HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

TÜRKMENISTANYŇ PREZIDENTI RUSSIÝA FEDERASIÝASYNYŇ HÖKÜMETINIŇ BAŞLYGYNYŇ ORUNBASARYNY KABUL ETDI

Täzelikler

14.10.2025

13-nji oktýabrda hormatly Prezidentimiz Serdar Berdimuhamedow ýurdumyza sapar bilen gelen Russiýa Federasiýasynyň Hökümetiniň Başlygynyň orunbasary Marat Husnullini kabul etdi. Myhman wagt tapyp kabul edendigi üçin hoşallyk bildirip, Russiýada Türkmenistan bilen strategik hyzmatdaşlyga ýokary baha berilýändigini belledi hem-de pursatdan peýdalanyp, Russiýa Federasiýasynyň Prezidenti Wladimir Putiniňwe Hökümetiniň Başlygy Mihail Mişustiniň hormatly Prezidentimize hem-de Gahryman Arkadagymyza iberen mähirli salamyny ýetirdi. Şeýle-de myhman Türkmenistanyň durmuş-ykdysady ulgamda gazanýan üstünlikleriniň, türkmen halkynyň baý taryhynyň, medeniýetiniň özünde uly täsir galdyrandygyny belledi. Hormatly Prezidentimiz Russiýa Federasiýasynyň Hökümetiniň Başlygynyň orunbasaryny mähirli mübärekläp, Russiýanyň ýolbaşçylaryna salamyny we iň gowy arzuwlaryny beýan etdi hem-de myhmanyň şu gezekki saparynyň ýurtlarymyzyň arasyndaky yzygiderli hökümetara dialogy dowam etdirmekde möhüm ähmiýetini belledi. Döwlet Baştutanymyz myhmana türkmen kärdeşleri bilen gepleşikleri, Ykdysady hyzmatdaşlyk boýunça hökümetara türkmen-rus toparynyň nobatdaky mejlisini üstünlikli geçirmegi arzuw edip, duşuşyklaryň netijeleriniň özara bähbitli ikitaraplaýyn hyzmatdaşlygy ösdürmäge täze itergi berjekdigine ynam bildirdi. Duşuşygyň dowamynda bellenilişi ýaly, Türkmenistan Russiýa Federasiýasy bilen strategik hyzmatdaşlygy pugtalandyrmaga aýratyn ähmiýet berýär. Häzirki wagtda ýurtlarymyzyň arasynda dostluk, ynanyşmak we deňhukuklylyk ýörelgelerine esaslanýan gatnaşyklar ähli ugurlarda üstünlikli ösdürilýär. Şunuň bilen baglylykda, söhbetdeşler özara hyzmatdaşlygyň diňe bir ikitaraplaýyn derejede däl, eýsem, köptaraplaýyn formatda hem netijeli ilerledilýändigini kanagatlanma bilen bellediler. Ýurtlarymyzyň BMG-niň we GDA-nyň çäklerindäki hyzmatdaşlygy munuň aýdyň mysalydyr. Şunda “Merkezi Aziýa-Russiýa” formatyndaky hyzmatdaşlygyň ähmiýeti aýratyn nygtaldy. Söwda-ykdysady ulgam türkmen-rus hyzmatdaşlygynyň möhüm ugrudyr. Köp ýyllaryň dowamynda Russiýa Federasiýasy ýurdumyzyň esasy söwda hyzmatdaşlarynyň biri bolup gelýär. Döwletara gatnaşyklarda medeni-ynsanperwer ulgamdaky hyzmatdaşlyga möhüm ähmiýet berilýär. Şunda ylym-bilim, saglygy goraýyş, medeniýet ugurlary aýratyn orun eýeleýär. Duşuşygyň ahyrynda hormatly Prezidentimiz Serdar Berdimuhamedow hem-de Russiýa Federasiýasynyň Hökümetiniň Başlygynyň orunbasary Marat Husnullin iki ýurduň hem däp bolan dostlukly döwletara dialogy mundan beýläk-de ösdürmäge taýýardygyny tassyklap, birek-birege iň gowy arzuwlaryny beýan etdiler. _________________ «Türkmenistan» gazeti

