Muzeýler
16.04.2026Türkmenistanyň Beýik Saparmyrat Türkmenbaşy adyndaky şekillendiriş sungaty muzeýinde 2026-njy ýylyň 17-nji aprelinde «Bedew waspy - sungatda» atly sergisiniň açylyş dabarasyna çagyrýarys. Sergi sagat 14:00-da açylýar. Biziň salgymyz: Aşgabat ş. (A.Nowaýy) 2022. köçesiniň 88-nji jaýy Habarlaşmak üçin tel: 92-71-69
Täzelikler
16.04.2026Türkmen halkynyň Milli Lideri Gahryman Arkadagymyzyň hem-de hormatly Prezidentimiziň taýsyz tagallalary netijesinde, türkmen medeniýetini, sungatyny, edebiýatyny ösdürmek ugrunda giň gerimli işler alnyp barylýar. Häzirki döwürde ýurdumyzyň welaýatlaryndaky Medeniýet öýleriniň we medeniýet merkezleriniň işini kämilleşdirmek, oba ilatyna medeni taýdan hyzmat etmek, oba ýaşaýjylarynyň dynç alyş wagtlaryny täsirli geçirmek maksady bilen, medeniýet we sungat işgärleriniň, ýazyjy-şahyrlaryň gatnaşmaklarynda döredijilik duşuşyklary yzygiderli geçirilýär. Şu ýylyň 10-11-nji aprelinde Daşoguz welaýatynda geçirilen aýdym-sazly döredijilik duşuşyklary hem täsirli pursatlara baý boldy. Şabat etrabynyň Dilewar geňeşliginiň Altyn ýol oba medeniýet öýünde, Gubadag etrap medeniýet öýünde geçirilen «Bedew batly öňe barýar Garaşsyz Türkmenistan!» atly aýdym-sazly döredijilik duşuşyklarynda «Biznes reklama» gazetiniň bölüm redaktory, Türkmenistanyň Hormatly il ýaşulusy, ýazyjy Gurbannazar Orazgulyýew, «Türkmen dünýäsi» gazetiniň jogapkär kätibi, Türkmenistanyň at gazanan žurnalisti Döwrangeldi Agalyýew, Türkmenistanyň Medeniýet ministrliginiň Döredijilik işgärleri bölüminiň başlygynyň orunbasary, Türkmenistanyň at gazanan medeniýet işgäri Akmyrat Rejebow, Daşoguz welaýat teleradio studiýasynyň gepleşikleri gurnaýjysy we taýýarlaýjysy, Türkmenistanyň Prezidentiniň «Türkmeniň Altyn asyry» atly bäsleşiginiň ýeňijisi, şahyr Dädebaý Nartyýew, Türkmenistanyň halk artisti Sähetmämmet Rejepbaýew, Türkmenistanyň at gazanan artisti Bibinur Aşyrowa, Daşoguz welaýatynyň Nurmuhammet Andalyp adyndaky döwlet sazly drama teatrynyň artistleri, Türkmenistanyň at gazanan artistleri Halmyrat Şyhyýew, Babadurdy Babaýew dagy çykyş etdiler. Aýdymçylaryň ýerine ýetiren aýdym-sazlaryny, şahyrlarymyzyň okan goşgularyny, artistleriň çykyşlaryny tomaşaçylar şowhunly garşyladylar. 11-nji aprelde Görogly etrap medeniýet merkezinde Türkmenistanyň halk şahyry Durdy Gylyjyň doglan gününiň 140 ýyllygy, Türkmenistanyň halk ýazyjysy Kakabaý Ylýasowyň doglan gününiň 90 ýyllygy mynasybetli aýdym-sazly döredijilik duşuşygy geçirildi. Bu döredijilik duşuşygynda halypa ýazyjy-şahyrlar, şeýle hem, Türkmenistanyň halk şahyry Durdy Gylyjyň ogly, Görogly etrabynyň ýaşaýjysy, pensioner Aşyrgylyç Durdygylyjow, Daşoguz şäher 2-nji çagalar sungat mekdebiniň müdiri, şahyr Kakabaý Ylýasowyň agtygy Gülnabat Ylýasowa, Boldumsaz etrabynyň 8-nji orta mekdebiniň müdiriniň terbiýeçilik işleri boýunça orunbasary Aýgül Nazarowa, Görogly etrabynyň 29-njy orta mekdebiniň mugallymy Bahar Annaşowa, Türkmenistanyň Magtymguly adyndaky Ýaşlar Guramasynyň Daşoguz welaýatynyň Görogly etrap Geňeşiniň