Muzeýler
28.04.2026Türkmenistanyň Beýik Saparmyrat Türkmenbaşy adyndaky şekillendiriş sungaty muzeýinde 2026-njy ýylyň 1-nji maýynda Türkmenistanyň sungatda at gazanan işgäri Nyýazmyrat Dowodowyň doglan gününiň 105 ýyllyk ýatlama sergisiniň açylyş dabarasyna çagyrýarys. Sergi sagat 16:00-da açylýar. Biziň salgymyz: Aşgabat ş. (A.Nowaýy) 2022. köçesiniň 88-nji jaýy Habarlaşmak üçin tel: 92-71-69
Kitaphanalar
28.04.2026Halaç etrap merkezi kitaphanasy ýaş nesillerde kitaba bolan höwesini döretmek maksady bilen körpejileriň arasynda ýygy-ýygydan dürli mowzukda gürrüňleri, çagalar ertirlikleri yzygiderli geçirýärler. Berkarar döwletimiziň bagtyýarlyk döwründe hormatly Prezidentimiziň taýsyz tagallalary netijesinde ýurdymyzda ýaş nesillerimiziň ylym-bilimli, giň dünýägaraýyşly, kämil düşünjeli, sagdyn ruhly ynsanlar bolup ýetişmekleri üçin uly işler amala aşyrylýar. Halk döredijiliginde özüne çekiji, täsirli görnüşleriniň biri hem ertekiler bolup, olar türkmen halk döredijiliginiň aýrylmaz şahsy bolup durýarlar. Halk paýhasynyň aýnasy bolan ertekiler gündelik durmuşda duş gelýän hadysalaryň çeper beýan edilmesidir, sebäbi ertekilerde beýan edilýän wakalar, suratlandyrmalar, ahlak sypatlar hut şu durmuşyň özünden alynýar. Çagalar “Türkmen halk ertekileri”, “Akpamyk”, “Ýartygulak”, “Ýüz tylla”, “Böwenjik”, “Akylly Ahmet”, “Ertekiler dünýäsinde”, “Dostlugyň miwesi” ýaly birnäçe ertekileri söýüp diňleýärler.
Täzelikler
27.04.2026Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň saýasynda gadymy hem müdimi sungatymyza, ony dowam etdirýänlere has-da uly üns berilýär, sarpa goýulýar. Türkmen saz sungatyny professional derejede ösdürmek ugrunda kompozitorlar tarapyndan ägirt uly işler amala aşyryldy. Çünki olar prossional sazlary, dürli žanrdaky eserleri döretdiler. Bu ajaýyp eserler Türkmenistanyň gymmatly sazlary jemlenen altyn hazynasyny emele getirdi. Ýolaman Nurymow Türkmenistanyň halk artisti, ussat halypa, kämil sazanda, mukamçy kompozitor hökmünde tanalýan sungat ussatlarynyň biridir. Maýa Kulyýewa adyndaky Türkmen milli konserwatoriýasynyň professory Ýolaman Nurymow 1943-nji ýylyň awgust aýynyň 10-na Ahal welaýatynyň Tejen etrabynyň häzirki “Täze oba” daýhan birleşiginde dogulýar. Onuň saza bolan söýgüsi çagalykdan başlanýar, şonuň üçin hem ol obalaryndaky sazçylyk gurnagyna gatnap başlaýar. Onuň ilkinji saz mugallymy, kakasynyň inisi Hommat Gapurow bolýar. Soň bolsa obalaryndaky çeper höwesjeňler toparyna gatnaşýar. Ol ýerde mugallymy Nurmyrat Ýazgulyýewden öz agasy Gurbannazardan hem birentek sazlary öwrenip, bilýän sazlarynyň sanawyny artdyrýar. Ussat sazanda Ýolaman Nurymow 1960-njy ýylda paýtagtymyzda ýerleşýän Daňatar Öwezow adyndaky sazçylyk mekdebine okuwa girýär. Ol bu ýerde ady belli sazandadyr kompozitorlaryň elinde okap, olardan tälim alýar. Ol halypalardan Aşyr Kulyýew, Allaberdi Allaberdiýew, Çary Täçmämmedow dagylary aýtmak bolar. 