«Milli miras mertebäm»
2020-nji ýylyň 16-njy martynda Döwlet muzeýiniň Bitaraplyk muzeýi şahamçasy tarapyndan Aşgabat şäherindäki 64-nji orta mekdepde «Milli miras mertebäm» atly sergi gurnaldy. Bu sergide milli miras we tebigat bilen baglanşykly muzeý gymmatlyklary goýuldy. Milli mirasa degişli bolan haly önümleriniň görnüşleri, milli egin-eşikler we aýakgaplar, gündelik durmuşda ulanylan agaç çemçeler, agaç okaralar, suw gaplary bolan kündükdir tüňler, şeýle hem biziň ýurdumyzda duş gelýän guşlaryň, haýwanlaryň dürli görnüşleriniň gäpleri görkezildi.
![](/img/upload/DSC_8103.JPG0HlP0-md.jpg)
Okuwçylar sergide halkymyzyň gadymdan gelýän milli mirasy, maddy gymmatlyklarymyzyň asyl nusgalary bilen, guşlaryň görnüşleriniň biologiki aýratynlygy, olaryň ýaýran ýerleri we iýmitlenişi bilen tanyşdylar. Ondan başga-da muzeýiň ylmy işgärleri halkymyzyň gadymy milli mirasynyň örän baýdygy we onuň ähmiýetiniň şu günlerde hormatly Prezidentimiziň ýolbaşçylygynda belent tutulýandygy barada, şeýle-de, ýurdumyzda seýrek duş gelýän haýwanlary, guşlary, ösümlikleri goramakda alnyp barylýan işler barada gürrüň berdiler.
![](/img/upload/DSC_8112.JPGUAxdE-sm.jpg)
![](/img/upload/DSC_8114.JPGJhk5g-sm.jpg)