HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

TÜRKMENISTANYŇ PREZIDENTI «ENOC» HEM-DE «DRAGON OIL» KOMPANIÝALARYNYŇ ÝOLBAŞÇYLARYNY KABUL ETDI

Täzelikler

23.10.2025

22-nji oktýabrda hormatly Prezidentimiz Serdar Berdimuhamedow «Emirates National Oil Company (ENOC)» hem-de «Dragon Oil» kompaniýalarynyň başlygy Said Al Taýeri, şeýle hem «Dragon Oil» kompaniýasynyň müdiriýetiniň başlygynyň wezipesini wagtlaýyn ýerine ýetiriji Abdulkarim Al Maazmini kabul etdi. Işewürler bildirilen myhmansöýerlik üçin hoşallyklaryny beýan edip, ýurdumyzyň ýangyç-energetika toplumyny diwersifikasiýa ýoly bilen ösdürmek boýunça durmuşa geçirilýän döwlet syýasatynyň üstünliklere beslenýändigini, Türkmenistanyň kuwwatly energetika döwleti hökmünde halkara giňişlikde abraýynyň barha artýandygyny bellediler. Şeýle hem olar Birleşen Arap Emirlikleriniň Prezidenti Şeýh Mohammed bin Zaýed Al Nahaýýanyň, wise-prezidenti, Premýer-ministri, Dubaýyň häkimi Şeýh Mohammed bin Raşid Al Maktumyň hem-de wise-prezidenti, Premýer-ministriniň orunbasary, Prezidentiň iş dolandyryş ministri Şeýh Mansur bin Zaýed Al Nahaýýanyň döwlet Baştutanymyza hem-de Gahryman Arkadagymyza iberen mähirli salamyny we iň gowy arzuwlaryny ýetirdiler. Işewürler amatly maýa goýum ýagdaýy döredilen Türkmenistanda iş alyp barmagyň özleri üçin uly hormatdygyny belläp, netijeli işlemäge berýän yzygiderli goldawlary üçin döwlet Baştutanymyza hem-de Gahryman Arkadagymyza hoşallyklaryny beýan etdiler. Hormatly Prezidentimiz hoşniýetli sözler üçin minnetdarlyk bildirip, Birleşen Arap Emirlikleriniň ýolbaşçylaryna iň gowy arzuwlaryny beýan etdi. Döwlet Baştutanymyz myhmanlaryň saparynyň dowamynda «Türkmenistanyň nebiti we gazy-2025» atly halkara maslahata we sergä gatnaşjakdyklaryny, ýurdumyzda bu ulgamda alnyp barylýan işler, ýetilen sepgitler bilen tanyşjakdyklaryny aýtdy hem-de olaryň geçirjek duşuşyklarynyň nebitgaz pudagynda ikitaraplaýyn gatnaşyklary mundan beýläk-de ösdürmäge we pugtalandyrmaga ýardam berjekdigine ynam bildirdi. Duşuşygyň dowamynda bellenilişi ýaly, häzirki wagtda Türkmenistan bilen Birleşen Arap Emirlikleriniň arasyndaky gatnaşyklar ikitaraplaýyn derejede, şeýle hem Birleşen Milletler Guramasynyň we beýleki halkara guramalaryň çäklerinde, däp bolşy ýaly, birek-birege hormat goýmak we özara düşünişmek esasynda depginli ösdürilýär. Häzirki wagtda nebitgaz pudagy ýurdumyzyň iň bir depginli ösýän pudaklarynyň biridir. Bu pudagy ösdürmegiň strategiýasy, esasan-da, ýerli çig maly ulanmak arkaly, milli ykdysadyýetimiziň pudaklary üçin zerur bolan, şeýle hem eksport ugurly önümleri öndürmäge gönükdirilendir. Şunuň bilen baglylykda, «Dragon Oil» kompaniýasy bilen hyzmatdaşlygyň toplanan oňyn tejribesi bellenildi. ___________________ «Türkmenistan» gazeti

