Magtymguly, adyň doldy jahana...
Şu ýylyň 7-13-nji awgusty aralygynda Russiýa Federasiýasynyň Tatarystan Respublikasynyň Kazan şäherinde türki halklaryň «Nowruz» atly XV halkara festiwaly geçirildi. Festiwala Türkmenistanyň Alp Arslan adyndaky milli drama teatrynyň baş ýolbaşçysy, Türkmenistanyň at gazanan artisti Handurdy Berdiýewiň dramaturg Gylyçmyrat Kakabaýewiň «Magtymguly Pyragy» atly dramasy esasynda sahnalaşdyran adybir spektakly gatnaşdy. Onlaýn tertibinde geçen festiwalda ýurdumyzyň teatr ussatlarynyň görkezen spektakly dostlukly ýurtlaryň teatr režissýorlarynyň ýokary bahasyna mynasyp boldy. Akyldar şahyrymyz Magtymguly Pyragynyň ömri we döredijiligi barada çeper keşpler arkaly gürrüň berýän spektakl festiwalyň ýörite diplomyna we kubogyna mynasyp boldy.