GAHRYMAN ARKADAGYMYZYŇ ESERLERINIŇ TERBIÝEÇILIK ÄHMIÝETI

Kitaphanalar

13.10.2025

Aşgabat şäher medeniýet müdirliginiň Merkezleşdirilen kitaphanalar ulgamynyň Mollanepes adyndaky kitaphana şahamçasy bilen Aşgabat şäherindäki syýahatçylyk orta hünär okuw mekdebiniň bilelikde guramagynda «Gahryman Arkadagymyzyň eserleriniň terbiýeçilik ähmiýeti» ady bilen göçme kitap sergisi gurnaldy we wagyz-nesihat çäresi geçirildi. Çärede çykyş edenler Gahryman Arkadagymyzyň jöwher paýhasyndan dörän ajaýyp eserleri şu günki günümiziň eýeleri bolan ýaş nesillerimiziň bilimini artdyrmakda, dünýägaraýşyny baýlaşdyrmakda, zähmetsöýerlik, Watana, halka wepalylyk, geçmişimize, şu günümize buýsanç ruhunda terbiýelemekde ähmiýetiniň örän ulydygy barada giňişleýin gürrüň berdiler. Çäräniň ahyrynda bize şeýle ajaýyp eserleri peşgeş berýän türkmen halkynyň Milli Lideri Gahryman Arkadagymyza, Arkadagly Gahryman Serdarymyza alkyş sözlerini aýtdylar.

TÜRKMEN BITARAPLYGY-DÜNÝÄ NUSGALYK ÝÖRELGE

Kitaphanalar

13.10.2025

Magtymguly adyndaky ýaşlar guramasynyň Arkadag şäher geňeşiniň gurnamagynda, Döwletmämmet Azady adyndaky Arkadag şäher kitaphanasynyň gatnaşmagynda «Türkmen Bitaraplygy-dünýä nusgalyk ýörelge» atly söhbetdeşlik gurnaldy. Söhbetdeşligiň dowamynda Bitaraplyk-türkmen ruhuny galkyndyryp, täze ykbal bagyş eýlän mukaddeslik, türkmen üçin ömrüniň aýdymyna, bagtly gelejege gönezlik boljak her bir günleriň öýdümine deňelýän gymmatlyk, türkmeniň Watan içre Watany hasaplaýan, halkymyzy müdimilik juwan eýlän baýlyk, agzybirligiň nyşanydygy şeýle hem Türkmenistanyň Bitaraplyk syýasaty, halkara derejesinde ykrar edilip, dünýä ýurtlary bilen dostlukly we özara bähbitli gatnaşyklary ösdürmekde möhüm ähmiýete eýedigi barada bu syýasat, sebitde we dünýäde parahatçylygy, durnuklylygy we ösüşi üpjün etmekde möhüm goşant goşýandygy hakynda giňişleýin gürrüňler edildi. Söhbetdeşligiň ahyrynda türkmen halkyny baky bagtyýarlygyň gujagynda ýaşadýan türkmen halkynyň Milli Lideri Gahryman Arkadagymyza, hormatly Prezidentimiz Arkadagly Gahryman Serdarymyza hoşallyk sözleri aýdyldy.

ASYLLYLYK-TÜRKMEN ZENANLARYNYŇ ZYNATY

Kitaphanalar

13.10.2025

Türkmenistanyň Döwlet medeniýet merkeziniň Döwlet kitaphanasynda Türkmenistanyň Döwlet medeniýet merkeziniň Kärdeşler arkalaşygy guramasy, Merkeziň ilkinji zenanlar guramasy bilen bilelikde «Asyllylyk-türkmen zenanlarynyň zynaty» ady bilen wagyz-nesihat çäresi geçirildi. Çärede çykyş edenler Türkmenistanyň Döwlet medeniýet merkeziniň Kärdeşler arkalaşygy guramasy, Merkeziň ilkinji zenanlar guramasy şeýle hem Döwlet kitaphanasynyň işgärleri «Asyllylyk-türkmen zenanlarynyň zynaty» atly wagyz-nesihat çäresinde çykyş etmek bilen, türkmen gelin-gyzlarymyzyň ene-mamalarymyzdan gelýän asylly däp-dessurlarynyň,biziň durmuşymyzda uly terbiýe mekdebi bolup gelýändigini nygtadylar.Türkmen zenanlary öz asylly häsiýetlerini maşgalada öz gyzlarynyň-gelinleriniň aňyna guýýarlar. Ulyny sylamak, kiçä hormat goýmak,köpçülik ýerlerinde özüni asylly alyp barmak, biziň ýaşajyk gyzjagazlarymyzyň çagalykdan aňyna guýulýar. Sebäbi her bir maşgala biziň jemgyýetimiziň bir bölegi bolup durýar. Gelin-gyzlarymyzyň eliniň çeperligi,diliniň süýjüligi,her bir işde öň hatardalygy bizi begendirýär we buýsandyrýar diýip, çykyş edenler öz söhbetlerinde nygtamak bilen bize bagtyýar durmuşy peşgeş beren Gahryman Arkadagymyza,Arkadagly Gahryman Serdarymyza özleriniň alkyşlaryny aýtdylar.

