HABARLAR

Kategoriýalar
• Medeniýet habarlary we täzelikleri
• Täzelikler
• Konsertler
• Teatr we kino dünýäsi
• Muzeýler
• Kitaphanalar
• Taryhy ýadygärlikler
• Medeni miras
• Edebiýat älemi
• Halkara gatnaşyklary

TÜRKMENISTANDA KUWEÝT DÖWLETINIŇ ADATDAN DAŞARY WE DOLY YGTYÝARLY ILÇISI IŞE BAŞLADY

Täzelikler

02.12.2025

1-nji dekabrda hormatly Prezidentimiz Serdar Berdimuhamedowyň tabşyrygy boýunça Mejlisiň Başlygy D.Gulmanowa Kuweýt Döwletiniň Türkmenistanda täze bellenen Adatdan daşary we Doly ygtyýarly ilçisi Abdulaziz Ahmad Al-Adwaniden ynanç hatyny kabul etdi. Milli parlamentiň ýolbaşçysy döwlet Baştutanymyzyň adyndan diplomaty jogapkärli wezipä bellenilmegi bilen gutlap, oňa iki ýurduň arasyndaky köpugurly hyzmatdaşlygy pugtalandyrmak boýunça alyp barjak işinde üstünlikleri arzuw etdi. Dostlukly ýurduň doly ygtyýarly wekili hoşniýetli sözler we türkmen topragynda bildirilen myhmansöýerlik üçin hoşallyk bildirip, öz nobatynda, Kuweýt Döwletiniň Emiri Şeýh Mişaal Al-Ahmad Al-Jaber Al-Sabahyň hormatly Prezidentimize we türkmen halkynyň Milli Liderine mähirli salamyny, iň gowy arzuwlaryny ýetirdi. Duşuşygyň dowamynda diplomat milli parlamentiň düzümi we onuň ýurdumyzyň kanunçylyk binýadyny toplumlaýyn döwrebaplaşdyrmak boýunça alyp barýan işleri, Türkmenistanyň içeri hem-de daşary syýasatynyň esasy ugurlary bilen tanyşdyryldy. Hyzmatdaşlygyň geljegi uly ugurlary boýunça pikir alyşmalaryň dowamynda ikitaraplaýyn we köptaraplaýyn görnüşde, ilkinji nobatda, BMG-niň, beýleki abraýly halkara guramalaryň çäklerinde üstünlikli ösdürilýän türkmen-kuweýt gatnaşyklarynyň dürli ugurlary boýunça pikir alşyldy. Duşuşygyň ahyrynda Kuweýt Döwletiniň Türkmenistandaky Adatdan daşary we Doly ygtyýarly ilçisi Abdulaziz Ahmad Al-Adwani ynanyşmak, birek-birege hormat goýmak esasynda ösdürilýän türkmen-kuweýt gatnaşyklaryny has-da pugtalandyrmak ugrunda ähli tagallalary etjekdigine ynandyrdy. _________________ «Türkmenistan» gazeti

