Ýartygümmez kümmeti
Ýartygümmez (Ahmet al-Hadynyň) kümmeti as-Samanyň berýän maglumatlaryna görä, Şyh Ahmet al-Hadynyň mazarynyň üstüne bina edilipdir. Orta asyrlarda ol ýerde Andukan atly uly oba ýerleşipdir. Şol döwrüniň görnükli taryhçysy, alymy as-Samanynyň (1116-1167), “Kitap al-ansab” (Atlaryň genologik kitaby) diýen işinde şeýle setirler bar ,,Andukan-Sarahsyň obalaryndan biri, onda şyh Ahmet al-Hadynyň mazary bar”. XX asyryň gadymyýeti öwrenijileri görnükli alymlaryň (G.A.Pugaçenkowa, M.Ý.Masson) pikirlerine görä, Ýartygümmez as-Samanynyň belläp geçen şol Andukan obasyndaky Ahmet al-Hadynyň mazarynyň üstünden bina edilen ymarat bolmaly. Ahmet al-Hady X-XI asyrlarda Sarahs şäheriniň Andukan obasynda ýaşap, il içinde uly abraýdan peýdalanan musulman dininiň görnükli wekilleriniň biri bolupdyr.