TÜRKMENISTANYŇ PREZIDENTI HINDISTAN RESPUBLIKASYNYŇ ADATDAN DAŞARY WE DOLY YGTYÝARLY ILÇISINI KABUL ETDI

Täzelikler

23.10.2025

22-nji oktýabrda hormatly Prezidentimiz Serdar Berdimuhamedow Hindistan Respublikasynyň Türkmenistanda täze bellenilen Adatdan daşary we Doly ygtyýarly ilçisi Bandaru Wilsonbabuny kabul etdi. Ol döwlet Baştutanymyza ynanç hatyny gowşurdy. Diplomat duşuşmaga döredilen mümkinçilik üçin hoşallyk bildirip, giň gerimli özgertmeler ýoly bilen ynamly öňe barýan Türkmenistanda Hindistana wekilçilik etmegiň özi üçin uly hormatdygyny belledi hem-de mümkinçilikden peýdalanyp, Hindistan Respublikasynyň Prezidenti Draupadi Murmunyň we Premýer-ministri Narendra Modiniň hormatly Prezidentimize hem-de Gahryman Arkadagymyza iberen mähirli salamyny, iň gowy arzuwlaryny beýan etdi. Döwlet Baştutanymyz hoşniýetli sözler üçin minnetdarlyk bildirip, dostlukly ýurduň ýolbaşçylaryna iň gowy arzuwlaryny beýan etdi. Hormatly Prezidentimiz Bandaru Wilsonbabuny ýokary diplomatik wezipä bellenmegi mynasybetli gutlap, oňa iki ýurduň arasyndaky köpugurly gatnaşyklary mundan beýläk-de ösdürmäge gönükdirilen işinde uly üstünlikleri arzuw etdi. Duşuşygyň dowamynda bellenilişi ýaly, Türkmenistan Hindistan Respublikasy bilen däp bolan dostlukly gatnaşyklaryň we ýakyn hyzmatdaşlygyň ösdürilmegine möhüm ähmiýet berýär. Häzirki wagtda ýurtlarymyzyň arasyndaky ikitaraplaýyn gatnaşyklar syýasy-diplomatik, söwda-ykdysady, energetika, ulag, bilim we medeni-ynsanperwer ulgamlarda üstünlikli ösdürilýär. Döwletara gatnaşyklar özara hormat goýmak we birek-birege goldaw bermek ýörelgelerine esaslanýar. Bu bolsa, öz gezeginde, ikitaraplaýyn derejede, şeýle hem abraýly halkara guramalaryň çäklerinde hyzmatdaşlygy yzygiderli ösdürmek üçin berk binýat bolup hyzmat edýär. Türkmen-hindi gatnaşyklarynyň gün tertibinde söwda-ykdysady we energetika ulgamlaryndaky hyzmatdaşlyk aýratyn orun eýeleýär. Şunuň bilen baglylykda, özara ykdysady hyzmatdaşlygy ösdürmek, ilkinji nobatda, energetika we ulag pudaklarynda hyzmatdaşlyk üçin giň mümkinçilikleriň bardygy bellenildi. Bellenilişi ýaly, ýurdumyz Türkmenistan-Owganystan-Pakistan-Hindistan (TOPH) transmilli gaz geçirijisiniň we onuň bilen ugurdaş ulag geçelgeleriniň taslamalarynyň durmuşa geçirilmegini mundan beýläk-de işjeňleşdirmek ugrunda çykyş edýär. Bu geljegi uly taslamalar sebitde energiýa howpsuzlygyny üpjün eder we gatnaşyjy ýurtlaryň ykdysady ösüşine uly itergi berer. ___________________________ «Türkmenistan» gazeti