TÜRKMENISTANYŇ PREZIDENTI IŞ MASLAHATYNY GEÇIRDI

Täzelikler

02.12.2025

1-nji dekabrda hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň sebitlerinde we oba hojalyk toplumynda alnyp barylýan işler bilen bagly meselelere garaldy. Ilki bilen, Ahal welaýatynyň häkimi T.Nurmyradowa söz berildi. Ol welaýatda möwsümleýin oba hojalyk işleriniň barşy barada hasabat berdi. Bellenilişi ýaly, häzirki wagtda ýetişdirilen pagta hasylyny soňky hanasyna çenli ýitgisiz ýygnap almak boýunça zerur çäreler görülýär. Şunuň bilen birlikde, geljek ýylyň hasyly üçin gowaça ekiljek meýdanlary ekiş möwsümine taýýarlamak üçin sürüm işleri geçirilýär. Welaýatyň bugdaý ekilen meýdanlarynda endigan gögeriş alnyp, häzirki wagtda ösüş suwuny tutmak, mineral dökünler bilen iýmitlendirmek işleri dowam edýär. Ýurdumyzyň hemişelik Bitaraplygynyň şanly 30 ýyllyk baýramy mynasybetli welaýatda dabaraly çäreleri ýokary guramaçylyk derejesinde geçirmek, baýramçylyk günlerinde bazarlary we söwda nokatlaryny azyk harytlarynyň dürli görnüşleri bilen bolelin üpjün etmek boýunça zerur çäreler görülýär. Döwlet Baştutanymyz hasabaty diňläp, möwsümleýin işleriň netijeli alnyp barylmagynyň ekinlerden bol hasyl almaga, oba hojalygynda ýokary görkezijileri gazanmaga ýardam berýändigini belledi we häkime degişli görkezmeleri berdi. Balkan welaýatynyň häkimi H.Aşyrmyradow welaýatda alnyp barylýan möwsümleýin oba hojalyk işleri barada hasabat berdi. Nygtalyşy ýaly, häzirki wagtda sebitiň gowaça meýdanlarynda pagta hasylyny soňky hanasyna çenli ýitgisiz ýygnap almak, 2026-njy ýylyň hasyly üçin meýdanlary ekiş möwsümine taýýarlamak boýunça degişli işler alnyp barylýar. Ýurdumyzda azyk bolçulygyny pugtalandyrmak boýunça öňde goýlan wezipelerden ugur alnyp, bugdaý ekilen meýdanlarda ösüş suwuny tutmak, mineral dökünler bilen iýmitlendirmek işleri ýerine ýetirilýär. Şeýle-de häkim hemişelik Bitaraplygymyzyň şanly 30 ýyllygy mynasybetli welaýatda baýramçylyk çärelerini guramaçylykly geçirmek, bazarlary we dükanlary azyk önümleri bilen bolelin üpjün etmek boýunça alnyp barylýan işler barada hasabat berdi. Hormatly Prezidentimiz hasabaty diňläp, möwsümleýin oba hojalyk işlerinde agrotehnikanyň kadalarynyň berk berjaý edilmeginiň oba hojalygyny durnukly ösdürmegiň esasy şerti bolup durýandygyny belledi we häkime birnäçe anyk tabşyryklary berdi. ______________ «Türkmenistan» gazeti

HOŞNIÝETLI BITARAPLYK SYÝASATY-PARAHATÇYLYGY ÜPJÜN ETMEGIŇ MÖHÜM ŞERTI

Kitaphanalar

01.12.2025

Berkarar döwletiň täze eýýamynyň Galkynyşy döwründe Hormatly Prezidentimiz Arkadagly Gahryman Serdarymyzyň baştutanlygynda Gahryman Arkadagymyzyň başlangyçlary bilen Garaşsyz, hemişelik Bitarap Türkmenistan diýarymyzyň her bir güni parahatçylyga asudalyga beslenýär. Häzirki wagtda eziz diýarymyz özüniň hemişelik Bitaraplygynyň 30 ýyllygyny bellemäge taýýarlyk görýär. Türkmenistan döwletimiz Mukaddes Garaşsyzlygyna eýe bolan gününden bäri geçen 34 ýylyň dowamynda türkmen halkynyň gadymdan gelýän netijeli we oňyn parahatçylyk söýüjilik, hoşniýetli goňşuçylyk, deňhukukly şeýle-de özara hormat goýmak ýörelgelerine esaslanýan daşary syýasat strategiýasyny yzygiderli we maksada okgunly amala aşyrýar. Garaşsyzlyk, Bitaraplyk biziň her birimizi döredijilikli işlemäge, ata Watanymyzyň ösüşlerine goşant goşmaga ruhlandyrýar. Watanymyzyň at-abraýyny halkara derejesinde täze mertebä göterýän Türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli, dünýä ähmiýetli beýik işleri elmydama rowaçlyklara beslensin!