1964-nji ýylda Ýolaman Nurymow sazçylyk mekdebini tamamlanyndan soň, Aşgabady etekläp oturan Köşi obasyndaky umumy bilim berýän 8-nji orta mekdebinde aýdym-saz mugallymy bolup işe başlaýr. Ol birnäçe ýyllar mugallymçylyk kärinde işäninden soň, 1971-nji ýylda Çary Täçmämmedowyň ýolbaşçylygyndaky, Türkmen radiosynyň we telewideniýesiniň halk saz gurallary toparyna işe çagyrylýar. Şeýlelik bilen, Ýolaman Nurymow, Çary Täçmämmedowyň ýakyn şägirdi bolýar. Ýolaman Nurymow ansamblda birnäçe ýyl işläp özüniň ussatlygyny artdyrýar, bilýän sazlarynyň sanawyny has baýlaşdyryp, döwletimizde iň bir ussat sazandalaryň hataryna goşulýar. 1981-nji ýylda ussat kompozitor Ýolaman Nurymowa türkmen halk aýdym-saz sungatyny ösdürmekde bitiren hyzmatlary üçin “Türkmenistanyň at gazanan artisti” diýen hormatly at dakylýar. 1980-1985-nji ýyllar aralygynda Ýolaman Nurymow Türkmen döwlet pedagogik sungat institutyna okuwa girip, öz bilimini artdyrýar we ony üstünlikli tamamlanyndan soň, şol ýerde dutar ugry boýunça mugallymçylyk kärinde işe başlaýar. 1986-njy ýylda Ýolaman Nurymow sungat institutynyň halk saz gurallary kafedrasynyň müdirligine saýlanýar. 1987-nji ýylda halypamyza “dosent” diýen ylmy derejesi, 1991-nji ýylda bolsa “professor” diýen ylmy at berilýär. Ýolaman Nurymow dürli ýyllarda Turkiýede, Şwesariýada, Ýaponiýada, Şri-Lankada, Indoneziýada, Eýranda we başga-da ençeme daşary döwletlerde çykyş edip, türkmen halk sazlarynyň özboluşly ýerine ýetirijik ayratynlyklaryny, gurluş taýdan has kämilligini, ýerine ýetirijilik tarapdan bolsa ussatlygy talap edýänligini äşgär etdi. Mukamçy kompozitor Ýolaman Nurymow Türkmenistanyň dürli bagşyçylyk ýollaryndan aýdýan Gaýgysyz Çaryýew, Hangeldi Annamyradow, Aşyrmämmet Dawudow, Dörtguly Durdyýew, Mustak Aýmedow, Gurbandurdy Jeňow, Oraz Begnyýazow ýaly ençeme bagşylara sazandarlyk edýär. Ussat halypanyň ylham çeşmesinden dörän: “Ýaşlyk joşguny”, “Ussat eller”, “Watana söýgi”, “Alkyş”, “Şadyýan çagalar”, “Sähra mukamy”, “Bagtyýar Watan”, “Säher şapagy”, “Ene toprak”, “Mukaddes mukam” ýaly onlarça aýdym-sazlary döredýär. Halypanyň ýokary ýerine ýetirijilik ussatlygy üçin 1994-nji ýylda “Türkmenistanyň halk artisti” diýen hormatly at dakyldy. Ussat halypamyz Ýolaman Nurymow Garaşsyz, baky Bitaraplygymyzy wasp edýän birnäçe aýdym-sazlary döretdi. Olardan: Nowruz Gurbanmyradowyň sözlerine “Watan saňa ýarasam”, “Şan getirdi”, “Garaşsyz illi türkmen”, “Eziz Türkmenistanym!”, “Garaşsyzlyk toýy külli türkmeniň”, “Türkmenistan Bitarap”, “Türkmen Altyn asyrda”, Hudaýguly Allamyradowyň sözlerine “Garaşsyzlyk saýasynda”, Hajy Kakalyýewiň sözlerine “Türkmenistanym meniň” diýen aýdymlary döretdi. 