esasy hünärmeni Kemal Sabyrow dagy çykyş edip, halypa şahyrlaryň edebi mirasy, ömri, döredijiligi, olaryň eserlerinde ündelýän watansöýüjilik pikirleri barada tomaşaçylara gyzykly gürrüňleri berdiler. Soňra bu ýerde guralan dabaralar Görogly etrabynyň Durdy Gylyç adyndaky 46-njy orta mekdebinde «Watansöýüjiligi ündän şahyr» atly duşuşyk bilen dowam etdi. Durdy Gylyç adyndaky 46-njy orta mekdebiň binasynyň öňündäki Durdy Gylyjyň ýadygärliginiň öňünde mekdep okuwçylary çykyş edip, şahyryň goşgularyny okadylar. Bu mekdepdäki Durdy Gylyjyň edebi mirasyna degişli muzeý bilen tanyşlyk has-da täsirli boldy. Döredijilik duşuşyklarynda çykyş edenler türkmen edebiýatyny, medeniýetini we sungatyny ösdürmek ugrundaky belent maksatlary üçin, türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza tüýs ýürekden alkyşlaryny aýtdylar. Akmyrat REJEBOW, Türkmenistanyň at gazanan medeniýet işgäri
Kitaphanalar
16.04.2026Berkarar döwletiň täze eýýamynyň Galkynyşy döwründe 2026-njy ýyly “Garaşsyz, baky Bitarap Türkmenistan - bedew batly at-myradyň mekany” diýip atlandyrylýan ýylymyzda türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň baştutanlygynda gymmatly edebi mirasyny öwrenmeklige uly mümkinçilikler döredilýär. Bu günki günde ösüp gelýän ýaş nesillere taryhymyzy-edebi mirasymyzy öwrenmäge ähli şertler döredilýär. Türkmenistanyň Döwlet medeniýet merkeziniň Döwlet kitaphanasyň Seýrek neşirler bölümi tarapyndan bölümiň okalga zalynda “Arkadagly Watanyň buýsanjy siz Pyragy” atly kitap sergisi gurnaldy. Sergide Seýrek neşirler bölüminde bar bolan gadymy kitaplaryň we gazna täze gelip gowşan kitaplaryň sergisi gurnaldy. Milli mirasy öwrenmek we olary düýpli ýola goýmak bilen, halkymyza asyrlaryň jümmüşinden gözbaş alýan ýol-ýörelgeleri, däp-dessurlary, täzeden dikeltmeklige, medeni we ruhy mirasyň il-günüň köňül ganatyna öwrülmegine giň mümkinçilik döretdi. Türkmen halky öz taryhy ösüşiniň dowamynda ruhy gymmatlyklaryna hemişe uly gadyr goýup, oňa aýratyn ähmiýet berip gelipdir. Asyrlaryň jümmüşinden gözbaş alýan ýol-ýörelgeleri, däp-dessurlary, täzeden dikeltmeklige, medeni we ruhy mirasyň il-günüň köňül ganatyna öwrülmegine giň mümkinçilik döredip beren türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlarynyň sag bolmagyny, ömürleriniň uzak bolmagyny, alyp barýan döwletli işleriniň rowaçlyklara beslenmegini arzuw etdiler.
Kitaphanalar
16.04.2026Türkmenabat şäher merkezi kitaphanasynyň 2-nji şahamçasynyň hünärmenleri Türkmenabat şäheriniň 26-njy çagalar bakja bagynda “Akpamygy okap, düşüneliň doganlygyň gadryna” atly gürrüň geçirdiler. Bu ertekiniň esasy maksady ondaky baş gahrymanlaryň edermenligi, şeýle-de çagalary terbiýelemekdäki uly orny barada täsirli, gyzykly gürrüňler berdiler. Ertekiniň üsti bilen körpeleriň edepli, ula hormat goýup, kiçä sylagly bolmalydygy hem-de kitap okamagyň adam saglygyna peýdasy barada bellediler. Şeýle-de çagalar bilen ertekiniň gahrymanlary esasynda özara gyzykly sorag-jogap alyşdylar. Bu geçirilen gürrüň çagalarda uly täsir galdyrdy.