«BITARAP WATANYM-TÜRKMENISTANYM» AÝDYM-SAZLY KONSERT

Konsertler

01.12.2025

Maýa Kulyýewa adyndaky Türkmen milli konserwatoriýasynda Türkmenistanyň hemişelik Bitaraplygynyň şanly 30 ýyllygy mynasybetli “Saz mugallymy” kafedrasynyň talyplarynyň “Bitarap Watanym-Türkmenistanym” atly konsert geçirildi. Konsertiň başynda Türkmenistanyň at gazanan artisti O.Seýitgeldiýewiň ýolbaşçylygynda dutarçylar toparynyň sazandarlyk etmeginde O.Ataýew mukamçy kompozitor A.Çaryýewiň döreden “Dutarym” eserini, S.Öräýew bolsa S.Jepbarowyň “Altyň biri” atly aýdymyny ýerine ýetirdiler. Göreldeli talyplar ýagny, Ý.Ýazgylyjow professor N.Muhadowyň “Dagly gyz”, Ý.Meredow italýan kompozitory R.Leonkowallonyň “Rasswet”, Ý.Bäşimow türkmen kompozitorçylyk mekdebiniň 2-nji nesline degişli bolan kompozitor Ç.Nurymowyň “Armanym galdy”, H.Bazargeldiýewa Türkmenistanyň halk artisti D.Nuryýewiň “Şatlykdan salam” we Türkmenistanyň at gazanan artisti O.Seýitgeldiýewiň “Enem sen” eserini, A.Garagyrowa Türkmenistanyň halk artisti, zehinli meşhur kompozitor N. Halmämmedowyň “Haýrana galar” ýaly eserlerini ýerine ýetirmegi bolsa konsertiň has-da şowhunyny artdyrdy. Talyplara Z.Öweniýazowa, M.Öwlýagulyýewa, M.Ýelena, Ýe.Melnik, O.Seýitgeldiýew sazandarlyk etdiler. Konsertde diňe bir wokal žanrynda döredilen eserler däl-de, eýsem instrumental žanrlarda döredilen eserler hem ýaňlandy. 3-nji ýyl talyp G.Awlýakulowa Azerbaýjan kompozitory T.Kuliýewiň “Wals”, 5-nji ýyl talyp A.Penjiýewa türkmen zehinli kompozitory G.Çaryýewiň “Elegiýa”, 1-nji ýyl talyp M.Myradowa belli kompozitor A.Abdyllaýewiň “Bahar tansy”, 5-nji ýyl talyp H.Esenmyradow zenan kompozitor W.Abaýewanyň “Jazekspromt”, 1-nji ýyl talyp Söhbet Öräýew we 2-nji ýyl talyp G.Dagbaşyýew rus kompozitory Ýe. Doganyň “Wals”, awstriýa kompozitory W.A.Mosartyň “Türk marşy” sazlaryny ezberlik bilen ýerine ýetirdiler. Konsertiň ahyrynda şol kafedranyň müdiri, uly mugallym T.Çaryýewanyň dirižýorlyk etmeginde hor toparynyň ýerine ýetiren eserleri ýaňlandy. Olar B.Hudaýnazarowyň “Goý aýdylsyn Bitaraplyk aýdymy” eserini solistler A.Garagyrowanyň we A.Muhammetgulyýewiň aýtmagynda, şeýle-de A.Hojaniýazowyň goşgusyna D.Ökdirowyň döreden “Gahryman siz Arkadag” aýdymyny ýerine ýetirdiler. Konsertde Türkmenistanyň at gazanan artistleri O.Seýitgeldiýewiň, B.Amanowanyň we “Saz mugallymy” kafedrasynyň ussat mugallymlary B.Öwezowanyň M.Orazberdiýewanyň, G.Çaryýewanyň, Ş.Güljäýewanyň, M.Myratgeldiýewiň, Ý.Orazalyýewiň, R.Baýramowyň, I.Mommadowanyň talyplary çykyş edip, öz zehinlerini görkezdiler. Ýerine ýetirilen eserlerden talyplaryň göreldeli okap, hünärini has-da kämilleşmäge çalyşýandyklaryny görmek bolýar. Mugallymlara mundan beýläk-de jogapkärli işinde abraý, talyplara bolsa okuwynda uly-uly üstünlikleri arzuw edýäris. _____________ Ogulbeg Ýegenowa Maýa Kulyýewa adyndaky Türkmen milli konserwatoriýasynyň «Sazşynaslyk» hünäriniň III ýyl talyby