1991-2001-nji ýyllar aralygynda M. Täçmyradow adyndaky Türkmen Döwlet filarmoniýasynyň bagşy-sazandalar toparynyň çeper ýolbaşçysy bolup işledi. Halypa, ussat sazanda Ýolaman Nurymow 2009-njy ýylda “Gaýrat” medaly bilen sylaglanýar. Mukamçy kompozitor Ýolaman Nurymowyň ýetişdiren şägirtleri: Türkmenistanyň halk artistleri: Nepesmyrat Meredow, Orazmyrat Annanepesow, Myratgeldi Baýramberdiýew, bagşy Kyýas Durdyýew. Türkmenistanyň at gazanan artistleri: Orazgeldi Seýitgeldiýew, Çarymyrat Ahunow, Aýgül Ýagşyýewa, mugallymlar Annadurdy Allaberdiýew, uly mugallym Gunça Muhammetberdiýewa, sazanda Bäşim Eýeberdiýew ýaly başga-da birnäçe sazanda oglan-gyzlary ýetişdirdi. Milli aýdym-saz sungatymyzy ösdürmekde uly işleri bitiren ussatlarymyzy ýatlamaga, olaryň döredijiligini, ýerine ýetirijiligini, olaryň bize miras goýan aýdym-sazlaryny öwrenmäge uly mümkinçilikleri döreden Gahryman Arkadagymyza, Arkadagly Gahryman Serdarymyza taňryýalkasyn aýdýarys. Çarymyrat AHUNOW, Türkmenistanyň at gazanan artisti, Maýa Kulyýewa adyndaky Türkmen milli konserwatoriýasynyň “Türkmen sazy” kafedrasynyň uly mugallymy
Kitaphanalar
27.04.2026Arkadag şäheriniň häkimligi tarapyndan hem-de Arkadag şäherinde zähmet çekýän pudak edaralarynyň bilelikde gurnamaklarynda Akhan binasynda “Türkmen milli bedewiniň” baýramçylygy mynasybetli dabaraly çäre geçirildi. Baýramçylyk çäresinde taryhy ajaýyp kamaty, ýyndamlygy, çydamlylygy, syzgyrlygy, wepalylygy kimin buýsançly häsiýetleri bilen giren türkmen bedewleriniň waspy belentden ýaňlandy. Şu ajaýyp pursatda dabaraly baýramçylyk çäresinde türkmeniň milli gymmatlyklaryna degişli behişdi bedewlerimize ajaýyp öwüşgin berýän şaý-sepleriň, haly önümleriniň, keçe önümleriniň sergileri gurnaldy. Şeýle-de, bu ajaýyp sergide däp-dessurlarymyz bolan üme dessury, milli saz senedimiz bolan dutar ýasamak işi hem-de türkmen ýigitleriniň bezegi bolan silkme telpeginiň tikilişi ýaly türkmen gymmatlyklary sergide giňden ýaýbaňlanyldy. Şeýle hem, bu ajaýyp sergini baýlaşdyrmak maksady bilen Döwletmämmet Azady adyndaky Arkadag şäher kitaphanasynyň göçme kitap sergisini gurnady. Göçme kitap sergide bedewlerimiziň waspyny ýetirýän Gahryman Arkadagymyzyň, Arkadagly Gahryman Serdarymyzyň çuň manyly eserleri hem bu ajaýyp sergä aýratyn öwüşgin çaýdy. Bu dabaraly çärede hem bagşy-sazandalarymyz özleriniň ajaýyp sazlarydyr, aýdymlary bilen Watanymyzy, ahalteke bedewlerimiziň waspyny belentden ýerine ýetirdiler. Baýramçylyk çäresiniň ahyrynda behişdi bedewlerimiziň waspyny belentde sarpalaýan Gahryman Arkadagymyza, Arkadagly Gahryman Serdarymyza çäksiz alkyş sözleri aýdyldy.