ALTYN GÜÝZÜŇ WASPY

Täzelikler

22.10.2025

2025-nji ýylyň 21-nji oktýabrynda Türkmenistanyň Medeniýet ministrliginiň guramagynda, Aşgabat şäherinde durky täzelenen Türkmenistanyň Garaşsyzlygynyň XV ýyllygy seýilgähinde, ýurdumyzyň şahyrlarynyň «Altyn güýzüň waspy» atly aýdyşyk äheňli çeper okaýyşlary geçirildi. Bolçulygyň, rysgal-bereketiň hem-de özboluşly gözelligiň pasly bolan güýz döredijilik adamlarynyň pikir-garaýyşlarynyň, duýgularynyň has-da kämilleşmegine uly täsirini ýetirýär. Şonuň üçin güýzde ýazylan eserler manyly kämil pikirlere baý bolup, kalbyňy täze oý-hyýallara doldurýar. Ynha, şeýle pikir-garaýyşlar «Altyn güýzüň waspy» atly aýdyşyk äheňli çeper okaýyş çäresinde çykyş eden, Türkmenistanyň at gazanan medeniýet işgäri, halypa şahyr Oguljemal Çaryýewanyň, «Türkmenistan» gazetiniň bölüm redaktory, şahyr Akmyrat Hojanyýazowyň, «Watan» gazetiniň bölüm redaktory, şahyr Çemen Annaberdiýewanyň, «Edebiýat we sungat» gazetiniň uly habarçysy, ýaş şahyr Kerimberdi Hakberdiýewiň goşgularynyň içinden eriş-argaç bolup geçdi. Altyn güýzüň gözellikleri her bir adamyň kalbyna döredijilik ylhamyny, täsin pikirleri eçilýär. Hoşboý ysly gülleriň, altynsow öwüsýän daragtlaryň özboluşly ysy, seriňi durlap, kalbyňy heýjana getirýär. Tebigatyň tylla reňke boýan baglarynyň gatyrawsy ýapraklary diýseň özüne çekiji. Altyn güýzde goýny gözellige beslenen seýilgähiň görnüşini synlamagyň özem aýratyn lezzet berýär. Paýtagtymyzyň gözel künjeginde ýerleşýän döwrebaplaşdyrylan Türkmenistanyň Garaşsyzlygynyň XV ýyllygy seýilgähiniň al-elwan gülli, bagy-bossanly tebigaty ajaýyp döwrümiziň ösüş-özgerişlerine buýsanjymyzy artdyryp, kalby ylham-joşgunly şahyrlarymyzda ýakymly duýgulary oýardy. Berkarar döwletiň täze eýýamynyň Galkynyşy döwründe, Garaşsyz ýurdumyzyň hemişelik Bitaraplygynyň şanly 30 ýyllygynyň taryhy dabaralara beslenip giňden bellenilýän Halkara parahatçylyk we ynanyşmak ýylynda, şahyrlarymyzyň ýüreginden syzylyp çykan şygyrlaryny okaýyşlary has-da täsirli boldy. Her bir şygyrda parahat Watanymyza hem-de tebigatymyza bolan çäksiz hormat-sarpa aýdyň duýuldy. Seýilgähde ildeşlerimiziň rahat dynç almagy, şadyýan çagalaryň wagtlaryny peýdaly geçirmekleri üçin ähli zerur sertler döredilen. Bu seýilgähe dynç almaga gelýän bagtyýar raýatlaryň köplügini göreniňde guwanýarsyň. «Altyn güýzüň waspy» atly aýdyşyk äheňli çeper okaýyş çäresine gatnaşyp çykyş eden şahyrlarymyz, medeniýetimizi, sungatymyzy, edebiýatymyzy gülledip ösdürýän, türkmen halkynyň Milli Lideri Gahryman Arkadagymyzyň, hormatly Prezidentimiziň janlarynyň sag, ömürleriniň uzak, döwletli işleriniň hemişe rowaç bolmagyny tüýs ýürekden arzuw etdiler. _________________ Ogulgurban GAŞLAKOWA Türkmenistanyň Medeniýet ministrliginiň Döredijilik işgärleri bölüminiň baş hünärmeni.

TÜRKMEN HALKYNYŇ MILLI LIDERI, TÜRKMENISTANYŇ HALK MASLAHATYNYŇ BAŞLYGY GAHRYMAN ARKADAGYMYZ ARKADAG ŞÄHERINIŇ GURLUŞYGYNYŇ BARŞY WE TAÝÝARLANAN TASLAMALAR BILEN TANYŞDY

Täzelikler

22.10.2025

21-nji oktýabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow milli binagärlik ýörelgeleri bilen häzirki zamanyň ösen tejribesiniň utgaşdyrylmagynda bina edilen Arkadag şäherine gelip, bu ýerde täze şäheriň çäklerinde gurulýan we gurulmagy teklip edilýän döwrebap desgalaryň şekil taslamalary hem-de ählihalk bag ekmek dabarasyna görülýän taýýarlyk işleri bilen tanyşdy. Şeýle hem Gahryman Arkadagymyz bu ýerde degişli ýolbaşçylaryň gatnaşmagynda iş maslahatyny geçirdi. Şu günler Gahryman Arkadagymyzyň başlangyjy we yzygiderli tagallasy esasynda binýat bolan täze şäheriň gurluşygynyň ikinji tapgyrynda alnyp barylýan işler häzirki döwrüň talaplaryna laýyk derejede dowam etdirilýär. Ýurdumyzyň gözel künjekleriniň birinde ýerleşýän Arkadag şäheriniň gurluşygynyň ikinji tapgyrynda önümçilik we medeni-durmuş maksatly binalaryň gurluşyklary batly depginlerde alnyp barylýar. Bu bolsa ýurdumyzda başy başlanan asylly işleriň depginleriniň barha ýokarlanýandygyny görkezýär. “Akylly” şäher konsepsiýasy esasynda bina edilen täze şäheriň özboluşly binagärlik aýratynlyklary, onuň ýokary ekologik derejesi ýurdumyzda şähergurluşyk maksatnamasynyň toplumlaýyn esasda amala aşyrylýandygyny alamatlandyrýar. Bu ýerde täze şäheriň gün-günden gözelleşmegine oňyn täsirini ýetirýän giň möçberli işler ýerine ýetirilýär. Bu bolsa şäher ilatynyň ýaşaýyş-durmuş derejesiniň ýokarlanmagy, täze iş orunlarynyň döredilmegi ugrunda döwlet derejesinde edilýän tagallanyň aýdyň netijesidir. ...Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow häzirki döwrüň nusgalyk şäheri derejesine eýe bolan Arkadag şäherine geldi. Gahryman Arkadagymyz, ilki bilen, täze şäherde ählihalk bag ekmek dabarasynyň geçiriljek ýerine bardy. Türkmen halkynyň Milli Lideri, Türkmenistanyň Halk Maslahatynyň Başlygy her ýylda geçirilmegi asylly däbe öwrülen we ýurdumyzyň ekologik derejesiniň has-da sagdynlaşmagynda möhüm ähmiýeti bolan ählihalk bag ekmek dabarasyna işjeň gatnaşygyň üpjün edilmelidigine ünsi çekdi. Şunda bu künjegiň toprak-howa şertlerine laýyk gelýän, yssy we sowuk howalara çydamly, elmydama ýaşyl öwüsýän bag nahallarynyň seçilip alynmagy möhüm talap hökmünde kesgitlenendir. Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow we Arkadag şäheriniň häkimi G.Mämmedowa täze şäheriň çäklerinde ählihalk bag ekmek dabarasyna görülýän taýýarlyk işleri barada aýdyp, ýurdumyzyň ussat bagbanlarynyň ösdürip ýetişdiren türkmen arçasynyň nahallarynyň şu gezekki bag ekmek möwsüminde köpçülikleýin ekilmegini teklip edýändikleri barada hasabat berdiler. ________________________ «Türkmenistan» gazeti