TÜRKMEN HALKYNYŇ MILLI LIDERI, TÜRKMENISTANYŇ HALK MASLAHATYNYŇ BAŞLYGY GAHRYMAN ARKADAGYMYZ ARKADAG ŞÄHERINIŇ GURLUŞYGYNYŇ IKINJI TAPGYRYNDA ALNYP BARYLÝAN IŞLER BILEN TANYŞDY

Täzelikler

01.12.2025

29-njy noýabrda Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow milli binagärlik sungatynyň aýdyň nyşany hökmünde ykrar edilen Arkadag şäherinde bolup, şäheriň gurluşygynyň ikinji tapgyrynda alnyp barylýan işleriň maksatnamasy we gurulmagy meýilleşdirilýän desgalaryň şekil taslamalary bilen tanyşdy. ...Ir bilen Gahryman Arkadagymyz häzirki zamanyň ösen tehnologiýalary bilen milli binagärlik ýörelgeleriniň utgaşdyrylmagynda bina edilen Arkadag şäherine barýan ýoluň ugrundaky aýlawly çatrykda ýerleşýän “Polatly” binasynyň ýanyna geldi. Bu ýerde döwrebaplaşdyrylýan “Ahalteke atlary” şaýolunyň ugrunda degişli işler ýaýbaňlandyryldy. Bu künjekden “akylly” şäher seleňläp görünýär. Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow Arkadag şäheriniň gurluşygynyň ikinji tapgyrynda alnyp barylýan işleriň çäklerinde “Ahalteke atlary” şaýoluny döwrebaplaşdyrmak bilen bagly ýerine ýetirilýän işler barada giňişleýin maglumat berdi. Milli Liderimiz ýoluň gurluşygynda ulanylýan serişdeleriň hiline we berkligine möhüm ähmiýet berilmelidigine ünsi çekdi. Şunda ýoluň her bir gatlagynyň gurluşygy, onuň düşekleriniň galyňlyk ölçegi häzirki zaman talaplaryna, dünýäniň ösen tejribesine laýyk gelmelidir. Munuň özi ýoluň tekizligini, sürüjiler üçin rahatlygyny üpjün etmek bilen bir hatarda, onuň uzak möhletleýinligini hem şertlendirer. “Şol bir wagtyň özünde onuň ugrunda oturdylýan şekilleriň, ýol belgileriniň göze gelüwli bolmagyna, ýanýodalaryň, atlaryň gezim edýän ýollarynyň gurluşygyna toplumlaýyn esasda çemeleşilmelidir” diýip, Gahryman Arkadagymyz belledi we bu babatda öz maslahatlaryny berdi. Türkmenistanyň Halk Maslahatynyň Başlygy ýol ýakasyndaky germewleriň sazlaşygynda döwrüň binagärlik usullarynyň netijeli ulanylmalydygyny, bu ugurdaky işlerde halkymyzyň taryhyň dowamynda döreden milli ýörelgeleriniň öz beýanyny tapmalydygyny aýtdy. Hormatly Arkadagymyz aýlawly ýoluň merkezinde oturdylan Polatly atly bedewiň we onuň çäklerinde ýerleşdirilen ahalteke bedewleriniň heýkelleriniň reňk sazlaşygyna ösen tejribeler esasynda çemeleşilmelidigine ünsi çekdi. Bu işler Diýarymyzda Polatly, Akhan ýaly ady rowaýata öwrülen şöhratly bedewlere goýulýan sarpanyň aýdyň nyşanyna öwrülmelidir. Olar Arkadag şäherine gelýän myhmanlarda oňyn täsirleri galdyrmalydyr. Milli Liderimiz “Ahalteke atlary” şaýolunyň, “Polatly” we “Akhan” monumentleriniň bir bitewi sazlaşygy emele getirmegi, bu künjegiň ekologik derejesiniň üpjün edilmegi barada maslahatlaryny berdi. ________________ «Türkmenistan» gazeti