Medeni miras
27.04.2026Ahal welaýatynyň Sarahs etrabynyň Sarahs şäheriniň Medeniýet öýünde meşhur halypa bagşy, Türkmenistanyň halk bagşysy Oraz Salyryň (1876-1940) 150 ýyllygy mynasybetli ömri-döredijiligine bagyşlanan aýdym-sazly dabara geçirildi. Türkmenistanyň Medeniýet ministrliginiň Maddy däl medeni miras müdirliginiň, Ahal welaýatynyň Sarahs etrabynyň Oraz Salyr adyndaky çagalar sungat mekdebi bilen bilelikde geçiren aýdym-sazly dabarasy, ussat halypa bagyşlanan wideoşekilleriň görkezilmegi bilen başlandy. Oňa il sylagly ýaşulular, kümüş saçly eneler, halypanyň nebereleri, medeniýet, sungat işgärleri, çagalar sungat mekdebiniň mugallymlary we okuwçylary gatnaşdylar. Dabarada çykyş eden “Köne Sarahs” taryhy-medeni döwlet goraghanasynyň bölüm müdiri Babajan Gylyjow, “Ahal durmuşy” gazetiniň habarçysy Akmyrat Mürzäýew, Ahal welaýatynyň Sarahs etrabynyň Oraz Salyr adyndaky çagalar sungat mekdebiniň okuw işleri boýunça orunbasary Maksat Gylyjow meşhur bagşynyň ýerine ýetiren aýdymlary, onuň ömri-döredijiligi barada täsirli gürrüň etdiler. Ussat bagşynyň nebereleriniň, adyny göterýän mekdebiň okuwçylarynyň hem-de mugallymlarynyň gatnaşmagynda geçirilen aýdym-sazly dabarany, onuň ýoluny dowam edýän Babanýaz Orazmyradow, Begenç Şalarow, Bagtyýar Işankulyýew, Toýly Gurbanow, Guwanç Gurbanow, halypa Oraz Salyryň çowlugy Myrat Orazow, Serdar Ýagmyrow, Maksat Allakulyýew, Kakabaý Işankulyýew ýaly bagşylar «Ýaşylbaş», «Aýlansam», «Gyzylgül», «Gyrmyzy», «Kiçiniň», «Ýok meniň», «Bar eken», «Ýat bolar», «Bigana ýagşy» ýaly türkmen halk aýdym-sazlary bilen bezediler. Bu ýerde guralan kitap sergisinde Gahryman Arkadagymyzyň, Arkadagly Gahryman Serdarymyzyň jöwher zehininden dörän eserleri, bagşy-sazandalarymyza bagyşlanyp neşir edilen kitaplar sergilendi. Çynar GURBANOW, Türkmenistanyň Medeniýet ministrliginiň Maddy däl medeni miras müdirliginiň baş hünärmeni
Kitaphanalar
25.04.2026Döwletmämmet Azady adyndaky Arkadag şäher kitaphanasynda Arkadag teleýaýlymynyň gurnamagynda “Ak şäherimiziň bagtyýar nesilleri” atly söhbetdeşlik geçirildi. Söhbetdeşlikde, Berkarar döwletiň täze eýýamynyň Galkynyşy döwründe ýaş nesil hakynda taýsyz tagallalar edilýär. Ýurdumyzyň dürli künjeklerinde okuw-terbiýeçilik edaralarynyň, sport maksatly binalaryň yzygiderli gurlup ulanylmaga berilmegi diýseň guwandyryjydyr. Elbetde, bu döwletli işleriň sakasynda bolsa Gahryman Arkadagymyzyň, Arkadagly Gahryman Serdarymyzyň uly aladalary ýatyr. Bu günki ýaş nesil ertirki ylym-bilimli kämil şahsyýetlerdir. Söhbetdeşligiň dowamynda gepleşige gatnaşýan çagalar Watanymyzy wasp edýän goşgularyny uly buýsanç bilen aýdyp berdiler. Söhbetdeşligiň ahyrynda, ösüp gelýän ýaş nesilleriň okamagy, öwrenmegi üçin ähli şertleri döredip berýän Gahryman Arkadagymyza, Arkadagly Gahryman Serdarymyza köp alkyşlar aýdyldy.