TÜRKMEN ALABAÝY–MILLI MIRASYMYZ WE BUÝSANJYMYZ

Täzelikler

21.10.2025

Türkmen halkynyň baý medeni mirasy we gymmatlyklary bolup, taryhda dünýäniň medeni gymmatlyklaryna kämil mirasy peşgeş beripdir. Olaryň arasynda türkmen alabaýynyň gymmaty has tapawutlydyr. Türkmen alabaýynyň baýramyny her ýylda giňden bellemek ýurdumyzda asylly däbe öwrüldi. Baýramçylyk mynasybetli Türkmenistanyň Döwlet çeperçilik akademiýasynyň Sergiler jaýynda ýaş mugallymlaryň we zehinli talyplaryň «Türkmen alabaýy» atly döredijilik eserleriniň sergisi açyldy. Şekillendiriş sungatynyň nakgaşçylyk, grafika, heýkeltaraşlyk, amaly-haşam sungatynyň, zergärçilik, halyçylyk keramika ýaly ugurlarynda ýerine ýetirilen türkmen alabaýynyň keşbini wasp edýän döredijilik eserleri barada tegelek stoluň başynda Türkmenistanyň Gahrymany Saragt Babaýewiň gatnaşmagynda söhbetdeşlik geçirildi.

SAZ FESTIWALY

Täzelikler

21.10.2025

Türkmen halkynyň aýdym-saz sungatynyň taryhy diýseň baýdyr. Halk dessanlarymyz biziň günlerimize bagşy-sazandalarymyzyň ussatlyk bilen ýerine ýetirmekleri netijesinde nesilden-nesle geçip gelipdir. Diýmek, biziň ýurdumyzda aýdym-saz sungaty altyn hazyna deňelýär. Maýa Kulyýewa adyndaky Türkmen milli konserwatoriýasynda aýdym-saz sungatymyzy ösdürmekde birnäçe çäreler, bäsleşikler we festiwallar alnyp barylýar. Şol sanda “Zehinli ýaşlar” atly saz festiwaly şu günlerde dowam edýär. Bu festiwala ýaş höwesjeň talyplar we mugallymlar gatnaşyp öz ussatlyklaryny görkezdiler. “Türkmeniň Altyn asyry” bäsleşiginiň ýeňijisi, Maýa Kulyýewa adyndaky Türkmen milli konserwatoriýasynyň mugallymy Mähri Hojaýewa we “Magtymguly” medalynyň eýesi Magtymguly Magtymgulyýewiň ýerine ýetirmeginde türkmen halk aýdymlary “Ulus illerde”, “Gutar meni”, “Biläni”, “Bellidir”, “Ýigide”, “Pyganym bar”, “Näz eder”, “Ne peýda”, “Ýaraşmaz”, “Görüm görülmegen ýerde”, “Azerbaýjan” eserlerini ussatlyk bilen ýerine ýetirdiler we tomaşaçylaryň gyzgyn söýgüsini gazandylar. Festiwalyň dowamynda Ödeniýaz Nobatowyň “Ene hüwdisi”, A.Ablyýewiň “Gyzlaryň”, S.Jepbarowyň “Mekany daglar” atly aýdymlary ussat mugallymlar tarapyndan belent owaz bilen ýerine ýetirilip, myhmanlaryň gyzgyn el-çarpyşmalaryna mynasyp boldular. Festiwal tomaşaçylar üçin ýatdan çykmajak ajaýyp pursatlary janlandyrdy. Biz ýaşlara okamaga, döretmäge, Watanymyza gerekli ýaşlar bolup ýetişmegimiz üçin gerekli mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun. _______________________ Gülkamar DÖWLETOWA Maýa Kulyýewa adyndaky Türkmen milli konserwatoriýasynyň «Sazşynaslyk» hünäriniň 4-nji ýyl talyby