BITARAPLYK-PARAHATÇYLYK ÖSÜŞLERIŇ GÖZBAŞY

Muzeýler

29.11.2025

Paýhasly pederlerimiziň gursagynda umyt bolup körän, şuglaly ýyldyz bolup ak ýollara alyp gaýdan mukaddes Garaşsyzlygymyz, hemişelik Bitaraplygymyz halkymyza ösüşleriň altyn sahypasyny açdy. Garaşsyzlygymyzyň hem-de Bitaraplygymyzyň beren bagty alnyp barylýan belent maksatly işlerde taryhy senelerde, ýurdumyzyň ösüşlerinde aýdyň beýanyny tapýar. Toýlary –toýa ulaşýan eziz Diýarymyzda barha golaýlaşýan hemişelik Bitaraplygymyzyň şanly toýy mynasybetli geçirilýän çärelere, baýramçylyk dabaralaryna işjeňlik mahsus. Gadymy Lebaby toý lybasyna beslän baýramçylyk dabaralary medeniýet ojaklarynda has-da täsirliligi bilen tapawutlanýar. Şu gün hemişelik Bitaraplygymyzyň otuz ýyllyk şanly toýy mynasybetli Lebap welaýatynyň Taryhy we ülkäni öwreniş muzeýinde ,,Bitaraplyk-parahatçylyk ösüşleriň gözbaşy” atly baýramçylyk serginiň açylyş dabarasy boldy. Milli mirasymyzy, amaly-haşam işlerini, nakgaşlaryň surat eserlerini, şeýle hem Berkarar döwletimiziň täze eýýamynyň Galkynyşy döwründe ähli ulgamlarda gazanylýan üstünlikleri teswirleýän sergi, oňa tomaşa edenlerde ýatdan çykmajak ýakymly täsirleri galdyrdy. Olar öz gezeklerinde eşretli zamanany bagyş eden Gahryman Arkadagymyza hem-de Hormatly Prezidentimize ýüreklerinden joşup çykýan buýsançly sag bolsunlaryny beýan etdiler. ____________ Uzukjemal Ýazjumaýewa Lebap welaýatynyň Taryhy we ülkäni öwreniş muzeýiniň baş gazna saklaýjysy  

KITAP-YNSANYŇ GÖWÜN GANATY

Kitaphanalar

29.11.2025

Döwletmämmet Azady adyndaky Arkadag şäher kitaphanasy, Berdimuhammet Annaýew adyndaky Arkadag şäher ýörite orta hünär mugallymçylyk mekdebi, Arkadag teleýaýlymy bilen bilelikde “Kitap-Ynsanyň göwün ganaty” atly söhbetdeşlik geçirildi. Gadym döwürlerden bäri türkmen halky kitaba uly hormat goýupdyr. Muňa mysal edip asyrlardan-asyrlara, nesilden nesile geçen Magtymguly Pyragynyň günimize gelip ýeten ajaýyp eserlerini bellemek bolar.Ýaş nesilleri Watansöýüji, arassa ahlakly, belent adamkärçilikli, ruhubelent, giň dünýägaraýyşly, ylymly-bilimli adamlar edip ýetişdirmekde, olaryň kitaba bolan söýgisini, okamak höwesini artdyrmagyň örän uly ähmiýeti bardyr. Gahryman Arkadagymyzyň Arkadagly Gahryman Serdarymyzyň ýiti zehininden syzylyp çykan kitaplary bu günki gün her bir türkmen ojagyna ýol-ýörelge mekdep bolup durýar, diýip gürrüňdeşlikde giňden belläp geçdiler. Gürrüňdeşligiň ahyrynda biz ýaşlara bagtyýar durmuşda işlemäge, döretmäge, ýaşamaga ähli mümkinçilikleri döredip berýän Gahryman Arkadagymyza, Arkadagly Gahryman Serdarymyza jan saglyk, uzak ömür arzuw etdiler.