Halkara gatnaşyklary
25.04.2026Şu ýylyň 19-25-nji apreli aralygynda TÜRKSOÝ halkara guramasynyň Özbegistan Respublikasynyň paýtagty Daşkent şäherinde, Özbegistanyň çeperçilik akademiýasy, şeýle hem, Suratkeşler birleşigi bilen bilelikde guramagynda, Türki döwletleriň ýaş suratkeşleriniň "Bir ruh, dürli reňk" atly bäsleşik sergisi geçirildi. Bäsleşik sergisinde Türkmenistanyň Suratkeşler birleşiginiň agzasy, Türkmen döwlet ýörite çeperçilik mekdebiniň mugallymy Gurban Babatäjow TÜRKSOÝ-yň ýörite baýragyna mynasyp boldy. Ýurdumyzda Gahryman Arkadagymyzyň hem-de Arkadagly Gahryman Serdarymyzyň taýsyz tagallalarynyň netijesinde, şekillendiriş sungatynyň gülläp ösmegi, döredijilik işgärleriniň döwrebap zähmet çekmekleri üçin giň ýollar açylýar. Munuň özi döredijilik işgärleriniň halkara bäsleşiklerine gatnaşyp, uly üstünlikleri gazanyp, eziz Watanymyzyň sungatda ýeten derejesini giňden dünýä ýaýmaklary üçin döredilýän uly mümkinçilikler hem oňyn şertlerdir.
Kitaphanalar
24.04.2026Türkmenistanyň B.Amanow adyndaky döwlet çagalar kitaphanasy ýakynda 76-njy ýöriteleşdirilen orta mekdebinde “Şöhratly türkmen bedewi” atly türkmen bedewiniň baýramyna bagyşlanan gürrüňdeşlik geçirdi. Gürrüňdeşlikde ahalteke bedewi täze taryhy döwrümiziň ganatyna öwrülip, ata Watanymyz ösüşiň täze belentliklerine tarap ynamly öňe barýandygy barada gürrüň berdiler. Şeýle hem atçylyk sungatynyň milli ýörelgelerini we däp dessurlaryny gaýtadan dikeltmek, täze many-mazmun bilen baýlaşdyrmak we ösdürmek, ýaşlary atçylyk sport bilen meşgullanmana işjeň çekmek, şeýle hem türkmen bedewlerimiziň waspyny bütindünýä wagyz etmek boýunça uly işleriň durmuşa geçirilýändigi barada belläp geçdiler. Gürrüňdeşligiň ahyrynda täze döwrümiziň zynaty bolan behişdi bedewlerimiziň şan- şöhratyny dünýä ýaýýan Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Täzelikler
24.04.2026Ýurdumyzda her ýylyň aprel aýynyň soňky ýekşenbesinde Türkmen bedewiniň milli baýramy mynasybetli geçirilýän dürli dabaralar behişdi bedewlerimiziň hormatyna bagyşlanýar. Şeýle dabaraly çäreleriň biri-de türkmen halkynyň milli baýlygy we buýsanjy bolan behişdi bedewlerimiziň dünýädäki şan-şöhratyny has-da belende galdyrmak maksady bilen şeýle hem «Türkmen bedewiniň baýramy mynasybetli bäsleşikleri geçirmek hakynda» Türkmenistanyň Prezidentiniň 2012-nji ýylyň 16-njy noýabrynda çykaran 12657-nji Kararyna laýyklykda Ahalteke atlarynyň gözelligini şekillendiriş we amaly-haşam sungatynyň eserlerinde, neşir önümlerinde, fotosuratlarda, teleýaýlymlarda, çeper beýan etmek ugrunda suratkeşleriň, heýkeltaraşlaryň, halyçylaryň, zergärleriň, fotosuratçylaryň, neşirýat işgärleriniň, dizaýnerleriň, teleoperatorlaryň arasyndaky bäsleşigi ýokary