Kitaphanalar
16.04.2026Aşgabat şäher medeniýet müdirliginiň Merkezleşdirilen kitaphanalar ulgamynyň Garadamak şäherçe kitaphana şahamçasy bilen Aşgabat şäherindäki syýahatçylyk orta hünär okuw mekdebiniň bilelikde guramagynda «Garaşsyz, baky Bitarap Diýar, bedew batly ýurdum öňe barýar» ady bilen wagyz-nesihat çäresi geçirildi. Çärede çykyş edenler ösüş-özgerişleriň ýolundan bedew bady bilen ynamly öňe barýan Garaşsyz, hemişelik Bitarap Türkmenistan Watanymyzyň her bir güni şanly wakalara beslenýändigi, Gahryman Arkadagymyz, Arkadagly Gahryman Serdarymyz halkymyzyň ýaşaýyş-durmuşyny dünýä ülňülerine laýyklykda kämilleşdirmekde durmuşa geçirýän beýik başlangyçlarynyň, oňyn özgertmeleriniň dabaralanýandygynyň aýdyň subutnamasydygy barada gürrüň berdiler. Çäräniň ahyrynda bedew batly ösüşler bilen ýurdumyzy täze üstünliklere besleýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Kitaphanalar
16.04.2026Aşgabat şäher medeniýet müdirliginiň Merkezleşdirilen kitaphanalar ulgamynyň Ata Salyh adyndaky kitaphana şahamçasy bilen 76–njy orta mekdebiniň bilelikde guramagynda «Halkyň saglygy – ýurduň baýlygy» ady bilen gürrüňdeşlik geçirildi. Çärede çykyş edenler “Garaşsyz, baky Bitarap Türkmenistan – bedew batly at- myradyň mekany” ýylynda sagdyn nesil – kuwwatly Watan, beden taýdan berk, ruhy taýdan kämil we belent maksatlara okgunly ýaşlarymyz döwletimiziň sarsmaz sütüni bolup, sagdyn durmuş ýörelgesiniň ýurdumyzda milli gymmatlyga öwrülmegi rowaçlyklaryň we ösüşiň iň ygtybarly kepili bolup durýandygy barada giňişleýin gürrüň berdiler. Şeýle-de Alym Arkadagymyzyň dermanlyk ösümlikler barada häzirki zaman lukmançylygynyň dünýä tejribesinde gazananlarynyň üstüni ýetirýänligi, dermanlyk ösümlikleriniň ylmy esasda öwrenilişini, olaryň melhemlik häsiýetlerini ajaýyp kitaplarynyň üsti bilen türkmen halkyna ýetirenligi barada belläp geçdiler. Çäräniň ahyrynda Türkmenistan Watanymyzda raýatlaryň eşretli, bagtyýar, sagdyn durmuşda ýaşamaklary, esasan hem ýaş nesillerimiziň sagdyn kemala gelmekleri, berk bedenli, giň dünýägaraýyşly adamlar bolup ýetişmekligi babatda döredip berýän ähli mümkinçilikleri üçin Gahryman Arkadagymyza hem-de Arkadagly Gahryman Serdarymyza çäksiz alkyşlaryny beýan etdiler.