TÜRKMENISTANYŇ MINISTRLER KABINETINIŇ MEJLISI

Täzelikler

29.11.2025

28-nji noýabrda hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi. Ilki bilen, Mejlisiň Başlygy D.Gulmanowa çykyş edip, ýurdumyzda üstünlikli durmuşa geçirilýän maksatnamalaýyn özgertmeleri kanunçylyk taýdan üpjün etmek, milli kanunçylygy döwrüň talaplaryna laýyklykda kämilleşdirmek boýunça alnyp barylýan işler barada maglumat berdi. Şeýle hem milli parlamentiň şu ýylyň 22-nji noýabrynda geçirilen on birinji maslahatynyň netijeleri barada aýdyldy. Maslahatyň dowamynda Türkmenistanyň baş maliýe resminamasyna we dürli ugurlara degişli kanunlaryň taslamalaryna garaldy. Şunuň bilen baglylykda, Mejlisiň Başlygy hormatly Prezidentimize “Türkmenistanyň 2026-njy ýyl üçin Döwlet býujeti hakynda” Türkmenistanyň Kanunyna gol çekip berendigi üçin hoşallyk bildirdi. Häzirki wagtda Mejlisde döredilen iş toparlarynda döwletiň we jemgyýetiň durmuşynyň dürli ugurlarynyň kanunçylyk taýdan üpjün edilmegine gönükdirilen işler dowam etdirilýär. Iri halkara guramalar, daşary ýurtlaryň parlamentleri bilen özara bähbitli hyzmatdaşlygy ösdürmek babatda alnyp barylýan işler barada-da aýdyldy. Mejlisiň wekilleri BMG-niň Çagalar gaznasynyň, Ösüş maksatnamasynyň Türkmenistandaky wekilhanalary tarapyndan guralan maslahatlara, Türkiýe Respublikasynyň Stambul şäherinde geçirilen ÝHHG-niň Parlament Assambleýasynyň 23-nji güýzki mejlisine, Täjigistan Respublikasynyň Duşenbe şäherinde Merkezi Aziýa ýurtlarynyň zenan ýolbaşçylarynyň dialogynyň 2025-nji ýyl üçin jemleýji çäresine gatnaşdylar. Hormatly Prezidentimiz ýurdumyzyň kanunlaryny kämilleşdirmek we döwrebaplaşdyrmak boýunça alnyp barylýan işleri dowam etdirmegiň zerurdygyny belledi. Ministrler Kabinetiniň Başlygynyň orunbasary H.Geldimyradow “Karz edaralary we bank işi hakynda”, “Auditorçylyk işi hakynda” Türkmenistanyň Kanunlaryna hem-de “Türkmenistanda buhgalterçilik hasaba alnyşy we auditi özgertmegiň maksatnamasy hakynda” Türkmenistanyň Prezidentiniň Kararyna laýyklykda, halkara standartlar esasynda, ýurdumyzyň bank edaralarynda ýyllyk maliýe hasabatlaryna audit barlaglaryny geçirmäge görülýän taýýarlyk işleri barada hasabat berdi. Bellenilişi ýaly, dünýäniň abraýly halkara auditor kompaniýalarynyň sanawyna girýän we tejribeli daşary ýurt auditor kompaniýalaryny saýlap almak maksady bilen, Türkmenistanyň Döwlet ösüş banky, Döwlet daşary ykdysady iş banky, “Daýhanbank”, “Türkmenistan” döwlet täjirçilik banklary, “Türkmenbaşy”, “Halkbank”, “Senagat”, Türkmen-türk paýdarlar täjirçilik banklary tarapyndan audit barlaglary boýunça halkara bäsleşikleri geçirmek meýilleşdirilýär. Munuň özi banklarda maliýe hasabatlarynyň takyklygyny seljermäge hem-de bank işiniň ugurlaryna baha bermäge mümkinçilik döreder. Şunuň bilen baglylykda, döwlet Baştutanymyzyň garamagyna degişli teklip hödürlenildi. ______________ «Türkmenistan» gazeti