derejede geçirildi. Döredijilik bäsleşiginde alty sany ugur boýunça has tapawutlanan eserlere ýokary baha berildi. Olaryň hatarynda Türkmenistanyň Döwlet çeperçilik akademiýasynda zähmet çekýän ýaş mugallymlaryň baýrakly orunlara mynasyp bolmagy ýatdan çykmajak wakalara besledi. Türkmenistanyň Döwlet çeperçilik akademiýasynyň «Heýkeltaraşlyk» kafedrasynyň mugallymy Ahat Mälikowyň «Türkmen bedew aty – Toýly» atly heýkel eseri döredijilik tarapdan täsir galdyryjy owadan hereketi bilen taraşlanýar. Sungat ojagynyň «Dizaýn» kafedrasynyň mugallymy Rustam Kurbanowyň «Toýly Watanym» atly nakgaş eserinde milli at-şaýsepleri bilen bezelen gözelligi, ýyndamlygy, wepalylygy bilen haýran galdyrýan behişdi bedewimiziň keşbi ak mermere beslenen Aşgabat şäherimiziň çeper sazlaşygynda beýan edilýär. Şeýle-de «Amaly-haşam sungaty» kafedrasynyň mugallymy Begençgeldi Amanowyň «Türkmen bedew aty şaý-sep toplumy» döwrebap öwüşgin berlen inçeden sünnäligi, nepisligi, ganatly bedewlerimiziň gözelligine ýaraşykly hem-de sazlaşykly ýasalandygy bilen tapawutlandy. Ýaş mugallymlarymyz ajaýyp döredijilik eserleri bilen aýratyn tapawutlanyp Hormatly Prezidentimiz Arkadagly Gahryman Serdarymyzyň Şa Serpaýyna mynasyp boldular. Ata – Watanyňa, milli gymmatlyklaryňa bolan hormatyňy kämil eserler bilen dünýä ýaýmak ýaş mugallymlar üçin uly bagtdyr. Bilbil ÇARYÝEWA, Türkmenistanyň Döwlet çeperçilik akademiýasynyň Ylym bölüminiň başlygy
Kitaphanalar
24.04.2026Türkmenistanyň Döwlet medeniýet merkeziniň Döwlet kitaphanasynyň Daşary ýurt dillerindäki edebiýatlar bölüminde “Kitap geljegiň habary, geçmişiň sapagy” ady bilen kitaphana işi barada söhbetdeşlik geçirildi. Berkarar döwletiň täze eýýamynyň Galkynyşy döwründe ýurdumyzyň ähli ulgamlary bilen bilelikde medeniýet ulgamynda, şeýle hem onuň aýratyn ugry bolan kitaphanalar we kitaphana işini hemmetaraplaýyn ösdürmekde, düýpli özgertmeler amala aşyrylýar. Bu özgertmeleriň çäklerinde dürli ugurlar boýunça ýokary hünärli işgärleri taýýarlamaga aýratyn ähmiýet berilýär. Ýaşlaryň dünýä ülňülerine laýyklykda döwrebap bilim almagy, ylym bilen meşgullanmagy üçin ähli zerur şertler döredilýär. Söhbetdeşlikde çykyş edenler kitabyň adamzadyň durmuşynda deňsiz-taýsyz gymmatlykdygyny örän jaýdar belläp geçdiler. Biziň ata-babalarymyz kitaba aýratyn hormat goýupdyrlar. Hut şonuň üçin hem ol adamy aň-düşünje ummanyna, ylmyň-bilimiň täze menzillerine, giňişliklerine tarap alyp gidýär diýip, söhbetdeşlige gatnaşanlar belläp geçdiler. Bize işlemäge uly mümkinçilikleri döredip berýän türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň belent başlary aman, janlary sag bolmagyny, il-ýurt bähbitli işleriniň elmydama rowaçlyklara beslenmegini arzuw edýäris.