Kitaphanalar
16.04.2026Aşgabat şäher medeniýet müdirliginiň Merkezleşdirilen kitaphanalar ulgamynyň Kerim Gurbannepesow adyndaky kitaphana şahamçasynyň guramagynda 97-nji çagalar bagynda hormatly Prezidentimiziň kabul eden «Türkmenistanyň kitaphana ulgamyny ösdürmegiň 2025-2029-njy ýyllary üçin döwlet maksatnamasy» esasynda «Türkmen halk matallary» kitaby esasynda sowal-jogap bäsleşigi geçirildi. Çärede çykyş edenler matallar türkmen halk döredijiliginiň iň gyzykly we özboluşly görnüşleriniň biri bolup, matallaryň çaga terbiýesine çuňňur täsir etmäge ukybynyň bardygyny müňlerçe ýyl ozal akyl ýetirip, ony özleriniň ýaşaýyş-durmuş we edep-terbiýe mekdebine ymykly ornaşdyrandyklary hem-de çagalaryň çalt pikirlenmeklerini, ukyp başarnyklaryny ýüze çykarmakda, ýatkeşliginiň we ugurtapyjylygynyň ösmegine uly täsir edýändigi barada gürrüň berdiler. Çäräniň dowamynda çagalaryň söýgüli ertekileri, tapmaçalary we matallary esasynda birnäçe sowal-jogap alyşdylar. Çäräniň ahyrynda bagtyýar nesillerimiziň geljegi ugrunda atalyk aladalary edýän Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Syýahatçylyk
15.04.202614-nji aprelde paýtagtymyzdaky Söwda-senagat edarasynyň binasynda «Turkmentravel— 2026» atly halkara syýahatçylyk sergisine we maslahatyna gatnaşyjylara hormatly Prezidentimiziň iberen Gutlagynyň okalmagy bilen bu halkara çäresi dabaraly ýagdaýda öz işine başlady. Häzirki döwürde tutuş dünýäde syýahatçylyk pudagynyň ösdürilmegine uly üns berilýär. Ýurdumyzyň syýahatçylyk we taryhy-medeni mümkinçilikleri, halkymyzyň özboluşly milli däp-dessurlary, şäherlerimiziň gaýtalanmajak binagärlik keşbi dünýä syýahatçylarynda, jahankeşdelerinde uly gyzyklanma döredýär. Halkara sergide Medeniýet ministrliginiň pawilýonynda halkymyzyň şan-şöhratly geçmişi hem-de bedew batly ösüşleri sazlaşykly beýan edilýär. Halkara çäräniň çäklerinde daşary ýurtlaryň syýahatçylyk edaralarynyň, institutlarynyň we halkara guramalaryň ýolbaşçylary bilen, ýurdumyzyň Medeniýet ministrliginiň hem-de Türkmen döwlet medeniýet institutynyň ýolbaşçylarynyň arasynda ikitaraplaýyn hyzmatdaşlyk bilen bagly meseleleri ara alyp maslahatlaşmak maksady bilen duşuşyklaryň, şeýle hem, syýahatçylyk ugurlaryny işläp taýýarlamak boýunça özara pikir alyşmak, syýahatçylyk kärhanalarynyň arasynda hyzmatdaşlyk etmek hakynda resminamalara gol çekişmek çäreleriniň guralmagy halkara çäräniň ähmiýetini has-da artdyrýar.  Şonuň ýaly hem, Türkmen döwlet medeniýet institutynyň syýahatçylyk ugry boýunça okadýan mugallymlarynyň we ýurdumyzyň syýahatçylyk kärhanalarynyň ýolbaşçylarynyň gatnaşmagynda, BMG-niň Bütindünýä Syýahatçylyk Guramasynyň halkara bilermenleriniň gatnaşmagynda syýahatçylygy dolandyrmak boýunça okuw maslahatynyň, daşary ýurtly myhmanlar bilen Türkmen döwlet medeniýet institutynyň syýahatçylyk ugry boýunça okadýan mugallymlarynyň, bu ugurdan bilim alýan talyplarynyň gatnaşmagynda «Syýahatçylyk — medeniýetleriň köprüsi: syýahatçylykda durnukly ösüş we halkara hyzmatdaşlyk» atly ylmy-amaly maslahatyň geçirilmegi, maslahatda syýahatçylyk ulgamynda hünärmenleri taýýarlamak we gaýtadan taýýarlamak, syýahatçylygy dolandyrmak, onuň akymyny köpeltmek we beýleki meseleler boýunça çykyşlara uly orun berilmegi bellenmäge mynasypdyr.  