ÜSTÜNLIKLI GEÇIRILEN HALKARA ÇÄRELER

Halkara gatnaşyklary

28.11.2025

28-nji noýabrda Gazagystan Respublikasynyň Aktau şäheriniň 2025-nji ýylda «Türki dünýäsiniň medeni paýtagty» diýlip yglan edilmegi mynasybetli, Türki medeniýetiniň halkara guramasyna (TÜRKSOÝ) agza döwletleriň Medeniýet ministrleriniň Hemişelik Geňeşiniň nobatdaky 42-nji mejlisi we geçirilen çäreleri jemlemek dabarasy hem-de türki döwletleriň sungat ussatlarynyň konserti geçirildi. Mejlisde Türkmenistanyň Medeniýet ministri A.Şamyradow çykyş etdi. Ol öz çykyşynda, 2025-nji ýylda türki dünýäsiniň medeni paýtagty diýlip yglan edilen, Aktau şäherinde halkara çäreleri üstünlikli geçirildi. Şol çärelere türkmenistanly medeniýet, sungat ussatlary hem işjeň gatnaşdylar. Türki dilli doganlyk halklary medeniýetleriniň we dilleriniň ýakynlygy, däp-dessurlarynyň meňzeşligi has-da ysnyşdyrýar. Bu halklaryň taryhyň synagyndan geçen dost-doganlyk gatnaşyklary häzirki döwürde täze öwüşginlere eýe bolýar. Munuň şeýledigine medeniýet babatdaky gatnaşyklar doly şaýatlyk edýär. Medeniýet we sungat–dünýä döwletleriniň we abraýly halkara guramalarynyň arasyndaky gatnaşyklary berkidýän dostluk köprüsidir. Biziň halklarymyzyň arasyndaky hoşniýetlilige, dost-doganlyga esaslanýan dostluk köprüsiniň binýady berkdir. Aktau şäheriniň 2025-nji ýylda türki dünýäsiniň medeni paýtagty diýlip yglan edilmegi mynasybetli geçirilen açylyş dabarasy we onuň çäklerinde guralan, «Türki äheňlerde tanslar» atly halkara tans bäsleşigi, şeýle hem, III Halkara teatr festiwaly ýaly birnäçe çäreler üstünlikli geçrildi. Bularyň ählisi özara bähbitli, deňhukukly gatnaşyklarymyzyň hem-de agzybirligimiziň alamatydyr. Şu ýylda TÜRKSOÝ tarapyndan Özbegistan Respublikasynyň Daşkent şäherinde geçirilen «Türki dünýäsiniň zenanlarynyň älemi» atly sergisi, Gazagystan Respublikasynyň Almaty şäherinde geçirilen 3-nji «Türki dünýäsiniň talyplar spektakllarynyň teatr festiwaly», Türkiýe Respublikasynyň Trabzon şäherinde geçirilen TÜRKSOÝ-yň Hemişelik Geňeşiniň wekilleri derejesindäki maslahaty hem türki halklaryň arasynda medeni hyzmatdaşlygy berkitmekde örän netijeli boldy. Türki dilli döwletleriň medeniýet we sungat ussatlarynyň gatnaşmaklarynda bilelikdäki medeni çäreleriň, konsertleriň yzygiderli guralmagy, biziň halklarymyzyň dost-doganlyk gatnaşyklaryny has-da ösdürýär. Bularyň ählisi medeniýet we sungat ugurlaryndaky gatnaşyklary mundan beýläk-de yzygiderli ösdürmäge, döredijilik babatda özara tejribeleri alyşmaga uly ýardam berýär-diýip belledi. Şeýle hem, türkmen we gazak halklarynyň arasynda halkara hyzmatdaşlygynyň ösdürilmegi ugrunda giň gerimli işleri alyp barýan, türkmen halkynyň Milli Liderine, Türkmenistanyň we Gazagystan Respublikasynyň Hormatly Prezidentlerine tüýs ýürekden alkyşlaryny aýtdy hem-de Olara berk jan saglyk, uzak ömür, alyp barýan döwletli işlerinde uly üstünlikleri arzuw etdi. 