KITAP OKAMAÝAN GÖRÝÄNINI GÖRER, KITAP OKAÝAN DÜNÝÄNI GÖRER

Kitaphanalar

13.10.2025

Türkmenistanyň Bazar Amanow adyndaky döwlet çagalar kitaphanasynyň agzybir hünärmenleri paýtagtymyzyň dürli künjegindäki orta mekdeplerde täsirli söhbetdeşlikleri, wagyz-nesihat işlerini, baýramçylyk dabaralaryny yzygiderli geçirýärler. Geçirilýän medeni-köpçülikleýin çärelerde kitap söýüji ýaşlar bilen has ýakyn aragatnaşyk saklap, olaryň kitaphanamyza yzygiderli gelmegi üçin uly höwes hem-de gyzyklanma döredýärler. Ýaňy-ýakynda hünärmenlerimiz paýtagtymyzyň ýöriteleşdirilen 76-njy orta mekdebiniň kitaphanasynda kitap söýüji ýaşlar bilen okamagyň, öwrenmegiň ähmiýeti barada «Kitap okamaýan görýänini görer, kitap okaýan dünýäni görer» atly söhbetdeşlik geçirdi. Söhbetdeşligiň dowamynda kitabyň gadyr-gymmaty barada täsirli gürrüňler edildi. Kitaphanaçylarymyz höwesjeň we isleg bildirýän okuwçylary kitaphanamyzyň täze okyjylary hökmünde kabul edip, olara okyjy biletlerini gowşurdylar. Söhbetdeşligiň ahyrynda ýaş nesilleriň ýagty geljegi ugrunda uly aladalar edýän Gahryman Arkadagymyza, Arkadagly Gahryman Serdarymyza alkyş sözleri beýan edildi.