Türkmen halkynyň köp asyrlaryň dowamynda döreden milli gymmatlyklary, taryhy ýadygärlikleri, baý medeni mirasy, däp-dessurlary umumadamzat gymmatlyklarynyň genji-hazynasynda orun aldy. Milli sungatymyzyň naýbaşy nusgalarynyň, gadymy gymmatlyklarymyzyň birnäçe görnüşleri ÝUNESKO-nyň Bütindünýä medeni mirasynyň we ÝUNESKO-nyň adamzadyň Maddy däl medeni mirasynyň görnükli nusgalarynyň sanawlaryna girizildi. Munuň özi örän buýsançlydyr. «Turkmentravel — 2026» atly halkara syýahatçylyk sergisine we maslahatyna gatnaşýan daşary ýurtly myhmanlar üçin syýahatçylyk gezelençleriniň guralmagy halkara serginiň hem-de maslahatyň ähmiýetini has-da artdyrýar. Hemişelik Bitarap Türkmenistan halkara syýahatçylyk hyzmatdaşlygyny ösdürmäge uly üns berýär. Häzirki döwürde syýahatçylyk halklary birleşdirýän köpri bolup hyzmat edýär. 14-16-njy apreli aralygynda geçirilýän bu halkara sergi we maslahat ýurdumyzyň taryhy-medeni, tebigy ýadygärliklerini, gözel ýerlerini mahabatlandyrmaga, daşary ýurtly syýahatçylary ýurdumyza çekmäge hem-de dürli ýurtlaryň syýahatçylyk kärhanalary we guramalary bilen hyzmatdaşlygy ýola goýmak, täze şertnamalary baglaşmak boýunça tejribe alyşmaga uly ýardam berer. «Turkmentravel – 2026» atly halkara syýahatçylyk sergisiniň we maslahatynyň «Garaşsyz, baky Bitarap Türkmenistan – bedew batly at-myradyň mekany» ýylynda geçirilmegi özboluşly ähmiýete eýedir. Häzirki döwürde ýurdumyz bedew batly ösüşleriň ak ýoly bilen ynamly öňe barýar. Döwletimizde syýahatçylyk ulgamynda gazanylýan uly üstünlikler bolsa, ýurdumyzyň halkara abraýyny has-da belende göterýär. Taýýarlan: Ogulgurban GAŞLAKOWA, Türkmenistanyň Medeniýet ministrliginiň Döredijilik işgärleri bölüminiň baş hünärmeni
Täzelikler
15.04.2026Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň parasatly ýolbaşçylygynda şan-şöhraty dünýä dolan eziz Diýarymyzda her bir günümiz toýdur, baýramlara beslenýär. 2026-njy ýylyň «Garaşsyz, baky Bitarap Türkmenistan – bedew batly at-myradyň mekany» ýyly diýlip yglan edilmegi, halkymyzyň taryhy ýoluny, häzirki ösüşlerini hem-de geljege bolan beýik ynamyny özünde jemläp, döwletimiziň okgunly ösüşleriniň bedew bady bilen öňe barýandygyny alamatlandyrýar. Şan-şöhraty dünýä dolan behişdi bedewlerimizi hem-de ajaýyp atşynaslyk sungatyny ylmy taýdan öwrenilmäge aýratyn ähmiýet berilýär. Umumadamzat gymmatlyklarynyň derejesinde ägirt uly açyşlary eden, kämilligiň beýik nusgasyny jahana peşgeş beren türkmen halky çydamly, wepaly, ýyndam bedew atlaryň saýlama tohumlaryny hem döredipdir. Ahalteke bedewlerimiz bu günki gün bagtyýar döwrümizde ýurdumyzyň ösüşleriniň belent depgininiň, asylly ýol-ýörelgeleriniň we mukaddes maksatlarynyň alamatyna