TÜRKMEN HALKYNYŇ MILLI LIDERI, TÜRKMENISTANYŇ HALK MASLAHATYNYŇ BAŞLYGY OWGANYSTANYŇ MINISTRLER KABINETINIŇ BAŞLYGYNYŇ YKDYSADY MESELELER BOÝUNÇA ORUNBASARY BILEN DUŞUŞDY

Täzelikler

21.10.2025

20-nji oktýabrda Owganystana saparynyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Owganystanyň Ministrler Kabinetiniň Başlygynyň ykdysady meseleler boýunça orunbasary Abdul Gani Baradar bilen duşuşdy. Abdul Gani Baradar belent mertebeli türkmen myhmanyny mähirli mübärekläp, oňyn Bitaraplyk ýörelgelerine esaslanýan daşary syýasaty durmuşa geçirýän Türkmenistan bilen dostlukly gatnaşyklara Owganystanda ýokary baha berilýändigini belledi. Gahryman Arkadagymyz türkmen we owgan halklaryny gadymdan gelýän doganlyk hem-de özara hormat goýmak däpleriniň, umumy ruhy we taryhy gymmatlyklaryň baglanyşdyrýandygyny aýdyp, Türkmenistan bilen Owganystanyň arasyndaky ikitaraplaýyn gatnaşyklaryň hoşniýetli goňşuçylyk we dostluk däpleriniň esasynda yzygiderli ösdürilýändigini kanagatlanma bilen belledi. Duşuşygyň dowamynda bellenilişi ýaly, türkmen we owgan doganlyk halklarynyň arasynda söwda-ykdysady, ýangyç-energetika we ulag-aragatnaşyk ulgamlarynda hyzmatdaşlyk alnyp barylýar. Türkmenistanyň we Owganystanyň geografik taýdan amatly ýerleşmegi sebitde üstaşyr ulag geçelgelerini döretmekde möhüm ähmiýete eýedir. Häzirki wagtda ýurtlarymyz energetika, ulag we aragatnaşyk ulgamlarynda ägirt uly taslamalary bilelikde durmuşa geçirmäge gatnaşýarlar. Şolaryň hatarynda Türkmenistan—Owganystan—Pakistan—Hindistan gaz geçirijisi, Türkmenistan—Owganystan—Pakistan elektrik geçirijisi we optiki-süýümli aragatnaşyk geçirijisi aýratyn orny eýeleýär. Şunuň bilen baglylykda, Gahryman Arkadagymyz bu taslamalaryň Türkmenistanyň we Owganystanyň arasyndaky uzak möhletli doganlyk gatnaşyklaryny pugtalandyrmak üçin ygtybarly binýat bolup hyzmat etjekdigine ynam bildirip, şu gün ýokarda agzalan taslamalaryň çäklerinde Arkadagyň ak ýoly bilen Serhetabat—Hyrat gaz geçirijisiniň gurluşyk işleri bilen bagly dabaraly çäreleriň geçiriljekdigini belledi. Şeýle giň gerimli taslamalar ýurtlary birleşdirip, halklaryň arasynda dost-doganlyk köprüsine öwrüler diýip, Gahryman Arkadagymyz aýtdy we bu taslamalaryň iki ýurduň ykdysadyýetini mundan beýläk-de ösdürmäge giň şert döretjekdigine, doganlyk owgan halkynyň hal-ýagdaýyny ýokarlandyrmaga ýardam etjekdigine, täze iş ýerleri bilen üpjün etjekdigine berk ynam bildirdi. Dostlukly ýurduň Hökümetiniň Başlygynyň orunbasary Türkmenistan ýaly parahatçylyk söýüjilikli goňşusynyň bolmagynyň Owganystan üçin möhüm strategik ähmiýete eýedigini belledi hem-de owgan halkyna berýän yzygiderli goldawy üçin Gahryman Arkadagymyza hem-de hormatly Prezidentimize tüýs ýürekden hoşallyk bildirdi. Şeýle hem Abdul Gani Baradar Türkmenistandan Owganystana yzygiderli ynsanperwerlik kömeginiň iberilýändigini belläp, munuň üçin türkmen tarapyna ýene-de bir gezek hoşallygyny beýan etdi. Duşuşygyň ahyrynda Gahryman Arkadagymyz Türkmenistan bilen doganlyk Owganystanyň arasyndaky gatnaşyklary dürli ugurlar boýunça geljekde-de netijeli ösdürmek üçin bilelikdäki işleriň dowam etdiriljekdigini aýdyp, Abdul Gani Baradara we doganlyk owgan halkyna iň gowy arzuwlaryny beýan etdi. _________________________ «Türkmenistan» gazeti

