşsyz Watanymyzyň hemişelik Bitaraplygynyň 30 ýyllygy we Halkara Bitaraplyk güni mynasybetli geçiriljek iri halkara foruma gatnaşmak üçin Aşgabada ýokary derejeli myhmanlaryň gelmegi dowam edýär. Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň hut özi dostlukly ýurtlaryň birnäçesiniň Prezidentlerini paýtagtymyzyň Halkara howa menzilinde garşylady. Gahryman Arkadagymyz, ilki bilen, paýtagtymyzyň Halkara howa menziline uçar arkaly gelip gonan Gyrgyz Respublikasynyň Prezidenti Sadyr Žaparowy mähirli garşylady. Belent mertebeli myhmana gül desseleri gowşurylyp, milli däp-dessurlarymyza laýyklykda duz-çörek hödür edildi. Uçaryň ýanynda mähirli garşylanandan soňra, howa menziliniň binasynda türkmen halkynyň Milli Lideri bilen Gyrgyz Respublikasynyň Prezidentiniň gysgaça ikiçäk duşuşygy geçirildi. Gahryman Arkadagymyz Türkmenistanyň hemişelik Bitaraplygynyň 30 ýyllygy mynasybetli iri halkara foruma gatnaşmaga çakylygy kabul edip, Aşgabada gelendigi üçin dostlukly ýurduň Baştutanyna minnetdarlyk bildirdi. Gyrgyzystanyň Prezidenti çakylyk üçin hoşallyk bildirip, Aşgabatda geçiriljek forumyň möhüm ähmiýeti barada aýtdy. Söhbetdeşligiň barşynda türkmen-gyrgyz gatnaşyklarynyň ösdürilmegine ikitaraplaýyn uly gyzyklanma bildirilýändigi nygtaldy hem-de hyzmatdaşlygyň ähli ugurlar boýunça geljekde has-da ösdüriljekdigine ynam bildirildi. _____________________ «Türkmenistan» gazeti

• ←
• 1
• ...
• 13
• 14
• 15
• ...
• 39
• →