Bäşim Nuralynyň uçgunlary – Bagtyýar ýaşlar
Berkarar döwletiň täze eýýamynyň Galkynyşy döwründe «Pähim-paýhas ummany Magtymguly Pyragy» ýylynda Türkmenistanyň Çeperçilik sergiler müdirligi we Şekillendiriş sungatynyň sergi merkezi, Türkmenistanyň Suratkeşler birleşigi bilen bilelikde gurnamaklarynda Aşgabat şäher medeniýet müdirliginiň Bäşim Nuraly adyndaky çagalar çeperçilik mekdebiniň 1-nji iýun Bütindünýä çagalary goramagyň halkara güni mynasybetli «Bäşim Nuralynyň uçgunlary – Bagtyýar ýaşlar» atly döredijilik sergisi geçirildi.
Sergide Aşgabat şäher medeniýet müdirliginiň Bäşim Nuraly adyndaky çagalar çeperçilik mekdebiniň okuwçylarynyň döreden eserleri görkezildi. Olaryň arasynda Aýlar Hojaýewanyň «Türkmen sährasy», Gülruh Kuliýewanyň «Milli mirasymyz», Merjengül Hojakuliýewanyň «Magtymguly Pyragy», Arslan Çaryýewiň «Döredijilik söhbeti», Melike Garajaýewanyň «Kerwen», Isa Toýlyýewiň «Halypa we şägirt», Nurjahan Çaryýewanyň «Kürteçi gelinler», Oraznabat Mämiliýewanyň «Nar», Leýli Durdyýewanyň «Toý», «Sport», Leýli Annamyradowanyň «Dostluk», Ali Annagulyýewiň «Seýis», Gaýgysyz Begmyradowyň «Halypa», Alypälwan Hudaýberenowyň «Baba Annaýew», «Babasary Annamyradow», «Berdinazar Hudaýnazarow», «Kerim Gurbannepesow», «Alty Garlyýew», «Artyk Jally», «Aýhan Hajyýew», Aýna Nuryýewanyň «Milli natýurmort», Medine Mollaýewanyň «Şaý-sep toplumy», Kerem Ataşowyň «Şaý-sep toplumy» Bibipatma Täşliýewanyň «Ak gül» Dünýägözel Ataýewanyň «Gül» ýaly eserleri bellemäge mynasypdyr. Sergide suratkeşleriň 386-dan gowrak işleri bolup, olardan nakgaş, grafika, haly, keramika, heýkel, gobelen eserleri görkezildi.
Bu sungat eserlerinde bagtyýar zamanymyzyň waspy, peýzažlar, milli däp-dessurlarymyz, oba durmuşy, hem-de Magtymguly Pyragynyň 300 ýyllygyna bagyşlanan eserler görkezilýär. Mundan başga-da bu sungat eserlerinde eziz Watanymyzyň gözel tebigaty, Ak mermerli owadan şäherimiz, arassa-asuda ýurdumyz, gündelik durmuşyň gyzykly sahnalary mynasyp suratlandyryldy.