TÜRKMENISTAN SEBITIŇ DURNUKLY ÖSÜŞINE GOŞANT GOŞÝAR

Täzelikler

21.10.2025

GAHRYMAN ARKADAGYMYZ ARKADAGYŇ AK ÝOLY BILEN SERHETABAT-HYRAT GAZ GEÇIRIJISINIŇ NOBATDAKY TAPGYRYNA AK PATA BERDI 20-nji oktýabrda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistan-Owganystan -Pakistan-Hindistan gaz geçiriji taslamasynyň Arkadagyň ak ýoly bilen Serhetabat-Hyrat gaz geçirijisiniň Owganystanyň çäginde alnyp barylýan gurluşyk işleriniň barşy bilen tanyşdy. Gahryman Arkadagymyzyň başlangyçlary bilen binýady goýlan ýurdumyzyň daşary syýasy strategiýasy hormatly Prezidentimiz Serdar Berdimuhamedowyň parasatly baştutanlygynda üstünlikli durmuşa geçirilýär. Sebitiň ýurtlary bilen özara bähbitli we hoşniýetli goňşuçylyk ýörelgelerine esaslanýan hyzmatdaşlygy yzygiderli pugtalandyrmak bu strategiýanyň esasy ugurlarynyň biridir. 2024-nji ýylyň sentýabr aýynda Gahryman Arkadagymyzyň gatnaşmagynda Türkmenistan—Owganystan—Pakistan—Hindistan transmilli gaz geçirijisiniň taslamasynyň Arkadagyň ak ýoly bilen Serhetabat—Hyrat gaz geçirijisiniň, Serhetabat—Hyrat optiki-süýümli aragatnaşyk geçirijisiniň, “Turgundy” demir ýol bekediniň “gury portunda” ammarlar toplumynyň, Turgundy—Hyrat demir ýolunyň birinji tapgyrynyň Turgundy—Sanabar böleginiň gurluşyk işlerine badalga berilmegi, şeýle hem Serhetabat—Turgundy demir ýol geçelgesiniň türkmen-owgan serhedindäki uzynlygy 177 metrlik demir ýol köprüsiniň we Türkmenistan—Owganystan—Pakistan elektrik geçirijisiniň taslamasynyň birinji tapgyryny durmuşa geçirmegiň çäklerinde Owganystanyň Hyrat welaýatynda ýerleşýän “Nur-el-Jahad” elektrik bekediniň işe girizilmegi munuň aýdyň güwäsidir. Bitarap Türkmenistan parahatçylyk söýüjilik, hoşniýetli goňşuçylyk ýörelgelerine eýermek bilen, Owganystanyň abadan durmuşyny pugtalandyrmaga yzygiderli goldaw berýär. Türkmenistan energetika howpsuzlygynyň döwrebap ulgamynyň döredilmegi ugrunda çykyş edýär. Gahryman Arkadagymyzyň başyny başlan hem-de sebitiň döwletleriniň doganlyk halklarynyň abadançylygyna gönükdirilen Türkmenistan—Owganystan—Pakistan—Hindistan gaz geçirijisiniň taslamasy bu ulgamy kemala getirmäge saldamly goşant bolup durýar. Şunuň bilen birlikde, bu taslama ýurdumyzyň milli ýangyç-energetika toplumyny düýpli döwrebaplaşdyrmaga, innowasiýalary, ekologik taýdan arassa tehnologiýalary ornaşdyrmaga, önüm öndürijileriň, üstaşyr geçirijileriň hem-de sarp edijileriň bähbitlerini nazara almak bilen, energiýa serişdelerini dünýä bazarlaryna ibermegiň diwersifikasiýalaşdyrylan ulgamyny döretmäge gönükdirilen energetika strategiýasyny durmuşa geçirmekde möhüm ädimdir. ________________________ «Türkmenistan» gazeti