TÜRKMENISTANYŇ HALK BAGŞYSY ORAZ SALYR HAKYNDA ÝATLAMALAR

Täzelikler

13.10.2025

Ö.Gandymowyň ýatlamasy (Türkmenistanyň at gazanan medeniýet işgäri): Geçen asyryň 80-nji ýyllarynda bagşyşynas A.Aşyrow meşhur Oraz Salyr hakynda teleýaýlymda çykyş etdi. Ol ussat Sahy bagşa Oraz Salyr barada gürrüň bermegi haýyş edýär: “Oraz Salyr bilen köp toýlarda çykyş etmek miýesser etdi. Ol Hudaý beren bagşydy. Ol bagşyçylyk sungatynda arkasy ýere degmedik bagşydy, aýdym sungatynda has-da pälwandy. Onuň gaýnap, joşup duran aýdymyny bir gezek diňlän adam oňa bendi bolýardy. Oraz Salyryň aýdymyny hiç bir bagşy bilen deňär ýaly däldi. Onuň beýik sungatyny ýaşlar ürç edip ýöredýär. Ý.Narlyýewiň ýatlamasy (Salyr bagşyçylyk ýolunyň wekili): Türkmenistanyň halk bagşysy Oraz Salyryň pälwan sypat göwresi, nurana keşbi köpleriň dilinde bolupdyr. Ol toýlarda we tomaşalarda göreş tutar eken. Oňa köp ýyllar etrapda göreş tutmakda taý gelen adam bolmandyr. Orazyň ýanynyň ýere degmedikligi üçin “Guduman” ady alypdyr (bu sözüň manysy gaýratly, gujurly diýmegi aňladýar). Guduman bagşynyň ýerine ýetiren “Ýok meniň”, “Aýlansam”, “Köne güzer”, “Bigäne ýagşy”, “Elden gider”, “Arzygül” ýaly aýdymlary bolsa ýaş bagşylarymyz tarapyndan häzirki günlerimizde hem ýerine ýetirilýär. Uruş weterany Ý.Şirowyň ýatlamasy (Garaman obasy): 1936-njy ýylda bir gije biziň öýümizde aýdym diňlemek üçin üýşdik. Muhy bagşy “Şasenem-Garyp” dessanyny aýdyp otyrdy. Märekede oturanlardan biri Muhy bagşa ýüzlenip: “Muhyjan sen bir tükeniksiz hazyna, haýsy ugurdan goýberseň, erkimizi elimizden alýarsyň! Gaýgy-gamy ýadawlygy aýryp, şatlyk berýärsiň!”– diýip söhbede başlady. Oraz Salyra “Guduman” adyny il-gün ýöne ýere dakan däldir. Şol barada gürrüň berseňiz hezil edip, diňlärdik”- diýip, ol Muhy bagşa ýüzlendi. Şonda Muhy bagşy şeýleräk gürrüň beripdi: “Adamlar men Oraz Salyr bilen köp ýerlerde köp toýlary sowdum. Öz etrabymyzda, goňşy etraplarda, Aşgabatda, Tejende we Maryda toý bolsa, bizi çagyrardylar. Oraz hakda näçe öwgüli sözleri aýtsaň hem bärden gaýdýar. Türkmen halk aýdymlarynyň sazyny nota geçiren W.Uspenskiý Sarahsa gelende biziň öýde boldy. Ol menden Oraz Salyr bilen tanyşdyrmagymy haýyş etdi. Men Oraz Salyry öýe çagyrdyp, W.Uspenskiý bilen duşurdym. Şonda Oraz “Durnalar” aýdymy aýtdy, men bolsa sazyny çalypdym. Aýdymyň dowamynda W.Uspenskiniň gözünde ýaş alamatlary peýda boldy. Soň ol aýdym gutarandan soň aýyplaşmaň, siziň şirin sazyňyzyň we aýdymyňyzyň men içine girip, öýümi, ilimi ýatladym diýip, Oraza ýüzlendi: “Sen aýdym-sazyň hakyky ussady, türkmeniň bilbili ekeniň”-diýip, beýik alym W.Uspenskiý bagşynyň ilkinji aýdymyny diňläninde, oňa mynasyp baha berdi. Elbetde, Oraz örän sypaýy we adamkärçilikli adamdy. Onuň tarypyny söz bilen ýetirip biljek däl. Meniň düşünişim boýunça il-gün “Oraz Salyra “Guduman bagşy” diýmekleri, onuň sesiniň şeýle ýiti bolanlygy üçin bolmaly”–diýip Muhy bagşy sözüni soňlady. ___________________ Ýatlamalary toplan: Arzygül WELSÄHEDOWA Maýa Kulyýewa adyndaky TMK-nyň “Sazşynaslyk” fakultetiniň IV ýyl talyby

DÜNÝÄ GÖZELLIKLERINI ZENANLAR WASP EDENDE

Kitaphanalar

13.10.2025

Arkadag şäher taryhy we ülkäni öwreniş muzeýinde «Dünýä gözelliklerini zenanlar wasp edende» ady bilen keramikaçy gelin-gyzlaryň döredijiliginiň sergisi açyldy. Bu sergi Gülnara Babaýewa we şägirtleriniň sergisi. Halkyny şeýle eşretli, abadan durmuşda ýaşadýan Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, il-ýurt bähbitli işleriniň hemişe rowaç bolmagyny arzuw edýäris.

SAGDYNLYK RUHYBELENTLIGIŇ AÝDYŇ ÝOLY

Kitaphanalar

11.10.2025

Döwletmämmet Azady adyndaky Arkadag şäher kitaphanasy we Arkadag şäheriniň Köpugurly hassahanasynyň bilelikde gurnamaklarynda Saglyk güni mynasybetli «Sagdynlyk Ruhybelentligiň aýdyň ýoly» ady bilen kitap sergi gurnaldy. Gahryman Arkadagymyzyň, saýasynda Arkadagly Gahryman Serdarymyzyň parasatly baştutanlygynda Berkarar döwletimiziň bagtyýarlyk döwründe ýurdumyzda halkyň saglygy baradaky alada döwlet derejesine çykaryldy. “Halkara parahatçylyk we ynanyşmak” ýylynda hormatly Prezidentimiziň öňdengörüjilikli syýasaty netijesinde ýurdumyzda saglygy goraýyş ulgamynda uly üstünlikler gazanylýar. Jemgyýetiň esasy baýlygy hökmünde adamlaryň saglygyny goramak baradaky alnyp barylýan işler ýurdumyzda buýsanç bilen bellenilmäge mynasypdyr. Serginiň dowamynda ýaş nesillerimiziň bagtyýarlygy, sagdynlygy ugrunda nusgalyk işleri durmuşa geçirýän Gahryman Arkadagymyza, hormatly Prezidentimiz Arkadagly Gahryman Serdarymyza köp sagbolsun aýdýarys.

