Bilbil MÄMMEDOW
Bilbil Mämmedow 1950-nji ýylyň 5-nji iýulynda Balkan welaýatynyň Serdar şäherinde eneden bolýar. 1973-nji ýylda M.S.Şepkin adyndaky ýokary teatr sungat institutyny tamamlaýar. Ol ýokary okuw mekdebinde okaýarka, W.Wişnewskiniň “Optimistik tragediýa”, Molýeriň “Jenap de Pursonýak”, N.Ostrowsiniň “Tupan” atly sahna oýunlarynyň sahnalaşdyrylmagyna gatnaşýar.
Ol okuwy tamamlap, ozalky A.Gulmämmedow adyndaky ýaş tomaşaçylar teatrynda işe başlady. Şol döwürde sahna ussatlary Hommat Müllük, Aman Baýramberdiýew, Oguldurdy Mämmetgulyýewa, Myrat Agabaýew, Mergen Nyýazow, Aman Ödäýew, Hajy Annamämmedow ýaly sahna ussatlaryndan tälim alýar we bilelikde işleýär. Ol Alp Arslan adyndaky milli drama teatrynda işleýärkä, 1982-nji ýylda Moskwadaky režissýorlaryň we ssenariçileriň ýokary kursuna okuwa girýär. Russiýanyň “Mosfilm” kinostudiýasynda döredijilik tejribesini geçýär.
Ol ýokary okuw kursuny tamamlap, “Türkmenfilm” kinostudiýasyna işe gelýär. Şol ýyllarda ol ilkinji “Arçaly adam” atly filmi surata düşürýär. Soňra ol “Garly”, “Ýaşlygymyň dessany” atly filmlerini surata düşürýär. Ol “Zähmet weterany”, “Gün hasaby”, “Türkmenler”, “Öz obamyň adamlary”, “Daşmaňlaý”, “Kel bagşy”, “Heserli” ýaly filmlerde surata düşýär. Şeýle hem “Nusaýda”, “Şazadalaryň aýdymy”, “Baba Gambar”, “Nejep oglan”, “Juwan kalbym”, “Göroglynyň sawçylary”, “Nepes sen” ýaly sahna oýunlaryny, şeýle hem “Kepderi”, “Arçaly adam”, “Ýaşlygymyň aýdymy”, “Şahandaz Japbaklar”, “Ah, Weli, Weli...” atly filmleri saz bilen bezedi. “Ýalançy”,“Günlerde bir gün”, “Garly”, “Lebap nagmalary”, “Ýaşlygymyň dessany”, “Arçaly adam”, “Merjen däneleri”, “Ak altyn”, “Ýaşlygymyň aýdymy”, “Şahandaz Japbaklar”, ”Ah, Weli, Weli”, “Enem sen” atly filmleriň edebi esaslaryny ýazdy.
“Perişdeler gijesi”, “Juwan kalbym”, “Blez”, “Ene toprak”, “Göroglynyň sawçylary”, “Nepes sen”, “Nurana şekiller”, “Täze ýyl ertekisi”, “Söýgi duralgasy”, “Taýharjyk”, “Paýhasyň güýji”, ,,Toý” atly sahna eserlerini sahnalaşdyrdy.
Aktýor, ssenariçi, teatr we kino režissýory B.Mämmedowa 1995-nji ýylda “Türkmenistanyň sungatda at gazanan işgäri” diýen hormatly at dakyldy. 1997-nji ýylda “Watana bolan söýgüsi üçin” medaly bilen sylaglanyldy.