«ÖSÜŞLERE BESLENEN PARAHAT, ASUDA WATANYŇ BUÝSANÇLY ZENANLARY» ATLY WAGYZ-NESIHAT ÇÄRESI GEÇIRILDI

Täzelikler

20.10.2025

Hormatly Prezidentimiziň parasatly baştutanlygynda Berkarar döwletimiziň täze eýýamynyň Galkynyşy döwründe eneligi goramak, zenan mertebesi, maşgala mukaddesligi, sagdyn jemgyýet, abadan durmuş döwranly döwletimiziň baş aladalarynyň biri. Eziz Diýarymyzda zenanlaryň syýasy, durmuş, ykdysady we medeni ugurlarda hemmetaraplaýyn ösüşini üpjün etmek babatynda möhüm işler alnyp barylýar. Jemgyýetiň başlangyç esasy maşgaladan başlanýar. Ýurdumyzda maşgala bagtyýarlygy, eneleriň we çagalaryň sagdynlygy, ählitaraplaýyn goraglylygy hakyndaky meseleler döwlet syýasatynda möhüm orun eýeleýär. Türkmeniň asyrlar aşyp, kämilleşip gelýän, ýokary ahlaklylyga, adamkärçilige, ynsanperwerlige ýugrulan terbiýe mekdebiniň düýp özeninde zenana uly orun degişli. Türkmen zenany maşgala ojagyna, ýanýoldaşa wepalylygyň, görüm-göreldäniň, zähmetsöýerligiň, merdana nesilleri, beýik şahsyýetleri terbiýeläp ýetişdirmegiň nusgasydyr. Olar çeper gözlegleri, döredijilik aňyýetleri bilen hünärini sungat derejesine ýetirmegi başaran zenanlardyr. Türkmen zenanynyň yhlas siňdirip döreden, nepislikde taýsyz gözelligi bilen haýrana goýýan halyçylyk, şeýle hem keşdeçilik sungaty umumadamzat mirasynda mäkäm orun eýeledi. Hormatly Prezidentimiziň ynsanperwer syýasaty, pähim-parasatly ýolbaşçylygynda zenanlary mährem ene, mukaddes ojagyň eýesi, terbiýe gönezligi hökmünde sarpalamak ýaly asyrlary külterläp gelýän milli däp-dessurlara, oňyn ýörelgelere durmuşymyzda möhüm ähmiýet berilýär. Bagtyýarlygyň nusgalyk mekany bolan döwletli Diýarymyzda zenanlarymyzyň döredijilikli zähmet çekmegi, bilim almagy, ylmy-barlaglary alyp barmagy, bolelin durmuşda ýaşamagy üçin ähli şertler bar. Merdana halkymyzyň nusgalyk terbiýe mekdebiniň ynsanperwer kadalaryny, asylly däp-dessurlarymyzy dünýä ýaýmak, ýaşlarymyzy Watansöýüji we milli ýörelgelerimize ygrarly edip terbiýeläp ýetişdirmek döwrümiziň wajyp wezipeleriniň biri. Ine, şol maksatdan ugur alyp, Türkmenistanyň Zenanlar birleşiginiň Merkezi Geňeşiniň, Türkmenistanyň Medeniýet ministrliginiň ilkinji zenanlar guramasynyň, Türkmenistanyň Döwlet medeniýet merkeziniň ilkinji zenanlar guramasynyň we Beýik Saparmyrat Türkmenbaşy adyndaky Şekillendiriş sungaty muzeýiniň ilkinji zenanlar guramasynyň bilelikde guramagynda “Ösüşlere beslenen parahat, asuda Watanyň buýsançly zenanlary” atly wagyz-nesihat çäresi geçirildi. Bu wagyz-nesihat çäresinde çykyş edenler Berkarar döwletiň täze eýýamynyň Galkynyşy döwründe ýurdumyzda zenanlara goýulýan hormat-sarpa, döredilýän mümkinçilikler, milli gymmatlyklary döretmekdäki türkmen zenanlarynyň orny, ýaş nesillerimizi ata-baba dowam edip gelýän asylly we milli ýörelgelerimiz esasynda terbiýelemegiň wajyp wezipeleri, enäniň we çaganyň saglygy, türkmen halkynyň Milli Lideri Gahryman Arkadagymyzyň ajaýyp kitaplary barada giňişleýin gürrüň berdiler. Wagyz-nesihat çäresine gatnaşanlar zenan, maşgala, jemgyýet, olaryň abadançylygy, zenan hukuklarynyň goraglylygyny üpjün etmek babatdaky taýsyz tagallalary üçin Gahryman Arkadagymyza we Arkadagly Gahryman Serdarymyza çäksiz alkyşlaryny beýan etdiler. Bagtyýar şu günümiz, döwletli döwranly, röwşen ertämiz üçin Gahryman Arkadagymyza, Hormatly Prezidentimize alkyşlarymyz soňsuz. Goý, mundan beýläk hem Arkadagly Gahryman Serdarymyzyň alyp barýan ynsanperwer syýasatlary rowan, belent maksatlary dowamat dowam bolsun! ___________________ Ogultäç Hojanazarowa, Türkmenistanyň Medeniýet ministrliginiň Maddy däl medeni miras müdirliginiň başlygynyň orunbasary, ilkinji zenanlar guramasynyň başlygy.