öwrüldi. Her ýylyň aprel aýynyň soňky ýekşenbesinde Türkmen bedewiniň milli baýramynyň ýurdumyzda döwlet derejesinde bellenilmegi we dürli bäsleşikleriň, döredijilik sergileriň, at çapyşyklaryň geçirilmegi bedew atyň türkmeniň ruhy dünýäsindäki ornunyň ýokarydygyny aňladýar. Türkmen bedewiniň milli baýramy mynasybetli 2026-njy ýylyň 15-nji aprelinde sungat ojagymyz bolan Türkmenistanyň Döwlet çeperçilik akademiýasynyň Sergiler jaýynda «Garaşsyz, baky Bitarap ýurdumyzyň türkmen bedewleri sungat äleminiň genji-hazynasy» atly döredijilik eserleriniň sergisi geçirildi. Bu sergide ýaş mugallymlar we zehinli talyp ýaşlar şekillendiriş sungatynyň ähli ugurlary boýunça nakgaşçylyk, grafika, dizaýn, heýkeltaraşlyk we amaly-haşam sungaty eserlerinde behişdi bedewlerimiziň ýyndamlygyny, owadanlygyny, wepadarlygyny ussatlyk bilen wasp etdiler. Şeýle ajaýyp eserleriň biri hem «Grafika» kafedrasynyň 5-nji ýyl talyby Astankul Magtymgulyýewiň «Erkin bedew» atly nakgaş eseridir. Ýaş suratkeş ahalteke bedewlerimiziň owadanlygyny, ýyndamlygyny, wepadarlygyny öziniň nakgaş eserinde ussatlyk bilen görkezipdir. Ahalteke bedewleri eseriň merkezinde ýerleşdirilipdir. Eserdäki ak şäherimiz gözel Aşgabadyň ajaýyp keşbi, asuda asmanyň astynda, parahat zeminiň üstünde bedew bady bilen öňe sary barýan Watanymyzyň aýdyň nyşany bolup alamatlandyrylýar. Eserdäki ak kepderiler bolsa, Watanymyzyň asudalygyny, parahatçylygyny we agzybirligini aňladýar. Mundan başga-da zehinli talyplarymyz Yhlas Allanazarowyň «Erkana bedewler», Ýazgeldi Ilýasowyň «Bedew aty», Nurana Babamyradowanyň «Merjen atym», Güljahan Orazmämmedowanyň «Bedew bady» atly eserleri giň mazmunlylygy bilen has-da tapawutlanýar. Sungat ojagymyzda bilim alýan talyp ýaşlar türkmen halkynyň milli buýsanjy bolan behişdi bedewlerimizi sungatyň ähli ugurlary boýunça wasp etdiler. Her bir esere seredeniňde talyplaryň ýürek buýsanjyny görmek bolýar. «Amaly-haşam sungaty» kafedrasynyň 6-njy ýyl talyby Jeren Hudaýberdiýewanyň «Türkmen bedewi» atly haly eserinde-de behişdi bedewlerimiziň gözelligi wasp edilýär. Bu eser gözelligiň iň uly nusgasy bolup, ahalteke bedewini türkmen ýaýlasynda şekillendiripdir. Talyp çitimleriň üsti bilen gül-gülälege beslenen türkmen ýaýlasynda, erkin hereketde duran bedewiň ajaýyp keşbini janlandyrýar. Eseriň dört gyrasyny bolsa guşly göl nagşy bilen bezeýär. Türkmen halkynyň asyrlardan aşyp gelen baý medeni mirasyny, gadymy gymmatlyklaryny, milli sungatyny gorap saklamak, kämilleşdirmek, giňden wagyz etmek hem-de ýaşlaryň ukyp-başarnyklaryny açyp görkezýän bu döredijilik sergisi türkmen bedewine bagyşlanan baýramçylyk sowgady boldy. Oguljan DAÝYÝEWA, Türkmenistanyň Döwlet çeperçilik akademiýasynyň «Şekillendiriş sungatynyň taryhy we nazaryýeti» hünäriniň III ýyl talyby
Täzelikler