URALYŇ HOR TOPARY AŞGABATDA: DOSTLUK KÖPRÜSI WE MEDENIÝETLERIŇ ARASYNDAKY GEPLEŞIK

Konsertler

28.11.2025

Ural döwlet akademiki rus halk hory 26–27-nji noýabrda Aşgabatdaky Magtymguly adyndaky milli sazly drama teatrynda konsert çykyşyny geçirdi. Bu giň gerimli halk taslamasynyň maksady rus diliniň, aýdym-sazynyň we däp-dessurlarynyň gözelligini goramak we dünýä bilen paýlaşmak bolup durýar. Konsert agşamlary Russiýa Federasiýasy bilen Türkmenistanyň arasyndaky gatnaşyklaryň uzak we netijeli taryhynda ýene-de bir aýdyň sahypa goşdy. Ýurtlarymyz birek-birege ynam, umumy gymmatlyklar, medeniýet we däp-dessurlar esasynda döredilen ýakyn taryhy gatnaşyklary paýlaşýarlar. Russiýa bilen Türkmenistanyň arasyndaky dostluk, ençeme ýyl bäri synagdan geçen ynam we biziň hormat goýýan hormatymyzdyr. Russiýanyň Türkmenistandaky ilçisi Iwan Wolynkin konsertiň başynda gutlag sözi bilen çykyş edip, horuň taryhy gelip çykyşy barada gürrüň berdi. Diplomat horuň 1943-nji ýylyň iýul aýynda Swerdlowsk filarmoniýasynda Kursk söweşinde döredilendigini belläp geçdi. Sowet halkynyň gahrymançylygynyň hatyrasyna hormat goýulýan Türkmen topragynda Beýik Ýeňişiň 80 ýyllygy mynasybetli ansamblyň çykyşynyň simwolizmine ünsi çekdi. Sungatyň çägi ýok. Ol göni ýürekden çykýar we sözlerden, uzak aralykdan hem beýikdir. Bu konsertiň dowamynda biz medeniýetleriň hakyky gepleşiklerine şaýat bolduk, bu ýerde her bir milli halk aýdym-sazy halklaryň arasynda köpri bolýar. Halk döredijiligi diňe bir sungat däl, ol halklaryň janly taryhy, nesilleri baglanyşdyrýan göze görünmeýän güýç. Onda ata-babalaryň paýhasy, däp-dessurlaryň gözelligi we asyrlardan bäri dowam edip gelýän duýgularyň çuňlugy bar. Ural döwlet akademiki rus halk horunyň medeni ýolbaşçysy we Russiýa Federasiýasynyň Prezidentiň Medeniýet geňeşiniň agzasy Nikolaý Zaýtsew. Horuň ýerine ýetirijileriniň Russiýanyň dürli sebitleriniň aýdym-saz däplerini görkezýän rus halk aýdymlary we wokal-horeografiki kompozisiýalaryny şowhunly el çarpyşmalar bilen garşy alyndy. Konsertde dünýäde söýülip diňlenýän halk aýdym-sazlary «Катюша» («Katýuşa»), «Подмосковные вечера» («Moskwa gijeleri»), «Матушка Россия» («Ene Russiýa»), «На горе, на гороньке» («Dagda, dagda»), «Ах, поле, поле, поле» («Aý, meýdan, meýdan, meýdan»), «У ворот жениха» («Ýigidiň derwezesinde»), «За околицей» («Daşardan aňyrda») we beýleki kompozisiýalary ýaňlandy. Olar özleriniň sungat çykyşlary arkaly bize gündogar we günbataryň serhetleşýän, dürli halklaryň asyrlar boýy sazlaşykly ýaşan ýeri bolan Uralyň ruhunyň bir bölegini berdiler. Bu duşuşyk medeniýetlerimiziň arasyndaky dostluk köprüsine öwrüldi. Milli däp-dessur sazly agşamy mähirli we dostlukly ýagdaýda geçdi. Şatlyk-şowhun bilen tomaşaçylar, Russiýa döwletiniň baý medeni mirasynyň ruhuny açyp görkezen ýerine ýetirijileriň ýokary hünär derejesini bellediler. Gurnaýjylar Magtymguly adyndaky milli sazly drama teatryň içinde etnograf Sergeý Glebuşkiniň ýygyndysyndan milli halk egin-eşikleriniň sergisini görkezdiler. Türkmenistan bilen Russiýa Federasiýasynyň arasyndaky halkara hyzmatdaşlygyň ösdürilmegi ugrunda giň gerimli işleri alyp barýan we şeýle giň mümkinçilikleri döredip berýän Türkmen halkynyň Milli Lideri Gahryman Arkadagymyza we Hormatly Prezidentimize tüýs ýürekden alkyş aýdýarys. _______________ Ahmet Jumakulyýew Maýa Kulyýewa adyndaky Türkmen milli konserwatoriýasynyň «Sazşynaslyk» hünäriniň 3-nji ýyl talyby

• ←
• 1
• ...
• 11
• 12
• 13
• ...
• 231
• →