TÜRKMENISTANYŇ HALK BAGŞYLARY NOBAT BAGŞYNYŇ 125 ÝYLLYGY ÖDENYÝAZ NOBATOWYŇ 95 ÝYLLYGY MYNASYBETLI ÝATLAMA SÖHBETDEŞLIK KONSERDI

Täzelikler

20.10.2025

Maýa Kulyýewa adyndaky Türkmen milli konserwatoriýasynyň kiçi zalynda beýik halypalar Nobat bagşynyň 125 ýyllygy, Ödenyýaz Nobatowyň 95 ýyllygyna bagyşlanan konsert geçirildi. Konsertden öň konserwatoriýanyň halypa mugallymlary we çagyrylan myhmanlar çykyş edip, tomaşaçylara ýurdumyzda ýene bir meşhur halypa bagşylar Nobat bagşynyň, Ödenyýaz Nobatowyň ömri hem döredijiligi barada gürrüň berdiler. Konserdi Maýa Kulyýewa adyndaky Türkmen milli konserwatoriýasynyň «Bagşyçylyk sungaty» kafedrasynyň müdiri Türkmenistanyň at gazanan bagşysy Garýagdy Saryýew alyp bardy. Mugallym ýatlama konserdine gelen myhmanlara söz berdi. Türkmenistanyň Halk artisti Annaseýit Annamyradow Nobat bagşy hemde ogly Ödenyýaz Nobatow barada gürrüň berdi. Konsert Ödenyýaz Nobatowyň şägirdi Çary Akmämmedowyň çykyşy hem-de «Sallanan gözel» Türkmen halk aýdymyny ýerine ýetirmeginde dowam etdi. Türkmen Döwlet Medeniýet institutynyň mugallymy Gadam Gurbanowyň çykyşy we «Aslym gelmedi» Türkmen halk aýdymy bilen ýatlama konserdi dowam etdi. Konsert okuw jaýymyzyň professor mugallymlarynyň çykyşy bilen dowam etdi. Onda Sungaty öwreniş ylymlarynyň doktory Çaryýar Jumaýewiň gürrüň bermeginde Nobat bagşynyň we Ödenyýaz Nobatowyň sungatda goýan yzlary barada gürrüň berdi. Maýa Kulyýewa adyndaky Türkmen milli konserwatoriýasynyň «Bagşyçylyk sungaty» kafedrasynyň 4-nji ýyl talyby Kerim Pirnepesow «Torgaý guşlar» Aýdymyny ýerine ýetirdi. Konserdiň dowamynda Türkmenistanyň At gazanan Medeniýet işgäri Ödenyýaz Nobatowyň ogly Töre Nobatow çykyş etdi. Maýa Kulyýewa adyndaky Türkmen milli konserwatoriýasynyň ýanyndaky D.Öwezow adyndaky ýörite sazçylyk mekdebiniň talyby Şirli Şirwan «Bir zaman goýgul» Türkmen halk aýdymyny ýerine ýetirdi. Konsertda Maýa Kulyýewa adyndaky Türkmen milli konserwatoriýasynyň «Bagşyçylyk sungaty» kafedrasynyň müdiri Garýagdy Saryýew jemleýji sözi bilen çykyş edip, «Bilmez boldym, gaýry şirwan» Türkmen halk aýdymyny ýerine ýetirdi. Ýatlama konserde gatnaşyjylaryň çykyşlary tomaşaçylarda ýatdan çykmajak täsir galdyrdy. Konserdiň dowamynda Bizi şeýle ajaýyp zamanada ýaşadýan Türkmen halkynyň Milli Lideri Gahryman Arkadagymyza Arkadagly gahryman Serdarymyza köp Sagbolsun aýdyp Janlarynyň sag ömürleriniň uzak , belent başlarynyň aman bolmagyny arzuw etdiler. _______________________ Sahydursun MATIYEWA, Maýa Kulyýewa Adyndaky Türkmen milli konserwatoriyasynyň Halk sazy fakultetiniň 2-nji üyl talyby

• ←
• 1
• ...
• 11
• 12
• 13
• ...
• 54
• →