MERKEZI AZIÝADA ÝITMEK HOWPY BOLAN MIRASY GORAMAK BOÝUNÇA SEMINAR: TÜRKMENISTANYŇ TEJRIBESI

Halkara gatnaşyklary

11.10.2025

2025-nji ýylyň 6-8-nji oktýabry aralygynda Almaty şäherinde “Merkezi Aziýada mirasyň ýaşaýşyny goramak mümkinçiligini güýçlendirmek” atly seminar-maslahat geçirildi. Bu seminar-maslahat Gazagystanyň, Gyrgyzystanyň, Özbegistanyň, Täjigistanyň we Türkmenistanyň wekiliýetleriniň gatnaşmagynda Almaty şäherindäki ÝUNESKO-nyň sebit bölümi tarapyndan gurnaldy. Türkmenistanyň Medeniýet ministrliginiň we ÝUNESKO-nyň işleri baradaky Türkmenistanyň milli toparynyň wekilinden ybarat bolan türkmen wekiliýeti, maddy däl medeni mirasy goramagyň mehanizmlerini gowulandyrmaga gönükdirilen diskussiýalara we amaly gönükmelere işjeň gatnaşdy. Maslahatyň dowamynda gatnaşyjylar gyssagly gorag sanawyna girizmek üçin täzelenen anketalar bilen tanyşdylar, beýleki ýurtlaryň üstünlikli tejribelerini ara alyp maslahatlaşdylar. Maslahatyň çäginde Almatydaky “Qazaq Oner” senetçilik merkezine syýahat edildi. Bu ýerde merkeziň ýolbaşçylygyndaky wekiliýet bilen milli keçe, keramika we metal önümleriniň öndürýän ussahanalaryň öý goşlaryny we şaý-sepleri öndürmek prosesi bilen tanşyldy. Bu seminar Merkezi Aziýa ýurtlarynyň arasynda maddy däl medeni mirasy gorap saklamakda we halkara medeni mirasy goramak ülňülerini durmuşa geçirmekde hem-de tejribe alyşmakda, hyzmatdaşlygy pugtalandyrmakda möhüm ädim boldy. _________________ Güljan NOBATOWA Maddy däl medeni miras müdirligi.

KITAP DOST-DOGANLYK KÖPRÜSI

Halkara gatnaşyklary

11.10.2025

Türkmenistanyň Döwlet Medeniýet Merkeziniň Döwlet Kitaphanasynda Täjigistan respublikasynyň Türkmenistandaky adatdan daşary dolyygtyýarly ilçisi Niýatbekzoda Wafonyň, şeýle hem şol ilçihananyň üçünji sekretary Raşidow Mahmaşarifyň gatnaşmagynda “Kitap dost-doganlyk köprüsi” ady bilen täjik edebiýatlarynyň sergisi guraldy. Bu guralan kitap sergisinde, Täjigistan Respublikasynyň ýazyjy-şahyrlarynyň döreden eserleri, Gahryman Arkadagymyzyň täjik diline terjime edilen ajaýyp kitaplary, şeýle hem täjik edebiýatlarynyň türkmen diline geçirilen nusgalary bu guralan kitap sergisini bezedi.Kitaphana gelen okaýjylar türkmen we täjik dillerindäki kitaplar bilen giňişleýin tanyş boldular. Serginiň açylyşynda çykyş edenler iki doganlyk ýurduň dost-doganlyk gatnaşyklarynyň ösmeginde kitabyň örän uly ähmiýetiniň bardygyny nygtadylar.Şeýle hem kitap sergisiniň çäklerinde olar döwlet kitaphanasyna täjik dilindäki birnäçe edebiýatlary sowgat berdiler.Bu bolsa iki doganlyk halkyň medeniýetiniň we sungatynyň has hem ösmegine öz täsirini ýetirer.

• ←
• 1
• ...
• 193
• 194
• 195
• ...
• 257
• →