DÜNÝÄ UZAÝAN AK ÝOLLARYŇ SÖHBEDI
Türkmenistan döwletimiziň hemişelik Bitaraplygynyň şanly 30 ýyllyk baýramçylygynyň giňden bellenilýän Halkara parahatçylyk we ynanyşmak ýylynda ýurdumyzyň durmuşyndaky şöhratly wakalar bagtyýar halkymyzy belent maksatly beýik işlere ruhlandyrýar. Häzirki döwürde ýurdumyz goňşy we dünýä döwletleri bilen özara bähbitli hyzmatdaşlyklary, dostlukly gatnaşyklary yzygiderli ösdürýär. Bitarap Türkmenistan döwletimizde dünýäde ählumumy parahatçylygy pugtalandyrmak, halklaryň dost-doganlyk gatnaşyklaryny yzygiderli netijeli ösdürmek ugrunda alnyp barylýan giň gerimli işler has-da rowaçlanýar. Hemişelik Bitaraplyk derejesi parahatçylyk, özara düşünişmek, dost-doganlyk gatnaşyklaryny, ynsanperwerlik ýörelgelerini berkitmekde möhüm orun eýeleýär. Bitaraplyk ýörelgeleri halkymyzyň durmuşynda parasatly pederlerimizden gelýän ýoldur. Halkymyz ýaşaýyş-durmuşyny dolandyrmakda hemişe ynsanperwer ýörelgelerden, dostlukly gatnaşyklardan ugur alypdyr. Agzybirlige gol berip ýaşapdyr.
Berkarar döwletiň täze eýýamynyň Galkynyşy döwründe, hormatly Prezidentimiziň parasatly ýolbaşçylygynda Garaşsyz, hemişelik Bitarap Türkmenistan döwletimiz dünýä ýurtlary bilen parahatçylyk söýüjilikli, dost-doganlyk gatnaşyklaryny ynamly ösdürýär. Parahatçylyk, hoşniýetlilik ýurdumyzyň alyp barýan syýasatynyň esasyny düzýär. Hormatly Prezidentimiziň parasatly başlangyjy esasynda, diňe bir ýurdumyzda däl, dünýäde parahatçylygyň, howpsuz durmuşyň höküm sürmegi ugrunda netijeli işler amala aşyrylýar. Ýurdumyz parahatçylygyň, dost-doganlygyň we ynanyşmagyň mekany hökmünde dünýäde ykrar edilýär hem-de parahatçylyk, ynsanperwerlik ýörelgeleri has-da baýlaşdyrylýar.
Şu ýyl Birleşen Milletler Guramasynyň Baş Assambleýasynyň 79-njy sessiýasynda ýurdumyzyň başlangyjy bilen «Türkmenistanyň hemişelik Bitaraplygy» atly Kararnamanyň biragyzdan kabul edilmegi, halkara ähmiýetli taryhy waka boldy.
Häzirki wagtda 2025-nji ýylyň «Halkara parahatçylyk we ynanyşmak ýyly» diýlip yglan edilmegi hem-de Türkmenistanyň hemişelik Bitaraplygynyň şanly 30 ýyllygy mynasybetli ýurdumyzda medeni-köpçülikleýin çäreler, döredijilik duşuşyklary yzygiderli geçirilýär. Golaýda Türkmenistanyň Medeniýet ministrliginiň, Türkmenistanyň Telewideniýe, radiogepleşikler we kinematografiýa baradaky döwlet komitetiniň, Türkmen döwlet neşirýat gullugynyň hem-de Ahal welaýat häkimliginiň bilelikde guramagynda, Kaka etrabynyň Medeniýet öýünde ýurdumyzyň ýazyjy-şahyrlarynyň, aýdymçylarynyň, artistleriniň gatnaşmagynda geçirilen , «Arkadagly Serdaryň dünýä uzan ak ýoly – Halkara parahatçylyk we ynanyşmak ýyly!» atly aýdym-sazly döredijilik duşuşyklary hem bu şanly senelere bagyşlandy.
Döredijilik duşuşygyna «Demirýollary» agentliginiň «Altyn menzil» aýdym-saz toparynyň çeper ýolbaşçysy, Türkmenistanyň halk artisti Läle Begnazarowa, Türkmenistanyň Beýik Saparmyrat Türkmenbaşy adyndaky baş akademiki drama teatrynyň sahna ussady, Türkmenistanyň at gazanan artisti Batyr Çaryýew, Türkmenistanyň Medeniýet ministrliginiň Döredijilik işgärleri bölüminiň baş hünärmeni Ogulgurban Gaşlakowa, «Adalat» gazetiniň uly habarçysy, şahyr Aşyrmät Garlyýew gatnaşyp, Arkadagly Gahryman Serdarymyzyň dünýä uzaýan dost-doganlyk ýollary, parahatçylyk söýüjilik, ynanyşmak, bitaraplyk ýörelgelerine ygrarlylygyň, merdana pederlerimizden gelýän watansöýüjilik terbiýesiniň esasydygyny öz çykyşlarynda giňişleýin beýan etdiler. Parahatçylygyň belent düşünjeleriniň çuňňur many-mazmunynyň Gahryman Arkadagymyzyň «Türkmenistan — parahatçylygyň we ynanyşmagyň Watany» atly ajaýyp şygrynyň gymmatly pikir-garaýyşlarynda beýan edilýändigini, «Ömürleriň manysy söýgi, mähir, yhlasdyr, Adamzadyň arzuwy abatlyga telwasdyr!» diýen setirlerinde aýdyň açyp görkezdiler. Bu goşgynyň dana şahyrymyz Magtymguly Pyragynyň parahatçylyk baradaky arzuwlary, ýagşylyga, ynsanperwerlige ýugrulan pikir-garaýyşlary bilen sazlaşýandygyny bellediler.
Şeýle hem, häzirki döwürde dünýäniň döwletleri bilen ysnyşykly gatnaşyklaryň has-da ösdürilmegi netijesinde, hemişelik Bitarap Türkmenistanyň dost-doganlyk gatnaşyklaryny pugtalandyrýan döwlet hökmünde halkara abraýyny belende göterýär. Döwletleriň ynanyşmak arkaly gatnaşyklaryny pugtalandyrmaklary, Ýer ýüzünde parahatçylygyň dabaralanmagyna oňyn täsirini ýetirýär. Dünýäde ynamly gatnaşyklaryň dabaralanmagy bolsa parahatçylygyň kepiline öwrülýär. Dünýä ýurtlary ynamly we ygtybarly gatnaşyklaryň netijesinde ajaýyp üstünlikleri gazanýarlar-diýip nygtadylar.
Döredijilik duşuşygynda Türkmenistanyň halk artisti Läle Begnazarowanyň hem-de welaýatyň ussat aýdymçylarynyň döwrümiziň belent ösüşlerini, özgerişlerini wasp edýän aýdymlary bu çärä ýakymly öwüşgin çaýdy.
Döredijilik duşuşygynda çykyş edenler, ýurdumyzyň ähli ugurlardaky döwrebap ösüşlerini has-da belende götermek ugrundaky giň gerimli işleri üçin, türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza tüýs ýürekden alkyşlaryny aýtdylar.
Ogulgurban GAŞLAKOWA
Türkmenistanyň Medeniýet ministrliginiň Döredijilik işgärleri bölüminiň baş hünärmeni
