Keteni
Ne al, ne-de asman, ýaşyl, gülgüne,
Badam, mawy, elwan reňkli keteni.
Ýaraşyk biýr, gyz-geliniň egnine,
Ülpüldisi Gün deý görkli keteni.
Soňlanmajak söhbet. bir ajaýyp heň,
Zenanyň yhlasy, söýgüsi siňen.
Gözbaşyny alyp çuň gadymýetden,
Asyr aşan, süňňi syrly keteni.
Şowurdap ses eder ýörelen çagy,
Tarynda jemlenen gözellik bary,
Äjemgoşar gökden, ýere inen ýaly,
Buzgunç ysly, ajap, durkly keteni.
Döwrebapdyr sazlaşygy reňkiniň,
Söýläp soňlama ýok, waspyn görküniň.
Dokalyşy, ajaplygy durkunyň,
Jahana ýaýylan milli keteni.
Miwe BEKMYRADOWA