15.04.2026Hormatly Prezidentimiz Arkadagly Gahryman Serdarymyzyň, Gahryman Arkadagymyzyň parahatçylyk söýüjilik taglymaty bilen Garaşsyz, baky Bitarap Türkmenistan Watanymyz bedew bady bilen barha öňe barýar. “Garaşsyz, baky Bitarap Türkmenistan bedew batly at myradyň mekany” ýylynyň her bir güni şanly senelere, toý-baýramlara beslenýär. Baýramçylyklar mynasybetli dürli medeni çärelere we dabaralara uly orun berilýär. Şeýle konsertleriň biri Maýa Kulyýewa adyndaky Türkmen milli konserwatoriýasynda Lebap welaýat ýörite sungat mekdebiniň kamera horunyň konserti geçirildi. Bu aýdym-sazly agşam diňe bir sungat dabarasy bolman, eýsem, aýdym-saz dili bilen dabaralanýan ylmy-medeni çärä öwrüldi. Milli saz sungatymyzyň hazynasy bolan türkmen kompozitorlarynyň täzeçe äheňli eserleri, dünýä medeni mirasynyň aýrylmaz bölegi bolan, kalplary heýjana salýan aýdymlar ýaňlandy. Konsertiň başynda türkmen professional saz sungatynyň düýbüni tutujylaryň biri, Türkmenistanyň halk artisti W.Muhadowyň sazyny hor üçin täzeden işlän D.Sahatowyň “Söýgülim gelýär” eseri gyzlar tarapyndan ýerine ýetirildi. Kinofilm sazlarynyň nusgalary hem dabaranyň bezegine öwrüldi. R.Wildanowyň “Alowly ýollar” kinofilmi üçin ýazan “Elegiýa” eseri özboluşly öwüşginde ýaňlandy. Soňra beýik rus kompozitory P.Çaýkowskiýiň “Noçewala tuçka zolotaýa”, Awstriýaly kompozitor F.Şubertiň sazyny hor üçin täzeden işlän S.Strokiniň “Serenada”, häzirki zaman türkmen kompozitorçylyk mekdebiniň düýbüni tutujylaryň biri S.Tüýliýewiň “Ýaşaýşa söýgi”, gyzlar toparynyň ýerine ýetirmeginde bolsa P.Çesnakowyň “Zelýonyý şum”, D.Nuryýewiň “Çal dutarym” eserleri diňlendi. Türkmenistanyň halk artisti, ýiti zehinli kompozitor R.Allaýarowyň “Leýli saç” eserini aýdymçylar A.Hemraýew we III ýyl talyby Ö.Nepesowa, tanymal kompozitor B.Umitjanowyň “Eý, sanam” A.Hemraýew hor topary bilen bilelikde ýerine ýetirdiler. Hor topary bilen A.Hemraýewiň ýerine ýetiren A.Bäşimowyň “Mähriban Watan” aýdymy konsertiň jemleýji eseri boldy. Saz agşamynda ýaňlanan eserler diňleýjilerde uly täsir galdyrdy. Konsert medeni gatnaşyklaryň saz sungatyndaky dabaralanmasyna öwrüldi. Konsertiň dowamynda kamera horunyň ýerine ýetirilen eserlerine Türkmenistanyň halk artisti Bäşim Berdiýew dirižýorlyk etdi we oňa Aziza Arslanowa sazandarlyk etdi. Şeýle döredijilikli çäreler talyplaryň hor we wokal sungatynyň inçe tärlerini özleşdirmekleri we dünýä saz mirasyna bolan garaýyşlaryny kämilleşdirmekleri üçin möhüm ähmiýete eýedir. Konsertiň ahyrynda oňa gatnaşanlar ýaşlaryň ýokary derejede bilim almaklary üçin döredilip berilýän ähli mümkinçiliklerine Gahryman Arkadagymyza we hormatly Prezidentimiz Arkadagly Gahryman Serdarymyza çäksiz minnetdarlyklaryny aýtdylar. Bize baky bagtyýarlygy, eşretli zamanany, parahat durmuşy peşgeş beren, halkyny kalbynyň töründe ýaşadýan Gahryman Arkadagymyzyň we hormatly Prezidentimiz Arkadagly Gahryman Serdarymyzyň janlary sag, ömürleri uzak, il-ýurt bähbitli, umumadamzat ähmiýetli alyp barýan alyp işleri elmydama rowaçlyklara beslensin! Ogulbeg ÝEGENOWA, Maýa Kulyýewa adyndaky Türkmen milli konserwatoriýasynyň “Sazşynaslyk” hünäriniň III ýyl talyby
