Türkmenistanyň halk bagşysy, professor Ödenyýaz Nobatowy ýatlap
Türkmenistanyň Halk maslahatynyň başlygy, Milli Liderimiz Gahryman Arkadagymyzyň, Hormatly Prezidentimiz Arkadagly Serdarymyzyň taýsyz tagallalary bilen milli aýdym-saz sungatymyzy ösdürmeklige, halypa-şägirtlik ýoluny mynasyp derejede dowam etdirmeklige giň mümkinçilikler döredildi. Häzirki döwürde ömrüni bagşyçylyk sungatyna bagyşlan halypalaryň sarpasy belentde tutulyp, olaryň döredijiligi giňden öwrenilýär. Ynha, golaýda Medeniýet ministrliginiň Maddy däl medeni miras müdirligi, Tagtabazar etrap medeniýet bölümi we Tagtabazar etrap häkimligi bilen bilelikde Tagtabazar etrap medeniýet öýünde etrabyň bagşy-sazandalarynyň gatnaşmagynda Türkmenistanyň halk bagşysy Ödenyýaz Nobatowy ýatlap, aýdym-sazly dabara geçirildi. Dabarada Türkmenistanyň at gazanan medeniýet işgäri Töre Nobatow kakasynyň durmuş ýoly hakynda örän giňişleýin çykyş etdi. Soňra Türkmenistanyň at gazanan bagşysy Meret Tüňňiýew öz halypasy hakynda gyzykly gürrüňler berdi. Bagşynyň aýdymlaryny ussatlyk bilen ýerine ýetirdi.
Nobat bagşynyň aýal dogany Jumasoltan enäniň agtyklary Aýja hem Maýsa Taganowalaryň çykyşy we ýerine ýetiren aýdymlary hem ýatdan çykmajak täsir galdyrdy. Ödenyýaz Nobatowyň aýal dogany Akjagüliň ogly Myrat Gurdow daýysynyň aýdym-saz sungatynda bitiren hyzmatlary barada giňişleýin gürrüňler etdi we onuň aýdan aýdymlaryndan ýerine ýetirdi. Dabarada başga-da birnäçe çykyşlar edildi, aýdym-sazlar ýaňlandy. Ödenyýaz Nobatowyň çowlugy 10 ýaşly Allanuryň akkordeonda çalyp beren sazlary hem dutarda aýdan aýdymlary, 7 ýaşyndaky Döwletmyradyň aýdan aýdymy halypanyň halypalyk ýolunyň mynasyp derejede dowam etdirilýändigine guwanç duýgusyny döretdi.
Halkymyzyň ussat halypalarynyň ömri-döredijiligini öwrenmekde nusgalyk ýol görkezýän Türkmenistanyň Halk Maslahatynyň başlygy, Milli Liderimiz, Gahryman Arkadagymyza, Hormatly Prezidentimiz Arkadagly Serdarymyza köp-köp sagbolsunlarymyzy aýdýarys. Goý Milli Liderimiz Gahryman Arkadagymyzyň, Hormatly Prezidentimiz Arkadagly Serdarymyzyň janlary sag bolsun, belent başlary aman bolsun, il-ýurt bähbitli işleri elmydama rowaç bolsun.
